^{1 2 3} 1 ನಿಂಗ್ಲುಕೊರು ಯುದ್ದಗ ಕಾದಾಟ ಎಟಿ೦ಡು ಪರ್ಕಕೂ ?ನಿಂಗ್ಲ ಇಂದ್ರಿಯಕೋರು ಹೋರಾಡ್ರ ಭೋಗಾಶೆಯಿಂಡೆ ಅಲ್ಯ . 2 ನಿಂಗ ಆಶೆ ಪಟ್ನೆಕೂ ಹೊಂದೇ ಇರಂಗ ,ನಿಂಗ ಕೊಲೆಗಾರರಾಗ್ಗ್ರದ್ನ ಹೊಟ್ಟೆ ಕಿಚ್ಚು ಪಟ್ತೆಕು ಸಂಪಾದ್ನೆ ಸೈದೆಯಿರಂಗ ;ನಿಂಗ ಕಾದಾಡರಂಗ ,ಯುದ್ದ ಸೈಯಾರಂಗ ,ನಿಂಗ ದವ್ರತ್ತೇಯ ಬೇಡಿಗ್ದೆ ಯಿಕ್ರತಿಂಡು ನಿಂಗ್ಲುಕು ದೊರ್ಕುಲ . 3 ನಿಂಗ ಬೇಡ್ನೆಕು ಬೇಡ್ನತ್ತ ನಿಂಗ್ಲ ಭೋಗಗಳಿಗಾಯಿ ಉಪಯೋಗಿಸುರ್ದುಯಿಂಗ್ರ ದುರಭಿಫ್ರಾಯಪಟ್ಟು ಬೇಡಿಗೊಂಡಿಕ್ರತಿಂಡು ನಿಂಗ್ಲುಕು ದೊರ್ಕ್ದಿಲ್ಲ. ^{4 5} 4 ವ್ಯಭಿಚಾರಿಗ್ಯ ನಿಂಗ ಇಹಲೋಕಸ್ನೇಹತ್ಗು ದೇವವೈರಯಿಂಡು ನಿಂಗ್ಲುಕು ಗೊತ್ತಿಲ್ಯ ?ಲೋಕುತ್ಗು ಸ್ನೇಹಿತನಾಗ್ರುದುಯಿಂಡ್ಗೋ೦ಡಿಕ್ರದು ತನ್ನತ್ತೆಯ ದವ್ರುಕು ವಿರೋಧಿಯನ್ನಾಯಿ ಸೆಂದ್ಗಕು , 5 ದವ್ರು ನಿಂಗ್ಲುಕೊರು ಇರ್ಪ್ಚಿಕ್ರ ಪವಿತ್ರಾತ್ಮನು ಅಭಿಮಾನತಾಪತಿಂಡು ನಂಗ್ಲುಕಾಯಿ ಹಂಬಲಿಸಾಕು ಇಂಗ್ರ ಶಾಸ್ತ್ರೋಕ್ತಿ ಬರೀ ಹೊಕ್ಕಿಂಡು ಭಾವಿಸರಂಗ ? ^{6 7} 6 ಅದು ನಂಗ್ಲ ಮೇನಿ ಸ್ಯನ ಶಯಆನಾ ಕೃಪೆಯತ್ತೆಯ ಹಕ್ಯಾಕು ,ಅತಿಂಡು –ದವ್ರು ಅಹಂಕಾರಿಲ್ಲತ್ತೆಯ ಗದ್ರುಸಾಕು, ದೀನರ್ಕನೆಕ್ಯ ಕೃಪೆಯತ್ತೆಯ ಅನುಗ್ರಹಿಸಾಕು ಇಂಡು ಶಾಸ್ತ ಸೋನ್ನಕು. 7 ಹಿನ್ಗಿಕ್ರತಿಂಡು ದವ್ರುಕು ಒಳ್ಗಗಂಗೋ, ಸೈತನತ್ತೆಯ ಗದ್ರುಸಂಗೋ ,ಅದು ನಿಂಗ್ಲತ್ತೆಯ ಹುಟ್ಟು ಓಡಿಹೋಕ್ದು. ^{8 9 10} 8 ದವ್ರಂಚ್ಗು ವಾ೦ಗೋ ,ಅಪೋದು ಅದು ನಿಂಗ್ಲ೦ಚ್ಗು ವಾರಕು . ಪಾಪಿಗಿನ್ಲೇ ,ನಿಂಗ್ಲ ಕೈಲತ್ತೆಯ ಶುಚಿಸೇದ್ಗೊಂಗೋ ;ರಂಡು ಮನಸ್ಸುಯಿಕ್ರಾಂಗ್ಲೆ ನಿಂಗ್ಲ ಹೃದಯತ್ತೆಯ ನಿರ್ಮಲಸೇದ್ಗೊಂಗೋ ; 9 ದುಃಖ್ಸಂಗೋ ,ಗೋಳಾಡ೦ಗೋ ,ಕನ್ನೇರುಯುಡ೦ಗೋ .