¹ Kyekye mẹ tẹ̀, kọ ba kyẹ ile yọ Amfibolis, nu Aboloniya ne tẹ, ba kye zwi gam ka Aduwa ya bani Yahudawa nguleke ko Tasalonika. ² Kẹ Ubulusu sa na metẹ ugẹ̀ woze aba dẹ izi ita uwa gẹ̀ba lika ko ubible. ³ We pye Ubabulu uwa geba gẹ̀dẹ usa gite, gẹ̀dẹ u Alimasihu a pa liye nde we likye ni bekunẹ wa ugẹ̀dẹ Uyesu me nma gẹ̀ likye kana mete, uvu Alimasihu. ⁴ Bani Uliselima idika aba wulụ nu ubulusu nẹ su Usailas, gbuno ni gedu Unikpụkpụ ki ko Helenawa, si beine ni gedu nẹ ⁵ Nde bani ya Yahudawa me nba wulu la tẹ, a me agu, nba ye bani ibibi dẹ ngigye, nbe bene ba lulo lulo nba ni guleke su vovo. Nbe tse ike zune gam ko yason, ni ga gẹ̀dẹ nibe fune Ubulusu ni Usailas ne ngegu ka gẹ̀dẹ. ⁶ Nde kẹ ba pa la tẹ, be kwukwo, Uyesu ni banị ko idẹ ne, ni ba itunuboye ile, ni gunyi nẹ, nba gẹ̀dẹ bani mene mẹ nba ni gase gine tata tẹ gini betẹ ⁷ Belọlọ mẹ Uyesu guba tẹ, ba me aka me ukaisa eye la tẹ, nba gini gẹ̀dẹ u gwole de yi li Uyesu. ⁸ Gedu si batunubo ye le, ni gba iye kẹ be wu aka mẹ tẹ. ⁹ Nde ken Batunubo gigyí Uyesu ni ban ikiki nẹ gi ikụ tẹ, nba nabo ba nba gẹ̀. ¹⁰ Gane guye ban ikiki nẹ Ubulusu ni Usilas gẹ̀nẹ Biliya, nba ga nu neye nba zwi nni Aduwa yo Yahudawa. ¹¹ Keke metẹ, banị menẹ vu isensele pe bani tasalonika, gebo gẹ̀dẹ ba gu lika kọ Usigapa ni iyeye dẹdẹ nẹ nba gini a nyine ibible zam gi nba pa tẹ, gẹ̀dẹ ibeme yi tẹ. ¹² N gene banị yaba ni gedu ne wolu, gbonu si benyinẹ itunubo yo helenawa si belọlọ ni gedu nẹ. ¹³ Nde kẹ Yahudawa yo tasalonika wu gẹ̀dẹ Ubulusu gi na gẹ̀ lika ko Usigapa nu Biliya ba gẹ̀ nẹ nba gbasa gedu. ¹⁴ N gene nba ikiki gẹ̀nẹ Ubulusu nnu uzo, nde Usilas nu Utimoti nẹ, ngye nmọ. ¹⁵ Banị me nba gẹ̀ nu Ubulusu nẹ tẹ ge na ni likpa, nguleke gudẹ avala gẹ̀dẹ Atina kẹ ba sa nabo Ubulusu tẹ, u geba gẹ̀dẹ ba si ga gẹ̀ ba go Usilas nu Utimiti ne gẹ̀dẹ uka bya tse gi nbe la. ¹⁶ Keke me tẹ, kẹ Ubulusu ẹnẹ gye a puba nu Atina tẹ, ipisi ma gen gye gebo gẹ̀dẹ guleke guyẹ lele ni iwụlụ nẹ. ¹⁷ Gebo guye tẹ, ume lika ni Yahudawa ne si banị mẹ nba veni a gi Usigapa tẹ, gbonu si banị me nbele n gigye tẹ. ¹⁸ Nde banị Abikuligawa ni umasana nẹ tsi gwa. Idika yaba gẹ̀dẹ ngyẹ uni uwụlụ me age? nbanị ikiki gẹ̀dẹ uza banị me nba na gẹ̀dẹ aba Usigapa a banị za tẹ, gebo gẹ̀dẹ wa gẹ̀ lika kọ Uyesu ni ge lika na nẹ. ¹⁹ Be vo Ubulusu bene utudu Alasa, gẹ̀dẹ wa gẹ Niba lika upụpa gumẹ uwa gẹ̀ metẹ? ²⁰ Gebo gẹ̀dẹ nye bene aka ipupa mẹ gẹ̀dẹ ye wa yeye ya kpụ ibme ibeye vu tẹ, ²¹ Keke me tẹ, bani Atina ni ba niza ne gbi, ime nbe le nne ye tẹ, ezi guta kpụ la, ka ba gini gẹ̀ gyengye Upụpa la. ²² Ubulus gyẹngyẹ n gaki gaki ka utude Arasa, ugẹ̀dẹ, nyine belolo yo Atina npa gẹdẹ nyine'a va bani adini ga mo ibo tsim. ²³ Gẹ̀dẹ kẹ ma kye nma pa ga vini kene te, npa ugudu mẹ uwa kpu usigapa la tẹ, ma gẹnẹ gẹdẹ ibe me nyine'a vini agi ya me te, ga kpu la uwa mene tẹ ²⁴ Usigapa me u mee gase ni ibe ya gi nyi kana nẹ tẹ, uvu Usigapa wọ nki ni gase nẹ gebo guyẹ tẹ, wa de ni guza ka aduwa me ama ni ibo ne la tẹ. ²⁵ Ka wavu gẹ̀dẹ avini aga ni ibo ya bani nẹ la, gebo gẹ̀dẹ weye gyẹngyẹ, du na awa gi banị ulai ni gufu gadu ne si gyẹngyẹ gbyi. ²⁶ Ni uni udẹdẹ ugigi n banị li ni gase gume, kẹ ukpọ utu pelili nu ukpasa me nbe le tẹ nẹ ²⁷ Gebo gẹ̀dẹ be ye Usigapa, ba ga na anu nẹ, nba waa si ga yi tẹ, wọ ke likpa ni gwọ gwọ eyi nẹ la. ²⁸ Nga yi kana iyi, igini ya wa gabana, iya wa ibe yeyi, ke usi yi nlika gẹdẹ ivu bebi yana tẹ. ²⁹ Gebo guye tẹ̀, tu ke ivu bebi yo Usigapa, yeye gẹ̀dẹ ika nyine gẹ̀dẹ ge yeliyẹ kọ Uzinaliya, kọ Azufa, kọ ikwu, kọ upotu, avu ni yapu ume la. ³⁰ Gebo guye tẹ, Usigapa esu lika ko bani ga kpu la ezi gyẹngyẹ la, nde keke me tẹ ugi ganu gẹ̀dẹ gwọ gwọ gbyi etuba. ³¹ Gebo ka ga gẹ̀dẹ unime uwa kye iwu usele ngase tẹ, vu uni me uza tẹ, usenda me Usigapa gi tẹ, uvu gẹ̀dẹ u like ne unimẹ ni bekunẹ. ³² Keke me tẹ kẹ banị Atina wu gelike kọ uni me tẹ banị idika aba deh Ubulusu, nde idika aba gẹ̀dẹ niba gini ezi gutakpu ewu wa. ³³ Ubulus ge ba tẹ, bye u likye kyi ba. ³⁴ Nde banị idika wọlụ si Udiyonisiyu, Utudu Ureopagite, si nyine de avala gẹ̀dẹ Damaris, bani kiki ime nbe le na ne tẹ