^{1 2} 1. ಅನ್ಬೇಸಲ್ಲಿ ಕೊಲುತರಯಿಕ್ರ ವಂಡು ದಂಡ ನಂಕು ತಂಚು ಆ ದೂತನು ನಿಡ್ರು ಅದ್ದಿಂದು ದೌರ್ತ ಆಲಯನ ಯಜ್ಞವೆದಿನ ಆಲಯತ್ಕುರು ಆರಾದನೇ ಸೈರಲ್ನ ಅಳತೆ ಸೈಯಾಂಗೋ . 2. ಆನೇಕೆ ಆಲಯತ್ಕುರು ಬೈಲಿಕ್ರ ಅಂಗಳನ ಅಳತೆ ಉಟೂಟ್ಟು; ಎಂತಿಗಿಂಡೆಕೆ ಅದು ಅನ್ಯ ಜನರ್ಕು (ಮಂದಿಲ್ಕಿ) ಕೊಡ್ಚ್ನು .ಆಗ್ಯ ಪರಿಶುದ್ದ ಪಟ್ಟಣತ್ಕುರು ನಡ್ರುಕಪಾತುರಂಡು ಮಾದು ಮಿದ್ ಕ್ಯಕ್ನು . ^{3 4 5} 3. ಇದಲ್ಲದೆ ನಟ್ಟು ರಂಡು ಸಾಕ್ಷಿಗ್ಯ ಗೋಣೆತಟ್ಟನ ಹೊಟ್ಗೊಂಡು ಸಾವಿರತ ರಂಡುನೂರ ಅರ್ ಕಪಾತು ನಾಲ್ತಂಕ ಪ್ರವಾದಿಸುರ್ಕು ಆಲ್ಕಿ ಅಧಿಕಾರ ಕುಡ್ತಿಂಚು . 4. ಭೂಲೋಕತ ದೌರ್ ಮುಂಕು ನಿಡ್ರಿಕ್ರ ರಂಡು ಹನ್ನಿ ಮರ ರಂಡು ದಿಪಸ್ತಂಭ ಈಗ್ಲೇ . 5. ಇಲ್ಕಿ ಎದಾನ ಕೊಟ್ತ ಸೈಯಿರ್ದು ಇಂಡೆಕೆ ಈಲ್ಟ ವಾಯಿಂಡು ನೇರ್ಪು ವರಾಕು ಇಲ್ಟ ಶತ್ರುನ ಮಿಂಗಿ ಹೊಡ್ರದು; ಇಲ್ಕಿ ಎದಾನ ಕೊಟ್ಯಾತ್ತ ಸೈಯಿರ್ದು ಇಂಡೇಕೇ ಅದು ಈ ತರ ಕೊಲೆ ಹಾಗುರ್ದು . ^{6 7} 6. ಅಯಿಲ್ಟ ಪ್ರಾವದಾನೆ ದಿನತ್ಕುರು ಮಗಬುಗಾರ್ಕಾನಿ ಆಕಾಶತಾತೆಯಿ ಮುಚ್ರ್ ಅಧಿಕಾರ ಇತುಗು ಈದು . ಇದಲ್ಲದೆ ಇಲ್ಕಿ ಇಷ್ಟ ವಂದಪದಾದಿ ತನ್ನಿ ರಘು ಅಗುರ್ಕನಿ ಸೈಯಿರ್ಕು ಆದಿತರ್ತ ಉಪದ್ರವತಿಂಡು ಭೂಮಿನ ಹೊಡ್ಕೀರ್ಕು ಅಧಿಕಾರ ಈದು . 