ಸಿರ್ಕ್ರತ್ತ ಉಟ್ಟು ಗೋಳಾಡ೦ಗೋ ;;ಸಂತೋಷತ್ತೆಯ ಉಟ್ಟು ಮನಗುಂದಿಕ್ರಗಗಂಗೋ . 10 ಕರ್ತನ ಮುನ್ನಿ ನಿಂಗ್ಲತ್ತೆಯ ತಗ್ಗಿಸ್ಗ್ಯೊಂಗೋ ;ಅಪೋದುಅದು ನಿಂಗ್ಲತ್ತೆಯ ಮೇನ್ಕು ಹತ್ತೆರಾಕೂ. ^{11 12} 11 ಅನ್ನಾತೆಂಬಿ ಮಾರ್ಲೆ ,ಒಂಡಲ್ನೋಡು ನಿಂದಿಸ್ಮಾನಂಗ ,ಎದನಾ ತಟ ಸಹೋದರನ್ನತ್ತೆಯ ನಿಂದುಸ್ನೇಕೆ ಮತ್ತೆ ಸಹೋದರ್ನ ವಿಷಯವಾಯಿ ತೀರ್ಪು ಸೇನ್ದೆಕೆ ಅದು ಧರ್ಮಶಾಸ್ತ್ರತ್ತೆಯ ನಿಂದಿಸಿ ಧರ್ಮಶಾಸ್ತ್ರ ವಿಷಯಕೋರು ತೀರ್ಪುಸೇನ್ –ದ್ಕನಿ ಅಕ್ದು ಅನೇಕೆ ನೀನು ಧರ್ಮಶಾಸ್ತ್ರತ ವಿಷಯತ್ಗೋರು ತೀರ್ಪುಸೇನ್ದೆಕ್ಯ ನೀನು ನ್ಯಾಯಾಧಿಪತಿಯಿಂಡು ಸೋನ್ನಿಚ್ಗಾರ ಅದ್ನೇ ಅತ್ತ ಅನುಸರ್ಸ್ರವ ಅಲ್ಲಾ , 12 ನ್ಯಾಯತ್ತೆಯ ವಿಧಿಸ್ನ ನ್ಯಾಯಧಿಪತಿ ಒಂಡೇ ;ಅದೇ ಉಳ್ಪಿಚುಗ್ರುಕು ನಾಶಸೈರುಕ್ಕೂ ಶಕ್ತನು .ಹಿನ್ಗಿಕ್ರಪೋದು ನಿಟ (ನೆರೆಯವನ ) ಸಂಬಂದಿಕ್ರ ವಿಷಯತ್ಗೋರು ತೀರ್ಪು ಸೈರುಕು ನೀನು ಏದು. ^{13 14} 13 ಈಮಾನು ಇಲ್ಲ ತಜ್ಜಲಿ ನಂಗ ಇಂಥ ಪಟ್ಟನತ್ಗು ಹೋಯಿ ಅಟಿ ಒಂಡು ವಟ್ಗಲೂಯಿಂದು ವ್ಯಾಪಾರತ್ತೆಯ ಸೆಂದು ಲಾಭತ್ತೆಯ ಸಂಪಾದಿಸಾರೋ ಇಂಡು ಸೊಂಡ್ರಗ್ಲೆ ,ಕೋರಂಗೋ ,ತಜ್ಜಾಲಿ ಎಂದಾಕ್ದೋ ನಿಂಗ್ಲುಕು ಗೊತ್ತಿಲ್ಲ . 14 ನಿಂಗ್ಲ ಜೀವಮಾನವು ಎಂಥದು ?ನಿಂಗ ಸ್ವಲ್ಪು ಹೊತ್ತು ಕಂಡು ,ಆ ಮೇನಿ ಕಾಂಗ್ದೆ ಹೋಗ್ರ ಹಬೆತರಯಿರಂಗ. ^{15 16 17} 15 ಅತಿಂಡು ನಿಂಗ ಅಂಥ ಹೊಕತ್ತೆಯ ಉಟ್ಟು ದವ್ರ ಚಿತ್ತ ಅನೇಕೆ ನಂಗ ಪಗ್ಸು ಈ ಪನ್ನಿಯನಗೋಟು ಆ ಪನ್ನಿಯನಗೋಟು ಸೈಯಾರೋ ಇಂಡು ಸೊಂಡ್ರುದು. 16 ಹೀನ್ಗೆ ಸೋನಾದೆ ನಿಂಗ ಅಹಂಭಾವತಿಂಡು ಹೋಗ್ಲಿಗ್ಯರಂಗ ,ಅಂಥ ಹೊಗಳಿಕೆಅದ್ದಿ ಕೊಟ್ಯಾದು . 17 ಇನ್ಗಿಕ್ರತಿಂಡು ನಲ್ಲತತ್ತೆಯ ಸೈಯಿರ್ದುಯಿಂಡು ತಿಳ್ಜು ಅತ್ತ ಸೈದೇ ಇಕ್ರದು ಪಾಪುತ್ಗುಯೊಳಗೈದು.