¹ Kẹ ina ni ba nẹ tẹ̀, ezwi gukpa kọ uzọ, gẹẹ Ukosi, gayapụkụ kana, egẹẹ Ulode, ifu mọ itsesa Upatala. ² Epa gukpa kọ uzọ, ezwi mọ, itsesa Ufonisi. ³ Egẹẹ nẹ iyapụ lu Ukuburusu, enabo'a zi gubo upele ka gukpa ko uzọ, itse wọ Usuruya, ega sii tịzẹ ni Utaya. ⁴ Ega tsígọ batsagba dẹ̀, i le nmọ izụ tọva, Ulufu gẹ̀ lika niba nẹ, nba wụlụ gi, Ubulusu agẹẹ Uliselima la. ⁵ E mẹẹ Izu iva n mọ, nba pụnụ yi, si benyine, ni bebyi yaba nẹ, gẹnẹ atu ya ile, ikulu imẹẹ aduwa, igii kiba. ⁶ E zwi gukpa kọ uzọ, imẹẹ idika gubo, nbe kolegi gẹẹ gami. ⁷ Kẹ ifu nu Utaya, isine ibe nu Utalamaya, izi n mọ, e li banị́kọ yeyi atsu. ⁸ Gayapụkụ kana, e gẹẹ Ukasariya. Izwi gami ka Ufilibus, umẹ udẹ ni ginyẹ ka banị́ tọva mẹ, nba zwi gi ba gẹ̀ banị́ lika kọ Usigapa tẹ̀, i le na'a nẹ. ⁹ Unya bebyi benyinezwi inọ mẹ'ẹ nba gẹ̀ lika kọ Usigapa tẹ̀. ¹⁰ N be le nnẹ̀ ye, mẹ izẹ iva, anebi dẹ̀ mẹ avala gẹ̀dẹ Agabusu tẹ̀, fu nu Uyahuda be. ¹¹ U be woze eyi, u su udalala wa uwondo wa Ubulusu, u kyẹ ibo si nnẹ ya iwụ yana , u gẹ̀dẹ, ulufu gẹ̀dẹ, unị́ mẹ u nya udlala mẹ tẹ̀, iyahuda kọ'e tẹ̀, gi ba gi banị́. ¹² Kẹ iwu lika guyẹ tẹ̀, gbyi eyi mẹ'ẹ, i le n mọ tẹ̀, e gẹ̀ Ubulusu gẹ̀dẹ, u ka gẹẹ Uliselima la. ¹³ Ubulusu giné ba gẹ̀dẹ, "Nyinẹ'a gi gunyi gi iye yami ezo? N yi, a kyẹ̀ mi, gi'a wụ mi, gebo ka Uyesu ni Uliselima, we'e bibi la. ¹⁴ Kẹ Ubulusu aga wụlụ, gẹ̀dẹ, lika guyẹ a da nina nsẹ la tẹ̀, ẹ gẹ̀dẹ, ube mẹ, u ba Usigapa, wa mẹ." ¹⁵ A wa isi-iva, i kụ ibe yeyi igẹẹ uliselima." ¹⁶ Batsagba dẹ̀ mẹ nba vo ba ni Ukaisaliya tẹ̀ dẹ, nnẹ niyi nẹ. Ba mọ Utsagbani dẹ̀, ba ni Ukubulusu mẹ a vala gẹ̀dẹ Umanason tẹ̀ vo gi iga le na'anẹ. ¹⁷ Kẹ iga nu Uliselima tẹ̀, banị́kọ ye yi gu yi, ni ibo iva nẹ. ¹⁸ Gayapụkụ kana, idẹ nnẹ ni Ubulusu nẹ gẹẹ ni Uyakubu nẹ, i gẹẹ tụ itinibo n mọ gbyi. ¹⁹ Ubulusu ni atsu li ba, ugẹ̀ ba ibe mẹ Usigapa mẹ gatimẹ nina nẹ, u mẹ banị́ tẹ̀. ²⁰ Ba wu tẹ̀, nba talikpọmọ gi Usigapa, nba gẹ̀ Ubususu gẹ̀dẹ, Udagbọ, nya pa tẹ̀, Iyahuda wụlụ li, u baba gẹ̀dẹ, niba a si'a ba ibe izizi. ²¹ A gẹ̀ ba lika ka ẹnẹ gẹ̀dẹ, nya tẹ́ nẹ banị́ ikiki, aba mẹ, nba le ni gulekye tẹ̀, gẹ̀dẹ, be nabo Umusa, nya gini gẹ̀ be gẹ̀dẹ, ba ka tsi bebyi ya ba ifotsi la, nya gẹ̀ ba gẹ̀dẹ, ba ka mẹ, ibe izizi ya ekiye-kiye la. ²² Ya mẹ gunẹ mẹ? Be wu gẹ̀dẹ, nya dẹ ni ile li. ²³ Gebo guyẹ tẹ̀, mẹ ube mẹ i gẹẹ tẹ̀. I nya banị́ inọ mẹ, nba mẹ anikewoli tẹ̀. ²⁴ Kụ ba gi nya nyini iwụ ya nye, gi iku si imẹ n ba pa tiyi tẹ̀. Gi banị́ a kpụ gẹ̀dẹ, ibe mẹ a gẹ̀ ni lutu ka enyẹ tẹ̀, vu ami. Ba kpụ gẹ̀dẹ nya fulu'aba ibe izizi. ²⁵ Nde gukye ikiki mẹ, nba wụlụ ni Uyesu nẹ tẹ̀, ika vo ba gẹ̀dẹ, ba ka li ibe mẹ ivu ya gebo tẹ̀ la, ba tselikpa ni beyi nẹ, si fiye gumẹ a zinyi uto ana tẹ̀, ni ga gẹ̀dẹ ba ka ye benyine la, ba ka gini ye belolo la. ²⁶ Ubulusu kụ banị́ yẹmi gayapụkụ nẹ, u ginni iwu yana ni ba nẹ, uzwi guza ka aduwa, u gẹ̀ banị́ ke lika guyẹ wa bya tẹ̀, si uzu mẹ a mẹ gamunu gebo ka ba tẹ̀. ²⁷ Ube ki kpene gi izi tọva e bye, Iyahuda dẹ mẹ nba fu ni Asiya tẹ̀, pa Ubulusu ni guza ka aduwa, nba zuli banị́, nba lu'a. ²⁸ Ba su ligba "Banị́ Iseleyila, nyinẹ a dẹ yi ibo. Unị́ mẹ u wa tsene banị́ gẹ̀dẹ, aka ba ibe izizi ya nnẹ̀ mẹ la tẹ̀, u dẹ tẹ̀. Ugi bene Ihelena guza ka aduwa gi wa vu ibe n mọ ²⁹ Gebo gẹ̀dẹ, ba pa Ubulusu nẹ ni Utarofima banị́ Afisa nẹ, nba ni su gẹ̀dẹ, u bene'a guza ka aduwa. ³⁰ Nyinẹ n nnẹ̀ki si ni gi tata, nbanị́ sẹẹ kulu Ubulusu, n be la ibe. Nbe fune'a ki guza ka aduwa, nbe gụ ukpaki kukwa. ³¹ Be gbụlụdụ gẹ̀dẹ, niba a wụ'a, n lika guyẹ zwi gutakpụ isoza gẹ̀dẹ, ani Uliselima giné tata ni ikana nẹ lii. ³² U si kụ banị́ lụkọ ga gbụ vo, n ba mọ dẹ gẹẹ n mọ. Banị́ yẹ ba pa uganibo ka isoza, ni banị́ lụkọ ga gbụ nẹ, n ba nabo Ubulusu ge lu. ³³ U ganibo ka Isoza iyẹ mọ Ubulusu, u lu'a, u gigi akyẹ̀'a ni atsamgba iva nẹ. U bi lige gẹ̀dẹ, Unị́ mẹ vu ngọ? U mẹ ẹnẹ ngyẹ? ³⁴ Gebo ka ligba tẹ̀, uganibo ka Isoza iyẹ wa wú ibemẹ, nba gẹ̀ tẹ̀ la, ugẹ̀ ba gẹ̀dẹ, ba zwi nẹ'a gunne ka Isoza. ³⁵ Nba ga nu nnẹ̀ mẹ amọ ego guza tẹ̀, Isoza su Ubulusu gebo ka ligba, si ipisi mẹ ngedu a mẹ kpeke tẹ̀. ³⁶ Gedu guyẹ ba ba'a, nba si e su'a ligba gẹ̀dẹ, a wụ'a. ³⁷ Kẹ ẹ bene eye, a zwi nẹ'a gunne ka Isoza tẹ̀, Ubulusu gẹ̀ uganibo ka Isoza gẹ̀dẹ, nnya ube dẹ̀ ma gẹ̀, uganibo guyẹ giné'a gẹ̀dẹ, "Nya bi Uhelena gagẹ̀? ³⁸ A vu nyẹ, nnya gọ banị́ tipi te la? Nya kụ banị́ ni gedu nẹ, bene gẹ̀dẹ, a ba wụ banị́ tẹ̀ la? ³⁹ Ubulusu giné'a gẹ̀dẹ, "N vu banị́ Ibarene, n funi Utalisu, nu ukilikiya. N fu nu ile nikpụkpụ, wụlụ gima gẹ̀ lika ni banị́ nẹ. ⁴⁰ Uganibo ka Isoza iyẹ gi'a ganu, Ubulusu go ba ni gunne, ugoné ibo nki gẹ̀dẹ gọngọ a yi kpọ. Nnẹ̀ki yi zẹẹ, ugẹ̀ gukye niba nẹ gẹ̀dẹ.