1
NJe-koy-al, Ɓaɓe adɨ m-o nḛ mḛ ndɨl tɨ. Nḛ kɨ m-o e kandɨ kagɨ je kɨ e me kare tɨ.
2
Nɨngə dəjɨ-m ə nə: Amosɨ, e ri ə o ə? Ə m-ɨle tɨ m-ə nə, m-o kandɨ kagɨ je kɨ e me kare tɨ. Ɓa Ɓaɓe təl əl-m ə nə: dɔ kagɨlo lə dɨje ləm kɨ Ɨsɨrayəl tɨ ɨndə bəy nga. M-a m-ɨyə̰ go majal je ləde kɔ al ratata.
3
NJe-koy-al əl ə nə: me ndɔe tɨ kɨn, pa je kɨ me kəy ko̰-ɓe tɨ a təl tɨmə kɨ rusɨ rusɨ. Dɨje a ɓuki nɨn je kɨ dum tɨdə kɔrde kɔ kɨ lo lo. Lo a to ndɨngɨ!
4
Uri mbisi majɨ oi ta kɨn, səi kɨ ɨsi ɨndəi kəm mba je ndoo, səi kɨ ɨsɨ roi ta njé-ndoo je.
5
Ɨsɨ əli əi nə: ndɔ kɨ ra tɨ ə na̰y kɨ rangɨ a ɨndə man kadɨ jɨ gatɨ kɨ ko je ləje ə? Kadɨ ban tɨ ə ndɔ taa kə̰ə̰ a ɨndə man kadɨ jɨ tḛḛ ta dam je ləje ə? J-a jɨ təl kɨ ta nḛ mbɔjɨ nḛ je kɨ nangɨ, nɨngə ja j-ɨlə gate dɔ made tɨ tɔ. J-a j-un nḛ mbɔjɨ nḛ kɨ loe tɨ al yo, j-ədɨ-n kəm dɨje.
6
Go tɨ, j-a j-ɨ ndogɨ dangɨtɨ je kɨ la, ə ja jɨ ndogɨ njé-ndoo kɨ sa nja kare par, ə bɨnə ko ka j-a j-adɨ dɨje ndogi səje.
7
NJe-Koy-al ɨbɨ rɔnḛ kɨ rəbɨ tɔɓa lə Jakopɨ ə nə: kulə rade kare ka kɨ məm a oy dɔ tɨ al ratata.
8
Kulə rade je kɨn a tujɨ kɨ ɓe al a? Ə se dɨje kɨ mḛ ɓe tɨ pətɨ a əi mḛ kuwə ndoo tɨ al a? Ɓe kɨ tae ba a ḭ tə ba be. A ḭ kɨ taa tɔ a təl kɨ nangɨ tɔ tə ba kɨ Əjɨpɨtɨ tɨ be.
9
Nje-Koyal, Ɓaɓe əl ə nə: Me ndɔe tɨ kɨn m-a m-adɨ kadɨ a jam dɔ ɓe tɨ ba ɓəy ə ur, ə m-adɨ lo dɨbɨ dan kada ba.
10
M-a m-təl ndɔ rɔnəl je ləsi kadɨ təli ndɔ kuwə ndoo, pa rɔnəl je ləsi pətɨ a təli pa ndɨngə ndoo, m-a m-adɨ ɨdɔi mədɨsi je kɨ kulə kuwə ndoo je, m-a m-adɨ dɔsi je pətɨ a ngɔɔ ngɔtɨrɔ ngɔtɨrɔ. M-a m-adɨ ɓe ɨwə ndoo tə dəw kɨ nje kuwə ndoo ngon kɨ kare be, ə dɔ bəye a to tə ndɔ rɔ to-ndoo.
11
Oi ndɔ je a rəi no̰ kəl Ɓaɓe, NJe-Koy-al: M-a m-ɨlə kɨ ɓo dɔ ɓe tɨ, a e ɓo nḛ kuso al nɨm, ɓo kɨndə man al nɨm, nə a e ɓo ko dɔ ta lə Luwə.
12
Nɨngə dɨje a ḭ ba bo tɨ kɨ kare ndəmi tḛḛi e kɨ nungɨ tɨ. A ḭ kɨ no̰ ɓe tɨ tḛḛi kɨ lo kɨbə kadɨ tɨ, a njɨyəi dɔ na̰a̰ tɨ yo je kɨ ne je mba sangɨ ta lə Luwə nə lo kadɨ a ɨngəi goto.
13
NDɔe tɨ kɨn, ngan mandɨ je kɨ ngan basa je a oyi koy kɨndə.
14
Nɨngə ɨbi rɔde kɨ majal lə ɓe kɨ Samari əi nə: Kadɨ dɔ Luwə lə Dan e taa, kadɨ go rəbɨ lə Bərɨsəba e taa! Loe tɨ no̰o̰ a tosi nangɨ nə a ḭ taa al ratata.