^{1 2} 1. ಪುದಿ ಆಕಾಶನ ಪುದಿ ಭೂಮಿನ ನಾನು ಪಾತೆ ;ಮುನಿಕ್ರ ಆಕಾಶ ಮುನಿಂದ ಭೂಮಿ ನಾಶವಾಸು ;ಇನ್ನೂ ಸಮುದ್ರ ಇಕ್ದುಲ್ಲ . 2. ಇದಲ್ಲದೆ ಪರಲೋಕತಿಂಡು ಪರಿಶುದ್ದ ಪಟ್ಟಣವಾನ ಪುದಿ ಯೆರುಸಲೆಮ್ ದೌರ್ ಅನ್ಚ್ ಗು ಈಗ್ಜು ವರಾತ ಯೋಹನ ಇಗ್ರ ನಾನು ಪಾತೆ ;ಅದು ತಟ್ಟು ಮದು ಮೌವ್ ಕಾಯಿ ಅಲಂಕೃತಳ ಮದು ಕನ್ನಿಕೆಯಾಯಿ ಸಿದ್ದವಾಸು. ^{3 4} 3. ಇದಲ್ಲದೆ ಪರಲೋಕತ್ಕುರು ಇಂಡು ವಂದ ಮಹಾ ಶಬ್ದನ ನಾನು ಕೊಟೆ .ಅದು ಇಗೋ ದೌರ್ ಗುಡಾರ ಮನುಷ್ಯ ರೆಂಟಿ ಇದು .ಅದು ಅಲ್ ಎಂಟಿ ವಾಸಸೈಯಾಕು .ಆಗ್ಯ ಆತ್ರ ಪ್ರಜೆಯಾಯಿಕಾಕ್ನು ;ದೌರು ಅಲ್ ಎಂಟಿ ಇಕಾಕು ,ಇದಲ್ಲದೆಅದು ಅಲ್ ಟ ದೌರು ಹಾಯಿಕಾಕು . 4. ದೌರು ಅಲ್ಟ ಕನ್ನೆರ್ನ ತೋಡ್ ಕ್ಯಾಕು .ಇನ್ನು ಮರಣ ಇಕ್ದುಲ್ಲ .ಇನ್ನು ದುಃ ಖ ವಗೋಟು ಗೋಳಾಟವಗೋಟು ನೋಪಿಯಗೋಟು ಇಕ್ದುಲ್ಲ .ಮುನಿಕ್ರದು ಅದಿನು ಇಲ್ಲದೆ ಹೊಸು ಇಂಡು ಸೋನ್ಸು. ^{5 6} 5. ಅಪೋದು ಸಿಂಹಾನ ಮೇನಿ ಉಕೊಂಡಿಂದದು –ಇಗೋ ,ಆದಿನು ಪುದ್ಯಾತ ಸೈಯರೇ ಇಂಡುಸು .ಅದು ನಂಕು ಈ ಓಕು ಸತ್ಯವಾನದು ನಂಬುರ್ಕು ತಕ್ಕದು ಆಯಿದು ವರಿ ಇಂಡು ನಂಕು ಸೋನ್ಸು . 6. ಇದಲ್ಲದೆ ಅದು ನಂಕು ಆದಿ ಮುಗ್ಜೋಸು .ನಾನು ಅಲ್ಪನೂ ಓಮೇಗನು ಆದಿ ಅಂತ್ಯ ಆಯಿರೆ .ದಾಹಯಿಕ್ರತ್ಗು ಜೀವುತ ತನ್ನಿನ ಉಚಿತವಾಯಿ ನಾನು ಕುಡ್ ಕಾರೆ. ^{7 8} 7. ಜಯ ಹೊಂದ್ರದು ಆದಿಕು ಬಾದ್ಯ ನಕ್ದು ;ನಾನು ಅತ್ಗು ದೌರ್ ಆಯಿಕಾರೆ .ಅದು ನಂಕು ಮೌವಯಿಕಾಕು . 8. ಆನೇಕೆ ಭಯಗ್ರಸ್ಥನು ,ನಂಬಿಕೆಯಿಲ್ಲರದು ,ಅಸಹ್ಯರು ,ಕೊಲೆಗಾರರು ,ಜಾರರು ,ಮಾಟಗಾರರು ,ವಿಗ್ರಹಾರದಕಾರು ಆದಿ ಸುಳ್ಳುಗಾರರು ಇಲ್ಕಿ ಸಿಕ್ರ ಪಾಲು ನೆರ್ಪು ಗಂಧಕ ಉರಿರ ಕೆರೆಯೇ ;ಅದು ರಾಂಡ್ ನೆ ಮರಣ ಇಂಡು ಸೋನ್ಸು. ^{9 10} 9. ಕಡೆ ಓಗು ಉಪದ್ರವತಿಂಡು ಮೇತಿಂದ ಓಗು ಪಾತ್ರೆನ (ಡಬ್ರಿನ )ಓಗು ಮಂದಿ ದೂತರ್ಕುರು ವಂಡು ವಂದು ನನ್ನೇಟಿ ವಾಸೇತ –ಇಟ್ಗು ವಾ ,ಕುರಿಯಾದತಂಕು ಪಡ್ ಅಗ್ರ ಮದು ಕನ್ನಿಕೆನ ನಿಂಕು ಕಟಾರೆ .