¹ M-o Ɓaɓe dɔ ndɨngɨri tɨ əl ə nə: Ɨndə jam dɔ kəy ə kadɨ dɔ kume je budɨ nangɨ. Ɨtətɨ-de dɔde tɨ rukɨ rukɨ. M-a m-tɔ ko ndənge je kɨ nḛ katɨ. Dəw kɨ dande tɨ kɨ a a̰y kadɨ taa rɔne goto, dəw kɨ a tḛḛ ta tɨ goto. ² Re uri awi koo ka m-a m-ndɔr-de tə m-tḛḛ səde, re ali awi dɔra̰ tɨ ka, m-a m-təl tə m-re səde nangɨ. ³ Re awi ɓɔyɔi rɔde dɔ mbal Karməl tɨ ka, m-a m-sangɨ-de tə m-uwə-de. Kɨn ə re lɔbi rɔde kɔ ta kəm tɨ awi gɨn ba tɨ ka, m-a m-adɨ ndum li je kadɨ to̰i-de. ⁴ Re awi adi rɔde njé ba̰ je ləde ɓəə tɨ ka, m-a m-adɨ nḛ katɨ je toi kode. Kəm a e gode tɨ kadɨ m-ra səde nḛ kɨ to, ɓɨ nḛ kɨ majɨ al. ⁵ Ɓaɓe, NJe-koy-al lə njé-rɔ je ɔdɨ dɔnangɨ ə dɔnangɨ yəkɨ, nɨngə dɨje pətɨ kɨ me tɨ uwəi ndoo. Dɔnangɨ a ḭ kɨ tae aw kɨ taa tɔ a təl kɨ nangɨ tɔ tə ba kɨ Ejɨpɨtɨ tɨ be. ⁶ Ɓaɓe ɨndə kəy kɨsɨne dɔra̰ tɨ taa, ɓa ra dɔnangɨ tə natɨ kɨse mba̰ngɨ lie tɔ. NDɔr man ba je adɨ ɨlə taai dɔnangɨ. Tɔ Ɓaɓe e NJe-koy-al. ⁷ Səi Isɨrayəl je, səi dɨje ləm tə ngan kojɨ je kɨ Etɨyopi tɨ be al a? Se e mi ə m-tḛḛ səsi ɓəə tɨ Ejɨpɨtɨ tɨ tə dɨje kɨ Pɨlɨsɨti tɨ lə Kapɨtɔr ə se dɨje kɨ Sɨri tɨ lə Kɨr be al a? ⁸ Oi Ɓaɓe, NJe-koy-al ɔsɨ kəmne dɔ ko̰-ɓe tɨ kɨ ta e dɔe tɨ. Nɨngə əl ə nə: m-a m-tuje kɔ dɔnangɨ tɨ. Nə re e be ka, m-a m-tujɨ gɨn kojɨ lə Jakobɨ pətɨ al. ⁹ Oi, m-a wa m-a m-un ndum, nɨngə m-a m-sɨyə ɓe kɨ Isɨrayəl dan ɓe je tɨ pətɨ kɨ dɔnangɨ tɨ ne. M-a m-sɨye təkɨ dəw a sɨyə-n ka̰ nḛ kɨ yate kɨ kanjɨ kadɨ tḛḛ bole tɨ osɨ kam be. ¹⁰ Dɨje pətɨ kɨ njé ra majal dan dɨje tɨ ləm, a oyi koy nḛ katɨ. Adɨ e njé kɨ ɨsɨ əli əi nə: tujɨ a tḛḛ dɔde tɨ al nɨm, a ndətɨ kadɨde al nɨm. ¹¹ Dɔ kagɨloe tɨ kɨn, m-a m-un ɓe lə Dabɨdɨ kɨ osɨ kɨ taa, m-a m-utɨ bole bɔr je kɨ ta̰, m-a m-ra lo je kɨ tətɨ, m-a m-təl m-ɨnde kadɨ to majɨ təkɨ kəte be gogɨ. ¹² NJe-koy-al kɨ nje tɔl kɔn nḛ je əl ə nə: E be mba kadɨ dɨje lə Dabɨdɨ taai ndəgɨ ɓe kɨ Edom kɨ ndəgɨ ɓe je kɨ tɔm ɓa tɨ. ¹³ NJe-koy-al əl ə nə: Oi ndɔ je ɨsɨ rəi no̰o̰ kadɨ nje ndɔr a njɨyə ɓasi go nje kɨjə ko tɨ, ə nje mbɨsə kandɨ njuu a njɨyə ɓasi go nje naje tɨ. Lo kɨn tɨ, man njuu a lo ḭ dɔ mbal je tɨ taa tuwə kade je kɨ nangɨ. ¹⁴ M-a m-təl kɨ dɨje ləm kɨ Isɨrayəl kɨ awi ɓəə kadɨ m-re səde gogɨ. A təli rai ɓe bo je kəi əi nduwə lo kɨn kadɨ ɨsi tɨ. A ndɔri njuu je kadɨ a̰yḭ-naa kase. A ndɔri nḛ je kɨ dangɨ dangɨ kadɨ usoi kandɨde. ¹⁵ NJe-koy-al Luwə əl ə nə: m-a m-ɨndə-de me ɓe tɨ ləde, nɨngə ɓe kɨ m-a m-adɨ-de kɨn, dəw a tuwə-de tɨ al ratata.