¹ Ekhe̱in Galesian li oghumioruru, o̱'o̱ke ko̱vba eo̱? Eo'vba li aza khain Jesu yie̱n vb'ogbe̱n. ² O̱na uo̱kpa li ho'oi li mama vbi obo̱ vba. Eru mie Etin vbi obia si uhi, daa sian vbi amie̱ho̱n si eta la ho̱in? ³ Vbake iyo̱ ruru? Livba ke re̱ ri e̱mo̱in Etin be̱ re, eri vba lo̱ ke o̱ ri e̱mo̱n egbe kuo̱ia? ⁴ Erivba lo̱ ke ooya si emi lebun na kua, e̱ghe̱ laai khi aukua o̱'o̱? ⁵ Eri o̱lo̱ri Etin navba, lo̱ gbo bi obia si o̱yiunua vbi usee vba vbena vbi e̱ke̱n sian vbi obia si uhi, daa amie̱ho̱n? ⁶ Elabi Ebraham "imie̱n Oise̱le̱bua ho̱n lai ri o̱hio̱ so̱i e̱ e̱ o̱in ovbi o̱ia le̱se̱n." ⁷ Gbo iyo̱ eni khi ele mie̱nho̱n e̱kie̱n ivbi Ebraham. ⁸ Eta si o̱hume̱me̱n e̱n khoto̱i khi Oise̱le̱bua lo̱ zi ekhe̱in Ijentai mo̱in amie̱ho̱n, lo̱ re̱ wewe vbie Ebraham re̱ o̱ o̱i, "Vbo̱hio̱ se̱ e̱ li umaikhuma ere̱me̱n lo̱ re mo̱i ihianba." ⁹ O̱hio̱ si o̱na, ele mie̱ho̱n ere̱me̱n lo̱ mo̱in ihianba debai Ebraham, lokie̱n o̱ia si amie̱ho̱n. ¹⁰ Agbo le di udu ain obia si uhi vbi ele ri vbi e̱ge̱in eo̱, iyio̱ lai vio̱in o̱vbotoi kho̱, "Ukhueo re̱yi o̱ia lo̱i rekha emi ere̱me̱n la vin o̱ vbi uhi, lo̱i gbo ri ain u." ¹¹ Ero̱ke nwuin e̱o kuere khi uhi kha meti nwuan kie̱n o̱lo̱fuain vbi sao si Oise̱le̱bua, erimidi amie̱ho̱n nikhi ukpode̱ o̱fuan. ¹² Uhi bi amie̱ho̱n ivbi o̱kpa, sokpe̱n, "Oia lo̱ bi obia si uhi lo̱ gbo e̱n ue̱n si uhi." ¹³ Kristi de main chiere, sho̱ vbi uvie̱nmi si uhi re lo̱re̱ regbe so̱i kie̱n o̱lakhue'e vbi o̱hio̱ main avio̱n khi, "Ukhueo re̱yi o̱ia li akhan yie̱n vbi o̱gbe̱n". ¹⁴ Lai re̱ mie̱n khi ihianba si Ebraham lo̱ re̱ si ekhe̱n Ije̱ntai egbe vbi e̱ke̱n Jesu Kristi, laire mie khi vbe̱ke̱n amie̱ho̱n mai meti mi Etin Lofuan la hi'i. ¹⁵ Imio̱nme̱n, ilo̱ ti eta ze̱n elabi o̱ia. Reyi ue̱n si mamai li agbo̱n, o̱ia iya vbi emi rai uhi re, elabai vio̱n o̱vbi oto̱i. ¹⁶ Ebraham bi uanmi so̱i li ahi ni. O̱itai khi, "Re̱yi uanmi ere̱me̱n," lokie̱in elo̱bun, sokpe̱n re̱yi iso̱i ukpo̱kpa, "Reyi uanmi se'e", lo̱kie̱in Kristi. ¹⁷ Emi li roita likhi. Uhi lo̱ ou kha mie ikpei egbo̱'ue-ikp'o̱gban ikpuokho, o̱ike zuan ke o̱i khi atamasi si Oise̱le̱bua li gheghe i'ke mo̱in o̱lo̱ri. ¹⁸ Akhai khi ae'vbuku o̱za vbi uhi vare, e̱ghe̱ ain o̱ike kie̱in emi la hi'i. Sokpe̱n Oise̱le̱bua ri o̱li ae'vbuku na ni Ebraham shian vbi uhimi. ¹⁹ Iyi emi uhi ke dewun vbi o̱le̱ghe̱? Emo̱n uhi rivbo vbi o̱hio̱ si afido̱n, o̱kpe̱se̱ khi uanmi si Ebraham lo̱'o̱u khi ahi ni. Emo̱in are̱u si uhi, obo̱ si ekhe̱n ehi la wuo̱io̱n, sokpe̱n o̱lo̱ re̱o khuo gbo rivbo̱. ²⁰ O̱lo̱ re̱ o khuo̱i na rai otuo̱kpa, sokpe̱n Oise̱le̱bua chie̱n okpa. ²¹ Eri uhi i kei deba uhimi isi Oise̱le̱bua? Iyo̱ ko̱ gbeigbei! Erimidi akha gbi uhi lai ro̱i mi aye, eghe ain o̱hume̱me̱ lo̱ zavbi uhi vare vbi o̱le̱ghe̱. ²² Sokpe̱n eta lavin o̱i khi emikhi emi lo̱ chie̱n o̱kho̱o̱ khi ighian li o̱lo̱'o. Oise̱le̱bua lo̱ uo̱i iyo̱ laimie̱n khi uhimi si amienfan mai khi avbi amie̱nho̱n o̱vbi egbe si Jesu Kristi lo̱ meti si elemie̱nho̱n egbe. ²³ O̱kpe̱se̱ khi amie̱ho̱n vare, mai chie̱n oghumi si uhi, mai chie̱n isighain se̱ vbi e̱ghe̱ la lo̱ re ri amie̱ho̱n vbie̱. ²⁴ Li uhi re̱ chie̱n o̱lo̱ re̱main shan se̱vbo̱ khi Kristi vare, li mai re̱ chie̱n o̱ lare̱ vbi ata vbi e̱ke̱n amie̱ho̱n. ²⁵ Eyian lo̱ o̱u khi amie̱ho̱n vare, mai ke chie evbi obo̱ si o̱o̱so lo̱re main shan. ²⁶ Ivbi Oise̱le̱bua nimain ke'u shan vbi amie̱ho̱n vbi egbe si Jesu Kristi ²⁷ O̱ia ikho̱ia vbi usee vba lo samen vbi eni si Kristi, uke ga obo̱ mie̱in Kristi. ²⁸ Aike mie̱n khi o̱na ikhi Jiu da Griki, aike mi o̱vie̱n da o̱lo̱foni, o̱mohe da o̱kposo, erimidi o̱kpa vba keu vbi Jesu Kristi. ²⁹ Ukha chie̱n isi Kristi, u chie̱n uanmi si Ebraham, u chie̱n o̱lo̱lo̱ u'uku elabi a'ihio̱ o̱vbi oto̱i.