ಇಂಡು ಸೋನ್ಸು . 10. ಅದು ಆತ್ಮ ತ್ಕುರು ನಾನೇತೆಯ ಎತ್ತರವಾನ ಬೇಟ್ಟ ಪೆಚ್ ಗೊಂಡು ಹೊಯಿ ಪರಲೋಕ ಉಳಿಂಡು ಪರಿಶುದ್ದವಾನ ಯೆರುಸಲೆಮ್ ಇಗ್ರ ಆ ಬೇರ್ ಪಟ್ಟಣ ದೌರ್ ಜಯಿಂಡು ವರ್ರ ತೇಯ ನಂಕು ಕಟ್ಸು. ^{11 12 13} 11. ಅತ್ಕುರು ದೌರ್ತ ಮಹಿಮೆ ಇಂಚು ಪಟ್ಟಣ ಪ್ರಕಾಶ ಆಮೂಲ್ಯವಾನ ಕೆಲ್ಲುತ ಪ್ರಕಾರತ್ಗು ಸಮವಾಯಿಂಚು ;ಅದು ಸೂರ್ಯನ ಕಾಂತತಿರ್ಲಿ ಥಳಥಳಸುತ ಇಂಚು . 12. ಆ ಪಟ್ಟಣತ್ಕು ಶ್ಯಾನ ಎತ್ತರವಾಯಿಂದ ಗೋಡೆ ಇಂಚು ;ಅತ್ಗು ಪಾನ್ ನೆಂಡು ಮುನ್ ವಸ್ಲು ಇಂಚು ;ಆ ವಾಸ್ಲ್ ಆಂಚುಗು ಪನ್ನೆಡು ಮಂದಿ ದೂತರು ಇಂಚುನು ;ಅತ್ ಮೇನಿ ಇಸ್ರಾಯೆಲರ ಪನ್ನೆಂಡು ಗೊತ್ರತ ಪೇರು ವರ್ಜಿಂಚು . 13. ಪೂರ್ವ ದಿಕ್ಕುಕುರು ಇಂದ ಮೂಡು ಮುನ್ ವಸ್ಲು .ಉತ್ತರತ್ಕುರು ಮೂಡು ಮುನ್ ವಸ್ಲು ,ದಕ್ಷಿಣ ದಿಕ್ಕುಕುರು ಮೂಡು ವಸ್ಲು ಇಂಚು ಪಶ್ಚಿಮ ದಿಕ್ಕು ಕುರು ಮೂಡು ವಸ್ಲು ಇಂಚು. ^{14 15} 14. ಪಟ್ಟಣತ ಗೋಡೆಕಿ ಪನ್ನೆಂಡು ಅಸ್ತಿವಾರ ಇಂಚು ;ಅತ್ರ ಮೇನಿ ಕುರಿಯಾದತನ ಪನ್ನೆಂಡು ಮಂದಿ ಅಪೋಸ್ತಲರ ಪೇರು ಇಂಚು . 15. ನಾನೇನ್ ಟಿ ವಾಸೇತ ಇಂದಾದು ಆ ಪಟ್ಟಣತ ಆತ್ರ ಮುನ್ ವಾಸುಲ್ನ ಅಳತೆ ಸೈಯಿರ್ಕು ಚಿನ್ನತ ಅಳತೆ ಕೊಲನ್ನ ಪುಡ್ ಸಿಂಚು. ^{16 17} 16. ಪಟ್ಟಣ ಚಚೌಕವಾಯಿದು ;ಅತ್ರ ಉದ್ದ ಅತ್ರ ಅಗಲದಷ್ಟಿದು .ಅದು ಆ ಪಟ್ಟಣನ ಕೊಲಿಂಡು ಅಳತೆ ಸೆಂಚು .ಅಳತೆ ಪನ್ನೆಂಡು ನೂರು ಮೈಲಿ ಅಸ್ಸು .ಅತ್ರ ಉದ್ದ ಅಗಲ ಎತ್ತರ ಸಮವಾಯಿಂಚು . 17. ಅತ್ರ ಗೋಡಾತೆಯ ಅದು ಅಳತೆ ಸೆಂಚು ;ಅದು ನೂರನಾಡ್ ರುಕಪತ್ತು ನಾಲು ಮೊಳ ದಷ್ಟಿಂಚು .