7. ಈಗ್ಯ ತಗ್ಟ ಸಾಕ್ಷಿನ ಸೋನ್ನಿ ಮುಗ್ಸ್ನಾಪೊದು ತಳಯಿಲರ್ ತಗ್ ಯಿಂಡು ಅತ್ತಿ ವಾರ್ರ್ ಮೃಗ ಈಲ್ಕಿ ವಿರೋದವಾಯಿ ಯುದ್ದ ಸೆಂದು ಇಲ್ಯತೆಯ ಗೆದ್ದ್ ಕೊಲ್ಲಕು. ^{8 9} 8. ಅಯಿಲ್ಟು ಪೀನ್ಗಿಗ್ಯ ಮಹಾ ಪಟ್ಟಣತ ಬೀದಿಕುರು ಬೂದ್ದಿಕಕು .ಆ ಪಟ್ಟಣತ್ಗು ಆತ್ಮಿಕವಾಯಿ ಸೋದೋಮ್ ಇಂಡು ಐಗುಪ್ತ ಇಂಡು ಅಗ್ಯಾಕ್ನು; ನಾಗ್ಟ ಕರ್ತನು ಆಟ್ಟಿ ಶಿಳುಬೇತ್ಗು ಹೊಟ್ಸುನು . 9. ಆಪೋದು ಪ್ರಜೆ ಕುಲ ಭಾಷೆ ಕುಲ್ ತಗ್ಯ ಸತ್ಯೋ ಯಿಕ್ರ ಅಯಿಲ್ಟ ಪನ್ಗೀನ ಮೂಡುವರೀ ನಾಲು ಪಾಕಕ್ನು ,ಸೇತೊಯಿಕ್ರ ಆಯಿಲ್ಟ ಪಿನ್ಗಿನ ಸಮಾದಿಕುರು ಆಕಿರ್ಕು ಹೊಡ್ದುಲ್ನು. ^{10 11 12} 10. ಈ ರಂಡು ಪ್ರಾವಾದಿಗ್ಯ ಭೂಮಿಕುರು ವಾಸ ಇಕಿರಲ್ಯ ಯಾತನೆ ಪಡ್ಸ್ ನಾತಿಂಡು ಈಳ್ತಾ ವಿಷಯತ್ಕುರು ಭೂನಿವಾಸಿಗ್ಯ ಸತೋಷತಿಂಡು ಸಂಭ್ರಮ ಪಟ್ ಸುನು ವಂಡಲ್ಕು ವಂಡಲು ಧನ (ಪನ್ನು ) ಹಮ್ ಪರೋಯಿಂಡು ಸೋನುಸ್ನು . 11. ಮೂಡುವರೆ ನಾಲು ಆನ್ಬೇಸಾಲಿ ದೌರಿಂಡು ಜೀವಾತ್ಮ ವಂದು ಆ ಪಿನ್ಗಿಕುರು ಸೇರಿ ನಪೋದು ಅದು ಕಾಲೂರಿ ನಿಡ್ ರುಗೊಂಡುಸು .ಅಯಿನ್ನ ಪತಲ್ಕಿ ಶ್ಯಾನ (ಮಹಾ ) ಭಯ ವಂಚು . 12. ಆನ್ಬೇಸಾಲಿ ಆಯಿಲ್ಕಿ ಈಟ್ಗು ವಗೋ ಇಗ್ರ ಪರಲೋಕತ ಮಹಾಶಬ್ದನ ಆಗ್ಯ ಕೊಟ್ಟುಸ್ನು ,ಆಪೋದು ಆಗ್ಯ ಮೇಘತ್ಕುರು ಪರಲೋಕತ್ಗು ಏರಿ ಹೊಸ್ನು ;ಅಯಿಲ್ಟ ಶತ್ರುಗ ಅಲ್ನ ಪಚ್ನು. ^{13 14} 13. ಆದೇ ಸಮಯತ್ಕುರು ಮಹಾ ಭೂಕಂಪ ಉಂಟಾಯಿ ಆ ಪಟ್ಟಣತ್ಕುರು ಯಿಕ್ರ ಪತ್ತಲ್ ಕುರು ವಂಡು ಭಾಗ ಬೂದು ಹೊಸು ;ಆ ಭೂಕಂಪತ್ಕುರು ಓಗು ಸಾವಿರ ಮಂದಿ ಕೊಲ್ಲಲ್ಪಟುಸ್ನು ಉಳ್ಜಗ್ಯ ಭಯತಿಂಡು ಪರಲೋಕತ ದೌರ್ನ ಮಹಿ ಪಡ್ಸುಸ್ನು . 