¹ Səi dɨje kɨ Isɨrayəl, uri mbisi majɨ oi ta kɨn, ta ndɨngə rɔ kɨ m-əl m-ndɨgə-n rɔm dɔsi tɨ kɨn. ² Isɨrayəl kɨ to tə ngon kɨ mandɨ kɨ gər dɨngəm ɓəy be kɨn osɨ. A təl ḭ taa gogɨ al. Osɨ to nangɨ palala, dəw kɨ nje kune taa goto. ³ Tadɔ ta kɨ tḛḛ ta Ɓaɓe, NJe-koy-al tɨ ɔjɨ dɔ dɨje kɨ Isɨrayəl ə to kɨn : «Ɓe kɨ kəte ɓukɨ dɨje dɨbɨ kare ta rɔ tɨ, ɓa a na̰yḭ-naa ɓu kare ba, ə e kɨ ɓukɨ dɨje ɓu kare ta rɔ tɨ, ɓa a na̰yḭ-naa dɔgɨ ba.» ⁴ Ta kɨ NJe-koy-al əl dɨje kɨ Isɨrayəl ə to kɨn: «Re ɨsangi mi ɓa, koy a ɔdɨ kadɨsi al. ⁵ Ɨsangi lo Betəl tɨ al, awi Gilgal tɨ al, uni rəbɨ kɨ Betɨsəba tɨ al. Tadɔ Gilgal a aw ɓəə ə Betəl a goto kɔ tɔ. ⁶ Ɨsangi NJe-koy-al ɓa koy a ɔdɨ kadɨsi al. Re e bə al ə, NJe-koy-al a adɨ nḛ kɨ to osɨ dɔ gɨn kojɨ tɨ lə Jɨsəpɨ tə por be. Nḛ kɨ a to tə por be kɨn, dəw kɨ ɨsɨ Betəl tɨ kɨ a asɨ kadɨ tɔl pore goto. ⁷ Səi kɨ njé kun nḛ kɨ atɨ bangɨ ɨmbəli nḛ ra kɨ go rəbe tɨ, kɨ njé tɨbə nḛ ra kɨ dana nangɨ mbayla mbayla. ⁸ E kɨ tɔ nə NJe-koy-al ə ra mḛḛ je kɨ ɓari-de ngan mandɨ rungɨru je kɨ mḛḛ dɔgɨ. E ə un lo kɨ tɨjə mbəl-n lo kɨ ndul, adɨ tɨl utɨ dɔ lo kɨ kada ɓa lo dɨbɨ. NDɔr man ba adɨ ləl un dɔnangɨ kɨ tutɨ. ⁹ Adɨ dɨje awi way dɔ njé tɔgɨ je tɨ, təti ndogɨ bɔr je kɨ taa dɔde kɨ nangɨ. ¹⁰ Lo gangɨ ta tɨ, dɨje ɔsi ta dəw kɨ nje kɨlə jine dɔ nḛ rade tɨ kɨ majal, ə uwəi dəw kɨ nje kəl ta kɨ rɔjetɨ mede tɨ. ¹¹ Səi, ɨmbumlui dangɨ tɨ, nɨngə ɨtaa ko kuso taa kadɨ ɨgangii ta lie. Ɨndəi kəy je kɨ nga̰a̰ nga̰a̰, nə a ɨsi me tɨ al, ɨmai njuu kɨ ɨl riri, nə a a̰yḭ-naa kase al. ¹² MBata m-gər majɨ, nḛ tɔl ləsi dum kɨdə kɔre, majal je ləsi oji-naa kɨ dɔ tɨ dɔ tɨ, ɨndəi kəm dəw kɨ nje ra nḛ kɨ dana ndoo, ɨtaa nḛ ji dɨje tɨ utii kəmsi dɔ nḛ rade je tɨ kɨ majal. Ta kəy tɨ taga nu ɓəy ɓa, uti ta lə nje ndoo mee tɨ. ¹³ E mbata kɨn ə, dɔ kagɨlo je tɨ kɨ be kɨn, dəw kɨ nje gosɨ ɨlə tane naa tɨ waw, tadɔ e kagɨlo kɨ majal. ¹⁴ Ɨsangi go majɨ kɨ ra ə ɨyə̰i go majal kɨ ra kɔ mba kadɨ ɨsii kɨ dɔsi taa, ɓa NJe-koy-al lə, Luwə lə njé ro je a e naa tɨ səsi təkɨ əlii kɨn. ¹⁵ Ɔsi ta majal ə ɨndɨgi majɨ. Adi ta kɨ gangɨ kɨ go rəbe tɨ to ta kəy gangɨ ta tɨ. Dɔ majɨ ə NJe-koy-al lə, Luwə lə njé ro je a oo kəm-to-ndoo lə ndəgɨ dɨje kɨ gɨn kojɨ tɨ lə Jɨsəpɨ. ¹⁶ E be ə, NJe-koy-al lə, Ɓaɓe Luwə lə njé ro je əl-n ə nə: «Dɨje a ndɨngəi rɔde kɨ lo je pətɨ. Dɔ rəbɨ je tɨ pətɨ, dɨje a əli əi nə: nḛ nja ndo, nḛ nja ndo. A ɓari nje ndɔr lo kuwə ndoo tɨ, ə a ɓari gosɨ je lo no̰ ndoo tɨ. ¹⁷ NJe-koy-al əl ə nə: lokɨ m-a də dansi tɨ ɓa, no̰ ndoo a ɓa kɨ lo lo me ndɔr njuu je tɨ. ¹⁸ Nḛ kəm-to-ndoo e dɔ dɨje tɨ kɨ ndɨngəi ndɔ lə NJe-koy-al. E ri ə ɨsɨ ngɨnəi kadɨ a oi me ndɔ tɨ lə NJe-koy-al ə? A e lo kɨ ndul kururu ɓɨ a e kunjɨ al. ¹⁹ Səi a toi tə dəw kɨ ɓɔl ngɔde ɓa re daa dɔne dɔ da tɨ kɨ ɓari-e ursɨ kɨn be. Lokɨ re tḛḛ ɓe, ɨndə jine kadɨ bɔr tɨ ɓa li tɨgə jie ɓəy. ²⁰ Oi majɨ kadɨ ndɔ lə NJe-koy-al e tɨl ɓɨ a e kunjɨ al, e lo kɨ dɨbɨ ɓɨ e lo kɨ ay al. ²¹ M-ɔsɨ ta ndɔ na̰y je ləsi nɨm, m-kɨdɨ-de nɨm tɔ. M-ɔsɨ lo kɨngə-naa je ləsi ngərəngɨ kɔ. ²² Re ɨrəi kɨ kadɨ-kare je ləsi kɨ ro por rakɨ rakɨ ə se ndəgɨ nḛ je kɨ kare no̰o̰ ka, rɔm nəl-m dɔ tɨ al. Taa re ɨrəi kɨ ngan mangɨ je kɨ rɔde to mbul mbul kɨ ɨtɨjəi mɨndɨde tə kadɨ-kare majɨ kɨ m-ra səsi no̰o̰ ka, m-un kəm dɔde tɨ kɔ. ²³ Awi sa̰y kɨ ndu pa je ləsi. M-Bim a oo ndu təbɨ nal je ləsi al. ²⁴ Nə kadɨ nḛ ra kɨ dana to rɔsi tɨ tə man kɨ ɨsɨ ləl be, ə kadɨ nḛ ra kɨ go rəbe tɨ to tə ngur man kɨ ii al kam be. ²⁵ Səi ngan Isɨrayəl je, kɨ ndɔkɨ ɨrai ɓal kutɨ sɔ dɔ dɨləlo tɨ kɨn, e nḛ kul ə se e kandɨ nḛ ndɔr ə adi-mi kadɨ-kare tɨ ə? ²⁶ Səi toi ta kotɨ yo tɨ kɨ ɨrai tə ngar ləsi, kɨ kagɨ-yo je kɨ ɨtɔli, kɨ mee kɨ rai-de kɨ jisi. ²⁷ NJe-koy-al kɨ tɔe e Luwə lə njé-rɔ je əl ta kɨn be: M-a m-adɨ awi ɓəə gɨdɨ ɓe tɨ kɨ Damasɨ sa̰y.