¹ Nḛ kɨ Ɓaɓe, NJe-koy-al adɨ-m m-o me ndɨl tɨ ə to kɨn : Bətɨ je ɔsi rɔde kɨ naa tɨ naa tɨ. E dɔ kagɨlo kɨ wale je kɨ mbəl ɨsɨ ɨti. E wale kɨ ɨjəi dɔe nja kare kəte adi ngar. ² Nɨngə təkɨ ɨsɨ usoi wale je makɨ makɨ tɨgə dɔnang tɨ, m-no̰ m-ɓar Ɓaɓe m-ə nə: «Ɓaɓe, ɨyə̰ go majal lə dɨje kɨ gɨn kojɨ tɨ lə Jakobɨ. Re e be al ə a təli ri ə? Əi kɨn, əi dɨje kɨ əi ngay al. ³ Ɓaɓe, Nje-Koy-al təl yətɨ ndune ə nə : nḛ kɨn a ra nḛ al. ⁴ Ɓaɓe, Nje-Koy-al əl-m ta mḛ ndɨl tɨ ə nə : Ɓaɓe, Nje-Koy-al ɨlə kɨ por tə kɨndə kɔjɨ, adɨ por ro lo kɨ koo nɨm, lo ndɔr je nɨm. ⁵ M-əl m-ə nə : Ɓaɓe, NJe-koy-al, jai ba, a taa kə̰ə̰ : «Dɨje kɨ gɨn kojɨ tɨ lə Jakobɨ a təli ri ə? Əi kɨn, əi dɨje kɨ əi ngay al. ⁶ Ə NJe-Koy-al, Ɓaɓe təl yətɨ ndune ə nə : nḛ kɨn a ra nḛ al. ⁷ Ɓaɓe adɨ-m m-o nḛ kɨ rangɨ me ndɨl tɨ ɓəy: Ɓaɓe a dɔ kəy tɨ kɨ kulə mbɔjɨ kəy jine tɨ. ⁸ NJe-koy-al dəjɨ-m ə nə: E ri ə o ə Amosɨ? M-ɨle tɨ m-ə nə: m-o kulə mbɔjɨ kəy. Nɨngə Ɓaɓe əl ə nə m-a m-mbɔjɨ dɨje kɨ Ɨsɨrayəl kɨ kulə mbɔjɨ kəy, ma m-ɨyə̰ go majal je ləde kɔ al ratata. ⁹ M-a m-tujɨ kɨ lo gugɨ yo je lə Isakɨ, m-a m-bujɨ lo je kɨ ay njai lə Ɨsɨrayəl. M-a m-ḭ kɨ nḛ katɨ jim tɨ kadɨ m–ɨlə-n rɔ dɨje lə ngar Jorobowam. ¹⁰ Lo kɨn tɨ, Amatɨsiya kɨ nje kɨjə nḛ məsɨ kadɨ kare kɨ Betəl tɨ ɨlə kɨlə əl ngar kɨ bo kɨ Ɨsɨrayəl tɨ ə nə: Amosɨ ɨsɨ sangɨ rəbɨ kadɨ n-taa ko̰-ɓe kɨ Isɨrayəl tɨ jii tɨ. Kɨ ne kɨn, lo kadɨ dɨje me ɓe a ɨsi sie dɔ ta je tɨ kɨ tḛḛ tae tɨ kɨn goto. ¹¹ Tadɔ əl ə nə: a tɔli Jorobowam kɨ kɨyə rɔ, nɨngə dɨje kɨ Isɨrayəl a awi ɓəə lo kɨ rangɨ tɨ sa̰y kɨ ɓe ləde. ¹² Nɨngə Amatɨsiya əl Amosɨ ə nə ḭ nje koo nḛ mḛ ndɨl tɨ je kam, aw ɓe ləi Jude tɨ, ɨsɨ tɨ nu uso nḛ ə tə əl-n ta kɨ ta Luwə tɨ. ¹³ Ɓɨ a Betəl tɨ ne əl ta kɨ ta Luwə tɨ al. MBata Betəl e lo kɨ ay njay lə ngar nɨm e kəy lie nɨm tɔ. ¹⁴ Amosɨ ɨle tɨ ə nə: ma nje kəl ta kɨ ta Luwə tɨ al nɨm, m-a ngon lə nje kəl ta kɨ ta Luwə al nɨm tɔ, nə m-a nje kul da je kɨ nje mə kagɨ je kɨ ɓari-de sikomɔr. ¹⁵ Nje-koy-al ɔr-m go nḛ kul je tɨ ə əl-m ə nə: Aw əl ta kɨ tam tɨ kosɨ dɨje ləm kɨ Ɨsɨrayəl tɨ. ¹⁶ Ur mbi majɨ o-n ndu NJe-Koy-al, ḭ kɨ nje kəl kə nə dɨje əli ta kɨ ta Luwə tɨ ɔsi ta Ɨsɨrayəl al nɨm, ɔsi ta gɨn kojɨ lə Isakɨ al nɨm kam. ¹⁷ MBata ta ləi kɨn, NJe-koy-al əl ə nə: nḛi a təl dəne kɨ dɨje a sangi kaya tɨ, ngani je kɨ dəne kɨ kɨ dɨngəm a oyi koy ne katɨ, dɨje a mbɔji ndɔr ləi kɨ kulə kadɨ ka̰yḭ-naa, ə ḭ wa a oy dɔnangɨ tɨ kɨ to njḛ. Ɓa dɨje kɨ Ɨsɨrayəl tɨ a awi ɓəə sa̰y dɔ kɔ ɓe tɨ kɨ rangɨ.