¹ Kẹ iwa kyẹ tẹ̀ ubulusu, né gitẹ gẹ̀dẹ avala Batsagba yana, gi wa gi ba ntsi, gi u gina gẹ̀ ba gẹ̀dẹ na'a gẹẹ kana Umakidoni tẹ̀. Kẹ u gẹẹ ile yẹ tẹ̀, u gẹ̀ lika ni gedu nẹ, u gini giba ntsi, u gẹẹ tịzẹ ka Uhelena nẹ. ³ Kẹ u dẹ nnẹ yẹ ipya ita, nbanị́ Uyahuda kyẹ lika kana, kọ wa zwi gukpa, a gẹẹ Usuriya tẹ̀, ugẹ̀dẹ, nbeli gi nẹ'ẹ tse igii agẹẹ Umakidoni. ⁴ Banị́ mẹ nba pụnụ Ubulusu gẹnẹ Asiya tẹ̀, vu Usobataru ubyi wa Uburu wọ Ubiriya. Ugagus unị́ ya Udebe, Utimoti ubyi wọ Arisitaku ubyi ya Usakudu, gbyi aba ba vu banị́ ya aduwa yọ Utasalonika, si Utikiku wọ Utirofimu wọ Asiya. ⁵ Nde banị́ mẹnẹ gẹẹ tse igii, nbe ngye apụ'a nu Utaruwasa. ⁶ I zwi gukpa, i ikyẹ́ Ufilibi, kẹ utu wo ̣ubuledi kyẹ́ tẹ̀, ngene uzu utụtọ, nbe be uwoza aba, nu Utaruwasa, nnẹ̀ yẹ nba dẹ izu tọva. ⁷ Ni uzu wa ngbọngbọ nẹ, wọ usati, kẹ igọ gẹ̀dẹ ya li ibulodi tẹ̀, Ubulusu gẹ̀ lika ni banị́ ya aduwa nẹ, we ye gẹ̀dẹ na'a gẹẹ ni gayapụkụ nẹ, u gẹ̀ lika gbogbo utú gakigaki nu. ⁸ Giwa ni gedu nẹ, yi ni guza ka nki mẹ nba gọ tẹ̀. ⁹ Ubyikilólò udẹ̀, avala'a gẹ̀dẹ Afitikos, udẹndẹ nu ukpaki wa afu, uwe zee bala. Kẹ Ubulusu agẹ̀ lika ni likpa nẹ tẹ̀, ubyikilólò mẹ agini bala geze, upili ni guza ka nki, u ni tsi. ¹⁰ Nde Ubulusu tana ibo yana ugụ'a. Ugẹ̀dẹ iye yaba aga ẹ bibi la, gẹ̀dẹ unya ulayi. ¹¹ U go guza ka nki, ufulu ubulodi li. Ugẹ̀ lika ni ba nẹ, gbogbo, tse ugii. ¹² Be bene ubyi yẹ nu ulayi nẹ, iye si ba tsim. ¹³ Niyi ni iwụ yeyi nẹ, i né gezugẹ kọ Ubulusu ni gukpa, i kyẹ gẹẹ Asos, nnẹỵe isu Ubulusu gẹnẹ ukpasa yẹ. Ube mẹ ẹ nya ni iwa yana tẹ̀, yeye gẹ̀dẹ nyinẹ amẹ tẹ́, uvu gẹ̀dẹ wa zutuzu ngene. ¹⁴ Kụ utụyi ni Asos tẹ̀, i su'a zwinẹ gukpa, gẹnẹ Umilitus. ¹⁵ Kẹ izwi gukpa tẹ̀, inabo nnẹ̀ yẹ, ni gayapụkụ nẹ, inu Utsibiri wọ Ukiyo. Ni gayapụkụ nẹ, isida Utsibiri wọ Usamo, ni gayapụkụ nẹ, igẹẹ Umilitus. ¹⁶ Ubulusu gini su gẹdẹ, na'a gẹẹ Afisa, gi uga'a bya nu Asiya la, gebo gẹ̀dẹ, wa mẹ ala ala gẹ̀dẹ, na'a nu Uriselima, gebo kọ uzu ya gapya kọ Ufentakos, uga yi gẹ̀dẹ, wa yi tẹ̀. ¹⁷ Nu Umilitu uné banị́ gẹnẹ Afisa, gẹ̀dẹ ba vala batinibo yọ guza ka aduwa, abene. ¹⁸ Kẹ bebe uwoza ana tẹ̀, ugẹ̀ ba gẹ̀dẹ, tuni uzu ya ngbọgbọ, nzwi Asiya tẹ̀, gẹ̀dẹ ma dẹ nẹnẹnẹ tẹ̀. ¹⁹ N sine iye tịzẹ nu Usigapa, ni baya nẹ, si liyẹ̀ gapa, gebo ka, aka mẹ banị́ Uyahuda kyẹ̀ nu lutu kami tẹ̀. ²⁰ Nyinẹ kpụ tẹ̀, gẹ̀dẹ, ma nabo gyẹngyẹ zi la, ni ga gẹ̀dẹ ma gẹ̀ lika tii lala, si ugede-gede, si gami-gami. ²¹ Nyinẹ kpụ, kẹ ngẹ̀ Iyahuda nẹ, nu Ihelena nẹ, lika ka ge tuba kọ Usigapa, ni ga wụlụ nu Uyesu nẹ tẹ̀. ²² Kyekyemẹ tẹ̀, ma gẹẹ Uruliselima, ni ntsi ya Ulufu nẹ, ma kpụ ube mẹ uwa yi nnẹ̀ yẹ tẹ̀ la. ²³ Nde Ulufu Usesele gẹ̀dẹ, ma mẹ ankeli ni ile-ile nẹ, gẹ̀dẹ, antsagba ni liyẹ̀ nẹ, egye a pụmi lii. ²⁴ Nde me'e su ulayi yami zi gyẹngyẹ la, gebo gẹ̀dẹ, me ye gẹ̀dẹ, gebye ka gatimẹ kami nu Uyesu Alimasifu, wa vu ya aniheli wọ Usigapa. ²⁵ Kyekyemẹ, nyinẹ gbyi, imẹ ngẹ̀ nẹ, lika ka litsẹ ka nki mẹ tẹ̀, apami gala. ²⁶ Gebo guyẹ tẹ̀, ma gẹ̀ nẹ, gẹ̀dẹ nyinẹ kpụ, nu uzu mẹ, gẹ̀dẹ, beyi ka gọngọ ayi nu lutu kami la. ²⁷ Gebo guyẹ tẹ̀, gyẹngyẹ aki wo, ni lika kọ Usigapa mẹ, n ma gẹ̀ nẹ tẹ̀ la. ²⁸ Gebo guyẹ tẹ̀, nyinẹ amọ iwụ yẹnẹ ibo, si banị́ mẹ Ulufu Usesele gi'ẹ nẹ, gẹ̀dẹ nyinẹ apa ba tẹ̀. Nyinẹ a dẹ iye amẹ lika ni banị́ ya aduwa nẹ, gẹ̀dẹ Usigapa gụba gbyi kana be. ²⁹ Nkpụ tẹ̀, gẹ̀dẹ, nbe gii, banị́ ibibi ebe nginye kẹnẹ, nba gbasa'ẹ nẹ. ³⁰ Nyinẹ akpụ tẹ̀, gẹ̀dẹ, nginyẹ kẹnẹ, bani idika ebe, nbe gine lika utii, gi ba wa banị́ idẹ̀ yẹnẹ, efune eki batsagba mẹ, nbe be ni igii yẹnẹ tẹ̀. ³¹ Gebo guyẹ tẹ̀, nyinẹ'a amẹ ankeli, nyinẹ a tẹ́, ni iye ita mẹ, ma'a nabo ga gẹ̀ nẹ, lika ni baya nẹ, nu uzu nẹ, nu utú nẹ la. ³² Kyekyemẹ, Ma'a nabo ẹnẹ, nu Usigapa, ni aniheli nẹ, umẹ uwa'a gi'ẹnẹ ikube, ni ginyẹ ka ga sẹẹ kẹnẹ. ³³ Me'e gine Azurufa, Uzinari, ya gọngọ, gi iwụ yami la. ³⁴ Nyinẹ ni iwụ yẹnẹ nẹ, kpụ tẹ́, gẹ̀de, ibo yami mẹ gatimẹ gimi, si nyinẹ imẹ, nnyinẹ le nimi nẹ tẹ̀ nẹ. ³⁵ Ni lika gumẹ gbyi, ntsene nẹ, kẹ nyinẹ'a dẹ banị́ mẹ'ẹ, nba nya ntsi la tẹ̀, ni gatimẹ, gamẹ nẹ tẹ̀, si kẹ nyinẹ'a tẹ́ lika kọ Uyesu Alimasifu tẹ̀, gẹ̀dẹ, unị́ gagi nya anibalika pe, unị́ gagụ. ³⁶ Kẹ ugẹ̀ lika gumẹ bye tẹ̀, ukulu, umẹ aduwa, ni ba nẹ gbyi. ³⁷ Banị́ ni gedu nẹ, gi gunyi, nba mọ'a, nba da'a. ³⁸ Iye yaba ni zo gbyi, gebo ka aka mẹ ugẹ̀ tẹ̀, gẹ̀dẹ, ugẹ̀dẹ, apa upisika yana gala. nba punẹ'a gẹnẹ nu gukpa kọ uzọ.