14. ರಂಡನೆ ಆಪತ್ತು ಕಳ್ ಜೊಸು ; ಇಗೋ ಮೂಡ್ ನೆತ ಆಪತ್ತು ದೌಡು ವರಕು. ¹⁵ 15. ಒಗ್ನೆ ದೂತನು ತುತೂರಿನ ಉದುಸು .ಆಪೋದು ಪರಲೋಕತ್ಕುರು ಮಹಶಬ್ದ ಆಸು ಈ ಲೋಕತ ರಾಜ್ಯ ನಾಗ್ಟ ಕರ್ತನಾನ ಅತ್ರ ಕ್ರಿಸ್ತನ ರಾಜ್ಯ ಆಸು ;ಅದು ಯುಗಾಂತರತ್ಕುರು ಆಳಕು ಇಂಡು ಸೋನ್ನುಸು. ^{16 17} 16. ದೌರ್ತ ಸಮಕ್ಷಮತ್ಕುರು ತಗ್ಟ ತಾಗ್ಟ ಆಸನತ್ಕುರು ಉಕೋಡುಯಿಕ್ರ ಪೋದು ಇರ್ವತ್ತ ನಾಲು ಮಂದಿ ಬೆರ್ ಆಗ್ಯ ಆಡ್ದ ಬುಜ್ನು . 17. ಓ ಕರ್ತನೆ ,ಸರ್ವಶಕ್ತನಾನ ದೌರೆ .ಇಕ್ರದು ಇದ್ದಾದು ವರ್ರಾದು ಆಯಿಕ್ರ ನೀನು ನೀಟ ಮಹಾ ಅದಿಕಾರನ ವಹಿಸ್ ಗೊಂಡು ಆಳಿಕ್ರ ತಿಂಡು ನಂಗ ನಿಂಕು ಕೃತಜ್ಞತ ಸುತ್ತಿ ಸಲ್ಲಿಸಾರೋ ಇಂಡು ಸೊನ್ತ ದೌರ್ನ ಆರಾದನೆ ಸೇಚ್ನು. ¹⁸ 18. ಜನಾಂಗ ಕೋಪ ಸೇದ್ಗೊಂಡುಸ್ನು ,ನಿಟ್ಟು ಕೋಪ ವಂಚು ,ಸೇತೋ ಇಕ್ರಗ್ಯ ತೀರ್ಪು ಹೊಂದಿಗಿರ್ಕು ನೀನು ನಿಟ ಸೇವಾಕ ಆಯಿಕ್ರ ಪ್ರವಾದಿಲ್ನ ಪರಿಶುದ್ದರ್ಕು ನಿಟ ನಾಮತ್ಗು ಭಯ ಪಡ್ರ ಚಿನ್ನಲ್ಕು ಬೇರಲ್ಕು ಪ್ರತಿ ಫಲನ ಕೋಡ್ ಕುರ್ಕು ಭೂಮಿನ ನಾಶ ಸೈರಲ್ಕು. ¹⁹ 19. ಆಪೋದು ಪರಲೋಕತ್ಕುರು ದೌರ್ ಆಲಯ ವಂಗುಸು ;ಅತ್ರ ಆಲಯತ್ಕುರು ಅತ್ರ ಒಡಂಬಡಿಕೆ ಮಂಜೂಷ ಕಂಡುಸು .ಇದಲ್ಲದೆ ಮಿಂಚುಗ್ಯ ವಾಣಿಗ್ಯ ಗುಡುಗು ಭೂಕಂಪ ಬೇರ್ದು ಆನೆ ಕೆಲ್ಲು ಮಗ ಆಸ್ಸು.