^{1 2} 1 ಅನ್ಬೇಸಲಿ ಬಲಿಷ್ಠ ಆನಾ ಇನ್ನೊಂಡು ದೇವದೂತನು ಪರಲೋಕುತಿಂಡು ಇಗ್ಜು ವರತ್ತ ಪಾತೇ ,ಅದು ಮೇಘತ್ತೆಯ ಹೊಟ್ಗೊಂಡಿಂಚು ;ಅತ್ರು ತಲ್ಕಾಯಿ ಮೇನಿ ಮುಗಿಲುಬಿಲ್ಲು ಇಂಚು ;ಅತ್ರ ಮೊಗು ಸೂರ್ಯನ್ ತರ ಇಂಚು ; 2 ಅತ್ರ ಪಾದಗ ನೆರ್ಪು ಕಂಬುಲ್ ತರಯಿಂಚು ;ಅತ್ರು ಕೈಕೋರು ವಂಗಿಂದ ಒಂಡು ಚಿನ್ನ ಸುರುಳಿ ಇಂಚು ;ಅದು ಸಮುದ್ರುತ್ ಮೇನಿ ಭೂಮಿ ಮೇನು ಅಚ್ಚು. ^{3 4} 3 ಸಿಂಹ ಗರ್ಜಿಸ್ರು ತರ ಮಹಾ ಶಬ್ದತಿಂಡು ವದ್ರುಸು. 4 ವದ್ರುನಪೋದು ಹೋಗು ಗುಡ್ಗು ಒಂಡೋ೦ಡಾಯಿ ಧ್ವನಿ ಸೇ೦ಚ್ನು ,ಆ ಹೋಗು ಗುಡುಗು ವಸೇತ್ನಪೋದು ನಾನು ವರಿರ್ದು ಇಂಡ್ಗೋ೦ಡಿ೦ದೆ, ಅನೇಕೆ –ಆ ಹೋಗು ಗುಡುಗು ಸೋನ್ನತ್ತ ನೀನು ವರಿದೇ ಮುಚ್ಚಿಹೈಯಿ ಇಂಗ್ರ ಆಕಾಶ ವಾಣಿಯತ್ತೆಯ ಕೋಟೆ. ^{5 6 7} 5 ಅನ್ಬೇಸಲಿ ಸಮುದ್ರುತ್ ಮೇನಿಯೂ ಭೂಮಿ ಮೇನು ನಿಂಡ್ರಿಕ್ರದಾಯಿ ಕಾಗ್ನ ದೇವದೂತು ತಟ ಉನ್ ಗೈಯತ್ತೆಯ ಪರಲೋಕುತ್ ಜಾಯಿ ಪೆಚ್ಚಿ 6 ಪರಲೋಕತ್ತೆಯ ಅತ್ತುಲ್ಲಿ ಇಕ್ರ ಅದ್ದಿಯತ್ತೆಯ ಭೂಮಿಯತ್ತೆಯ ಅತ್ತುಲ್ಲಿ ಇಕ್ರ ಅದ್ದಿಯತ್ತೆಯ ಸಮುದ್ರತ್ತೆಯ ಅತ್ತುಲ್ಲಿಯಿಕ್ರ ಅದ್ದಿ ಸೃಷ್ಟಿಸಿ 7 ಯುಗಯುಗಂತರ್ ಕೋರು ಜೀವಿಸ್ರತ್ರು ಮೇನಿ ಆಣೆಯೋಟು –ಇನ್ನು ಸಾವಕಾಶಇಕ್ಕಿದಿಲ್ಲ ,ಹೋಗ್ನೆ ದೇವದೂತನು ಶಬ್ದ ಸೈರ ನಲ್ತ್ ಗೊರು ಇಂಡೆಕ್ಯ ಅದು ತುತೂರಿಯತ್ತೆಯ ಉದ್ರ ಸಮಯತ್ಗೋರು ದವ್ರು ಇದ್ನು ನಾಲು ಮುಚ್ಚಿಹಚ್ಚಿಂದ ಸಂಕಲ್ಪತ್ತೆಯ ತಟ ದಾಸರಾನ ಪ್ರವಾದಿಲ್ಕಿ ಶುಭವರ್ತಮಾನವಾಯಿ ತಿಳಿಸಿಂದ್ ಪ್ರಕಾರ ನೇರವೆರುಸಾಕು ಇಂಡು ಸೋನುಸು. ^{8 9} 8 ಅನ್ಬೇಸಲಿ ಪರಲೋಕುತಿಂಡು ನನ್ಕು ಕೋಟ ಶಬ್ದ ಪದ್ರಿಗಿ ನನ್ನೆಂಟಿ ವಸೇತ್ತಿ –ನೀನು ಹೋಯಿ ಸಮುದ್ರುತ್ ಮೇನು ಭೂಮಿ ಮೇನು ನಿಂಡ್ರುಗೊಂಡಿಕ್ರ ದೂತನ ಕೈಯಿಕೋರು ಇಕ್ರ ಆ ವಂಗಿಂದ ಸುರುಳಿಯತ್ತೆಯ ಅತ್ಗೋ ಇಂಡು ಸೋನುಸು , 9 ನಾನು ಆ ದೂತುನಂಚ್ಗು ಹೋಯಿ –ಆ ಚಿನ್ನ ಸುರುಳಿಯತ್ತೆಯ ನನ್ಕು ತಾ ಇಂಡು ಕೊಟಾತ್ಗು ಅದು ನನ್ಕು –ನೀನು ಇತ್ತ ಅತ್ಗೊಂಡು ತಿಂಡ್ರೋಡು ,ಇದು ನಿಟ ವರ್ಗತ್ತೆಯ ಕೆಚ್ಚುಹಾಗ್ರು ತರಸೈಯಾಕು ,ಅನೇಕೆ ನಿಟ ವಾಯಿಕೋರು ಜೇನುತರ ಸಿಹಿಯಾಯಿಕ್ಯಾಕು ಇಂಡು ಸೋನುಸು. ^{10 11} 10 ಅಪೋದು ನಾನು ಆ ಚಿನ್ನ ಸುರುಳಿಯತ್ತೆಯ ಆ ದೂತನ್ ಕೈಯಿಂಡು ಅತ್ಗೊಂಡು ತಿಂಡ್ರೋಟೆ ,ಅದು ನಟ ವಾಯ್ ಕೋರು ಜೇನು ತರ ಸಿಹಿಯಾಯಿಂಚು ;ಅತ್ತ ತಿಂಡ್ರನ್ ಬೇಸಲಿ ನಟ ವರ್ಗು ಕೆಚ್ಚು ಹಾಸು . 11 ಅನ್ಬೇಸಲಿ –ಇನ್ನೂ ನೀನು ಸೇನ ಆಯಿಕ್ರ ಪ್ರಜೆ ಮಂದಿ ಓಕು ರಾಜ ಇಲ್ತ ವಿಷಯತ್ಗೋರು ಪ್ರವಾದನೆ ಸೊಂಡ್ರುದು ಇಂಡು ನನ್ಕು ತಿಳುಸುಸು.