¹ Kəm-to-ndoo e lə dɨje kɨ ɨsi majɨ me ɓe tɨ kɨ Sɨyo̰ kɨ njé kɨ ɨsi kɨ lapɨya dɔ mbal tɨ kɨ Samati. Səi kɨ əli əi nə səi ə səi dɨje kɨ njé tɔɓa dan gɨn ɓe je tɨ kɨ dɔso̰y, ə Isɨrayəl je awi kɨ rɔsi tɨ! ² Awi kɨ Kalme oi nḛ je kɨn, ḭḭ no̰o̰ awi bɨtɨ Amatɨ kɨ e ɓe kɨ boy oi, ɨtəli dɔsi awi Gatɨ rɔ dɨje tɨ kɨ Pɨlɨsɨti tɨ. Ɓebo je kɨn ndui ɨtə ɓe-ko̰ je ləsi kɨ joo kɨn a? Dɔnangɨ ləde tatɨ ɨtə dɔnangɨ ləsi a? ³ Oi kadɨ ɨsɨ ɔsi ndɔ kɨ majal ngərəngɨ, nə kadɨ be ɓəy ə ɨsɨ ɨrəi kɨ ko̰-ɓe kɨ lo tɔgɨ tɨ kɨ dɔsi tɨ. ⁴ Dɨje toi ɨsɨ ɔri kə̰ə̰ majɨ dɔ tɨrə je tɨ ləde kɨ rai kɨ ngangɨ kədɨ, surəi rɔde lo to je tɨ kɨ sɔl kṵy. Usoi ngan batɨ je kɨ ngan mangɨ je kɨ boi mbul mbul. ⁵ Dɨje osi pa je kɨ lo kɔjɨ rɔ tɨ kɨ nal je, ndaji gosɨ rai-e lə Dabɨdɨ, rai nḛ kosɨ pa je kɨ dangɨ dangɨ. ⁶ A̰yḭ-naa kasɨ njuu kɨ kal man je kɨ tade tatɨ, ɔyi rɔde kɨ yɨbɨ je kɨ majɨ majɨ. Tujɨ kɨ a ɨngə dɨje kɨ gɨn kojɨ tɨ lə Jɨsəpɨ kɨn to rɔde al. ⁷ E mbata kɨn ə, a əi kəte no̰ njé kaw ɓəə tɨ. Lo kɨn tɨ, pa rɔnəl ləde əi ko dɨjee kɨ kɔ kare kam a ɨndə ngangɨne. ⁸ Ɓaɓe, NJe-koy-al ɨbɨ rɔne, NJe-koy-al , Luwə lə njé-rɔ je əl nə: «Kɔjɨ rɔ lə Jakobɨ e nḛ kɨ to kadɨ m-o ta kəm tɨ al, m-ɔsɨ ta kəy ko̰-ɓe je lie, m-a m-ɨlə ɓe bo lie kɨ nḛ majɨ je kɨ me tɨ pətɨ ji njé ba̰ je tɨ. ⁹ Kɨn ə re dɨje na̰yḭ-naa dɔgɨ me kəy tɨ kɨ kare ə a oyi. ¹⁰ Lokɨ dəw madɨ ɨsɨ otɨ nɨn nojɨne je kɨ me kəy tɨ kadɨ aw ɨlə por, ə dəw kare kɨ tḛḛ ta yo tɨ e me kəy tɨ kɨ duni no̰o̰, ə dəje ə nə: «Dəw madɨ kɨ rangɨ e səi no̰o̰ ɓəy a? Ɓa e a ɨle tɨ ə nə : jagɨ, ɓa a a dɔ tɨ no̰o̰ ɨlə dɔ tɨ ɓəy ə nə: utɨ tai, tadɔ e kagɨlo kɨ kadɨ dəw ɓa-n tɔ NJe-koy-al al ngata. ¹¹ Tadɔ NJe-koy-al un ndune ə nə n-a n-tətɨ kəy kɨ boy nangɨ, ə n-a n-adɨ ngon kəy budɨ rukɨ rukɨ tɔ. ¹² Kadɨ m-dəjɨ səsi m-o se sɨndə je a a̰yḭ-naa ngɔdɨ dɔ kɔkɨrɔ tɨ kare wa? Se dəw a ndɔr kɨ mangɨ je dɔ kɔkɨrɔ tɨ kare wa? Re e be al ə ra ban ə səi je uni nḛ kɨ rugɨ ɔri to nḛ kɨ dana ə? Ra ban ə uni nḛ kɨ majal ɔri to nḛ kɨ rɔjetɨ wa? ¹³ Səi ɨsɨ rai rɔnəl dɔ Lodɨbar tɨ kɨ e nḛ kɨ dae goto. Səi əli əi nə: e kɨ tɔgɨsi ə ɨtaai Karnayɨm. ¹⁴ E mbata kɨn ə NJe-koy-al Luwə lə njé-rɔ je əl-n ə nə: səi dɨje kɨ Isɨrayəl tɨ, m-a m-adɨ gɨn ɓe madɨ ḭ dɔsi tɨ ɨndə kəmsi ndoo, ɨlə ngɨre Amatɨ kɨ a jam dɔ ɓe tɨ ləsi un-n go wol bɨtɨ Araba kɨ a gɨn ɓe tɨ.