¹ NJe-koy-al əl ə nə: «MBata nḛ tɔl kɨ ko̰ mɨtə ə se kɨ ko̰ sɔ wa lə dɨje kɨ Mowabɨ, m-a m-yətɨ ndum kɨ m-un kɨn al. Tadɔ roi por sɨngə ngar kɨ Edom tɨ adɨ nətɨ kurɨm. ² M-a m-ɨlə kɨ por dɔ ɓe tɨ kɨ Mowabɨ kadɨ ro kəy ko̰-ɓe je kɨ Kərɨjotɨ. Nɨngə m-a m-adɨ ta dɨje kɨ Mowabɨ tɨ tḭḭ dan kɔl tɨ kɨ bɨlə tɨ ta rɔ tɨ, kɨ dan təbɨ rɔ tɨ kɨ ɓa kɨ taa be. ³ M-a m-tujɨ kɨ nje gangɨ ta dande tɨ, taa m-a m-tɔl ngan ngar je kɨ əi sie. E kɨn e ndu NJe-koy-al. ⁴ NJe-koy-al əl ə nə: «MBata nḛ tɔl kɨ ko̰ mɨtə ə se kɨ ko̰ sɔ wa lə dɨje kɨ Jude, m-a m-yətɨ ndum kɨ m-un kɨn al. Tadɔ mbati ndu-kun ləm nɨm, ɔdi al kadɨ təli rɔde go ndu je tɨ kɨ m-adɨ-de. Adi kagɨ-yo je kɨ əi nḛ je kɨ ngom kɨ ndɔkɨ bawde je uni gode kɨn ɓuki-de wale. ⁵ M-a m-ɨlə kɨ por dɔ ɓe tɨ kɨ Jude kadɨ ro kəy ko̰-ɓe je kɨ Jorɨjaləm tɨ kɔ. ⁶ NJe-koy-al əl ə nə: «MBata nḛ tɔl kɨ ko̰ mɨtə ə se kɨ ko̰ sɔ wa lə dɨje kɨ Isɨrayəl tɨ, m-a m-yətɨ ndum kɨ m-un kɨn al. Tadɔ uwəi dəw kɨ ta goto dɔe tɨ ndogi-e ɨngəi la, uwəi nje ndoo taai sa kɨ nja tɨ kare. ⁷ Kɨlə rade e rogɨ njé kəm-to-ndoo je bu tɨ kɨ lo kadɨ ɔri dɔde taa goto. Gangi ta lə njé kəm-to-ndoo je kɨ go rəbe al. NGon əi kɨ bawne joo pu sangi ngon mandɨ kɨ kare ba mba kadɨ tujii kɨ tom kɨ e tɔ ndam al. ⁸ Labi kɨbɨ je lə dɨje kɨ uwəi kɨrə tɨ no̰ dɨngɨri ra yo je tɨ ləde, ə me kəy kagɨ-yo je tɨ ləde, a̰yḭ-naa kasɨ kɨ taai ji dɨje tɨ kɨ gangi ta dɔ tɨ. ⁹ To kadɨ re a rai nḛ kɨn be al, tadɔ, mi, m-tujɨ kɨ dɨje kɨ Amoritɨ tɨ kɔ no̰de tɨ. Əi dɨje kɨ ngali taa sa̰y tə kagɨ kɨ ɓari-e sedɨrə kɨn be, ə se tɔgɨde e nga̰y tə kagɨ kɨ ɓari sən be, nə m-tujɨ-de ḭ kandɨde tɨ taa m-re-n ngɨrəde nangɨ. ¹⁰ Re a e be al, tadɔ mi, m-ɔr səsi me ɓe ɓəə tɨ Ejɨpɨtɨ tɨ m-tḛḛ səsi, m-ɔr no̰si ɓal kutɨ sɔ dɨləlo tɨ, bɨtɨ kadɨ m-taa dɔnangɨ lə dɨje kɨ Amoritɨ m-adɨ səsi. ¹¹ M-ra m-adɨ dan ngansi je tɨ, kɨ madɨ je təli njé kəl-ta kɨ tam tɨ, ə m-adɨ kɨ madɨ je dan basa je tɨ ləsi e kɨ kɨndə ta dangɨ mbata kɨlə ləm. E be ə se e be al, ngan Isɨrayəl je? E ta kɨ NJe-koy-al dəjɨ. ¹² Səi, adi njé kɨ e kɨ kɨndə ta dangɨ mbata kɨlə ləm a̰yḭ-naa kasɨ njuu! Adi ndu njé kəl-ta kɨ tam tɨ əi nə: Dəw a əl ta kɨ ta Luwə tɨ al! ¹³ Nɨngə kɨ ne kɨn kadɨ oi, m-a m-rəkɨtə səsi təkɨ pusɨ kɨ oy ko rosɨ rəkɨtə-n nḛ je nangɨ kɨn be. ¹⁴ Dəw kɨ rɔe ɔle pəl pəl ka asɨ kadɨ a̰y al nɨm, dəw kɨ tɔge e nga̰y ka asɨ kadɨ ra-n nḛ madɨ al nɨm, dəw kɨ e go̰ rɔ ka asɨ kadɨ a tḛḛ ta rɔ tɨ al nɨm. ¹⁵ Dəw kɨ nje rɔ kundɨru majɨ ka asɨ kadɨ a ta rɔ tɨ al, dəw kɨ njae ɔle kəl ka njae a taa rɔe al, taa nje sɨndə ka asɨ kadɨ a̰y ajɨ rɔne al tɔ. ¹⁶ NJe-koy-al əl ə nə: Go̰ rɔ kɨ ngay ɨtə madɨne je ka ndɔe tɨ a a̰y kɨ gɨne kare.