ಈ ಲೇಕ್ಕತ್ಕುರು ಮನುಷ್ಯಮನುಷ್ಯನ ಮೊಳ ಅಂಡೆಕೆ ದೂತನ ಮೊಳ. ^{18 19 20} 18. ಆ ಗೋಡೆತ ಕಟ್ಟಡ ಸೂರ್ಯನಕಂತಕನ್ನಿ ಇಂಚು ;ಪಟ್ಟಣ ಶುದ್ದ ಗಾಜ್ ಕನ್ನಿ ಇಂದ ಸೋಸಿಂದ ಭಂಗಾರ . 19. ಪಟ್ಟಣತ ಗೋಡೆತ ಅಸ್ತಿವಾರ ಸಕಲ ವಿದವಾನ ಅಮೂಲ್ಯ ಕೆಲ್ಲಿಂಡು ಅಲಂಕಾರ ವಾಯಿಂಚು .ಮುನ್ನಿ ಇಕ್ರ ಅಸ್ತಿವಾರ ಸೂರ್ಯ ಕಂತಿ .ರಾಂಡ್ ನೆದು ನಿಲಮಣಿ .ಮುಡ್ ನೇದು ಹೇರದು .ನಾಲ್ ನೆದು ಪಚ್ಚೆ . 20. ಅಚ್ ನೇದು ಗೋಮೇಧಿಕ .ಅರ್ನೆದು ಮಾಣಿಕ್ಯ .ಓಗ್ ನೇದು ಪೀತರತ್ನ .ಅಟ್ ನೇದು ಬೇರುಲ್ಲ ವಾಬ್ ಬುದ್ ನೇದು ಪುಷ್ಯರಾಗ . ಪತ್ನೆದು ಗರುಡಪಚ್ಚೆ .ಹನ್ನೊಂದುನೆದು ಕಂಗಿತ್ತಳೆ ,ಪಾನ್ ನೆಡ್ ನೇದು ನೀಲಸ್ಪಟ್ಟಿಕ. ^{21 22} 21. ಪನೆಂಡು ಮುನ್ ವಸ್ಲು ಪಾನೆಂಡು ಮುತ್ತುತಿಂಡು ಆಯಿಂಚು ;ವಂಡೋಂಡು ವಾಸ್ಲು ವಂಡೋಂಡು ಮುತ್ತಿಂಡು ಆಯಿಂಚು .ಪಟ್ಟಣತ ಬೀದಿ ಸ್ವಚ್ಚ ಗಾಜ್ ಕನ್ನಿ ಇಂದ ಸೋಸಿಕ್ರ ಬಂಗಾರವಾಯಿಂಚು . 22. ಪಟ್ಟಣತ್ಕುರು ನಾನು ಆಲಯನ ಪಕುಲ್ಲ ;ಯೆಂತುಗು ಇನ್ ಡೆಕೆ ಸರ್ವಶಕ್ತ ದೌರು ಆಯಿಕ್ರ ಕರ್ತನು ಕುರಿಯಾದತನು ಅತ್ರ ಆಲಯವಾಯಿದು. ^{23 24 25} 23. ಪಟ್ಟಣತ್ಗು ವಾಲ್ಸ್ ರು ತರುರ್ಕಾಯಿ ಸೂರ್ಯನಗೋಟು ಚಂದ್ರನಾಗೊಟು ಬೇಕಗ್ ದಿಲ್ಲ .ಎಂತುಗು ಇಂಡೆಕೆ ಅತ್ಗು ದೌರ್ ತ ಪ್ರಭಾವ ವಾಲ್ ಸುರ್ ತಂದಿಂಚು ;ಕುರಿಯಾದತನು ಅತ್ರ ದೀಪ . 24. ರಕ್ಷಿಸಲ್ಪಟ ಜನಾಂಗತಗ್ಯ ಅತ್ರ ವಲ್ಸುರ್ ಕುರು ನಡ್ ಕಕ್ನು ;ಭೂರಾಜರು ತಂಗ್ಟ ವೈಭವನೂ ಘನನ ಅಟ್ಗು ಅತೆರಾಕ್ನು . 25. ಅತ್ರ ಮುನ್ ವಾಸ್ಲುನ ಪಗ್ ಮರ್ಲಿ ಮುಚ್ಚುದುಲ್ನು .ಎಂತುಗು ಇಂಡೆಕೆ ನಾಮರು ಅಟ್ಟಿಲ್ಲ. ^{26 27} 26. ಆಗ್ಯ ಜನಾಂಗತ ವೈಭವನ ಘನನ ಅಟ್ಗು ಅತೆರಕ್ನು . 27. ಅತ್ಕುರು ಕಡುಕ್ರದು ಯೇದು ಸೆರ್ ದಿಲ್ಲ .ಅಸಹ್ಯವಾನದು ಸುಳ್ಳತೆಯ ನಡ್ ಪಿಕ್ರದು ಅಟ್ಟಿ ಸೇರುದುಲ್ಲ ಆನೆಕೆ ಕುರಿಯಾದತನ ಜೀವಗ್ರಂಥತ್ಕುರು ವರ್ಜಿಕ್ರಗ್ಯ ಮಾತ್ರ ಸೇರಕ್ನು.