¹ "Ba-nikwo si Ada ne, nyine ewu wa ganu ka mi." ² Banị ge ge wu ke u ge guke ka Iblaniyawa tee nba si yi zẹẹ u gẹ̀dẹ, ³ n vu Ubayahude, n fu ni vtaliwasa wa Ukidikiya, Ugamaliya ne n ba tsene ni kẹ ma'a ba ibe izizi ya adakpu eyi ne te. Lika ka Usigapa si bani ga me kan ko'ene. ⁴ N pala utumozi me gene gitsi, n kwo belolo si benyine, n tse ba le ni ibulusuna. ⁵ I filis si itinibo ba fu usenda gẹdẹ ba gimi uwasika gebo ka baniko me n ba le ni Udimasiku te, gi n ge mo bani me n ba ba utumozi me te, ma kwo ba, me bene ba Uliselima gi a giba liye. ⁶ N na de ni utumozi ma ge, n ga ni tsutsu ni Udimasiku ne, ni uzu ne gẹdẹ-gẹ̀dẹ, n giwa gude si'a ku e gi mi a-gwo. ⁷ N fu lu tize, nyine, n wu gule gude gẹ̀dẹ Usawulu, Usawulu, n gye iyi n nya wulu gi mi la? ⁸ N gine gẹ̀dẹ, ngo u te? Ada? U gem gẹ̀dẹ 'Ni mi n vu Uyesu wa Nazala me nya wulu gimi la te. ⁹ Ba ni me ile zaa te pa giwa guye nde gule gu me u ge lika ni mi te ba kpu'a la. ¹⁰ N gẹ̀dẹ ma me gu8neme, Ada? gine mi gẹdẹ, like, zwi Udimasiku, aa gẹẹ ubeme nyaa me te nmo. ¹¹ Giwa guye ge ngye te ma bi nneki ga pa la, banị me i de nne te n ba mo mi ni ibo zune Udimasiku. ¹² N ge tu unude me a vala gẹ̀dẹ Ananiya te u nya nzizi ya Usigapa Yahudawa me nba le nmo te gini'a tsi-uki ana ( ge lika kana) u sensele. ¹³ U be, u gẹ̀dẹ 'udagbo Usawulu, pa nneki. nyine n yapu ami pye n ma pa nneki. ¹⁴ Nyine u gẹ̀dẹ Usigapa wa adakpu'eyi ne fune'e gẹ̀dẹ nya kpu ubeme u yẹẹ te, gi nya pa uni sele, gi nya gini wu ubeme u fu ni gani kana. ¹⁵ Gẹ̀dẹ nyàa vu unume unume n waa ge lika kana me nya pa nya gini wu te a gi banị. ¹⁶ Kyekye me, nya pu ngye? like, gi a me'e baptizma, gi a nyini aka ibibi ye nye, gi nya'a vala liye kana. ¹⁷ N ba kolegi be Uliselima, n ba ni ma me aduwa, m pa uwahayi. ¹⁸ N paa u ge m gẹ̀dẹ mode, gi ki Uliselima, gebo gẹ̀dẹ ba wulu ni ibeme nya'a ge ba ni lutu ka mi te la. ¹⁹ N gẹ̀dẹ, 'Ada, ni ba ni iwu yaba ne kpu gẹ̀dẹ n zwi aza ya aduwa mo banị me nba wulu nene te, lu ba, mo ba le ni Ibulusuna. ²⁰ Tu me a se beyi ka Istifanus usi-usenda 'enye fene te, nsi de kami nmo, m ba nyine ya banị me n ba wu'a te.' ²¹ Nde u ge mi gẹ̀dẹ ma ge, gẹ̀dẹ nna e ne mi gite ni guke i-kiki. ²² Banị ye gbaa uni gebye, n ba su ligba gẹ̀dẹ, e-li uni ukome e ki gase gune, gebo gẹ̀dẹ wa gwo gede wa nya ulayi la. ²³ Kẹ ba ba ni e su agba, e tse ngye yaba e fene, n ba gini e su gulili. ²⁴ U ganibo ka isoza gi ganu gẹ̀dẹ e gone Ubulusu gapa. U ne ba gede ba e bi'a lige ni tigi ne gẹ̀dẹ nna kpu ubeme u gigi n banị e su''a ligba te. ²⁵ A ba ni'a kwo ni ili ne, Ubulusu ge usoza me u gyengye tsutsu naane te gẹ̀dẹ, "Ni ibe izizi ya banị uloma, u gwo gẹ̀dẹ unume aa zaa iwa be la, e le'a tigi?" ²⁶ Kẹ uganibo ka isoza iya ba wu te te u ga ge unime uwa vo isoza ya nneye te gẹ̀dẹ, "Waa yi guneyi te? nte nuiye ga vu banị uloma." ²⁷ Unume u wa vo isoza ya nneye te byi Ubulusu gẹ̀dẹ, "Nya vu banị uloma ga? Ubulusu gẹ̀dẹ e. ²⁸ Uli-lutu ka isoza me gine gẹ̀dẹ "N gi iku mu'a tse aa wulu gẹ̀dẹ ma vu banị nneme." Nde Ubulusu gaa gẹ̀dẹ "N vu ubi momo uloma." ²⁹ Nyine, nbani me n ba gi ma e bi'a lige te si gi ki'a kukwa. Uli-lutu ka isoza iye ba wu gẹ̀dẹ Ubulusu vu banị uloma te, nzine mu'a, gẹ̀dẹ u gima ni'a kwo. ³⁰ Gayapu ku kana, uli-lutu ka isoza iye e ubeme u gwo Iyahudawa ni Ubulusu ne te. Nyine u bana Ubulusu, u vala uli-lutu ka ifiris ni batsagba yaba ne bene ga gagwo. Ubene Ubulusu de ni gaki-gaki ka ba.