¹ Uri mbisi majɨ oi ta kɨ mi NJe-koy-al m-əl m-ra-n səsi ta, səi ngan Isɨrayəl je. Ta kɨn sɔbɨ dɔsi səi gɨn kojɨ je pətɨ kɨ ndɔkɨ m-tḛḛ səsi me ɓe ɓəə tɨ Ejɨpɨtɨ tɨ. ² Səi kɨ karsi ba ə m-kɔtɨ səsi dan gɨn dɨje tɨ pətɨ kɨ dɔnangɨ tɨ ne. E mbata kɨn ə m-a m-ɨndə səsi kɨndə kɔjɨ mba majal je pətɨ kɨ ɨrai. ³ M-dəjɨ səsi m-o se dɨje joo a njɨyəi naa tɨ kɨ kanjɨ kadɨ mɨndɨde osɨ gonaa tɨ wa? ⁴ Ɓɔl a no̰ mḛ kutɨ kɨ kanjɨ kadɨ uwə nḛ wa? NGon ɓɔl a no̰ lo tone tɨ kɨ kanjɨ kuwə nḛ wa? ⁵ Yəl a ur me bandɨ tɨ kɨ to nangɨ kare kɨ kanjɨ kadɨ dəw ɨyə wa? Bandɨ a ɔdɨ rɔne kɨ kanjɨ kadɨ nḛ ur me tɨ wa? ⁶ Təw rɔ a ɓa me ɓe tɨ kɨ kanjɨ kadɨ me dɨje gangɨ man wa? Nḛ kɨ to a osɨ me ɓe tɨ kɨ kanjɨ kadɨ NJe-koy-al e nje gɨne wa? ⁷ Tadɔ Ɓaɓe, NJe-koy-al a ra nḛ madɨ kɨ kanjɨ kadɨ tḛḛ kɨ dɔe adɨ ngan njé kɨlə je lie kɨ əi njé kəl-ta kɨ tae tɨ al. ⁸ Na ə ɓɔl no̰ ə ɓəl rae al ə? Na ə Ɓaɓe, NJe-koy-al ɨndə ta ləne tae tɨ ə a mbatɨ kaw kəl ə? ⁹ To kadɨ dɨje uni ndude əli ta kɨ taa me kəy ko̰-ɓe je tɨ kɨ Asɨdodɨ kɨ əi kɨ Ejɨpɨtɨ tɨ əli əi nə: «Ɨkawi-naa dɔ mbal je tɨ kɨ Samari, ə oi nḛ kɨ tɨlə-naa tɨ kɨ kadɨ-naa ko̰ kɨ to kɨn. ¹⁰ NJe-koy-al əl ta kɨn be ə nə: «Əi dɨje kɨ gəri nḛ ra kɨ dana al, kawi nḛ je lə dɨje kɨ taai jide tɨ kɨ lo tɔgɨ tɨ kɨ lo kaya tɨ. ¹¹ E mbata kɨn ə Ɓaɓe, NJe-koy-al əl-n ə nə: «NJe-ba̰ a a taa ɓe ləi, a tətɨ sɨngəi, nɨngə a kəə nḛ je kɨ me kəy ko̰-ɓe tɨ ləi. ¹² NJe-koy̰-al əl ta kɨn be: « Tə ka kɨ nje nḛ kul a nagɨ-n nja nḛ kul ləne ə se mbie ta ɓɔl tɨ taa ka kɨn ə, dɨje kɨ Isɨrayəl tɨ a ajii rɔde lo kɨsɨde tɨ kɨ lo tode tɨ kɨ sɔl kṵy me ɓe tɨ Samari. ¹³ Uri mbisi oi ta kɨn majɨ ə əli tae me kəy tɨ lə Jakobɨ. E ndu Ɓaɓe, NJe-koy-al, Luwə lə njé-rɔ je o to kɨn. ¹⁴ NDɔ kɨ m-a ɨndə dɨje kɨ Isɨrayəl tɨ kɨndə kɔjɨ mbata nḛ tɔl je ləde kɨ dum kɨdə kɔre, m-a m-ɨndə jim dɔ dɨngɨri yo je tɨ kɨ Betəl, m-a m-tɔsɨ sɨle je m-tətɨ kadɨ tosi nangɨ. ¹⁵ NJe-koy-al əl ta kɨn be ə nə: «M-a m-budɨ kəy je kɨ rai-de mba na̰y kul kɨ njé kɨ rai mba na̰y kadɨ. Kəy ko̰-ɓe je kɨ rai-de kɨ ngangɨ kədɨ ka a budi nangɨ; nɨngə kəy lə njé tɔɓa je a təni jɨpɨ.»