^{1 2} 1ನಟ ಅನ್ನಾತೆಂಬಿ ಮಾರ್ಲೆ ,ಬೋಧಕ ಆನಾ ನಂಗ್ಲುಕು ಕಟಿನವಆನಾ ತೀರ್ಪು ಅಕ್ದುಯಿಂಡು ತಿಳ್ಜ್ಗೊಂಡು ಸೇನಮಂದಿಗ್ಯ ಬೋಧಕರಾಗ್ಮನಂಗ . 2 ಸೇನ ವಿಷಯತ್ಗೋರು ನಂಗದ್ದಿ ತಪ್ಪುರೋ ,ಒಂಡು ಹೋಕೊರು ತಪ್ಪದೇ ಯಿಂದೆಕ್ಯ ಅದು ಶಿಕ್ಷಿತನೂ ತಟ ಓಡ್ಮತ್ತೆಯ ಸ್ವಾಧೀನಪಡ್ಸ್ರುಕು ಸಮರ್ಥನೂ ಐದು. ^{3 4} 3 ನಂಗ ಕುದ್ರುಲತ್ತೆಯ ಸ್ವಾಧೀನ ಸೈಯಿರ್ದುಯಿಂಡಪೋದು ಐಲ್ತವಾಯಿಕಿ ಕಡಿವಾಣ ಹೋಡರೋಅಲ್ಯ ;ಅಪೋದು ಐಲ್ತ ಹೊಡ್ಮದ್ದಿ ತಿರ್ಗುಸ್ರುಕು ಅಕ್ದು . 4 ಹಡ್ಗತ್ತೆಯ ಪರಂಗೋ ,ಅದು ಸೇನ ಬೇರದು ,ಬಲಅನಾ ಗಾಲಿಯಿಂಡು ಬಡ್ಜುಗೊಂಡು ಹೋಕ್ದು ಅನೇಕು ನಡ್ಪಿಕ್ರದೂ ಸೇನ ಚಿನ್ನ ಚುಕ್ಕಾಣಿಯಿಂಡು ಐಲ್ಯತ್ತೆಯ ತಟ ಮನಸ್ಗು ವಂದು ಜಾಯಿ ತಿರ್ಗುಸಾಕು. ^{5 6} 5 ಅನ್ಗೆ ನಾಲಿಗೆನು ಸಹ ಚಿನ್ನ ಅಂಗವಾಯಿಂದೇಕು ಬೆರು ಕಾರ್ಯಲತ್ತೆಯ ಕೊಚ್ಚಿಗ್ಯಾಕು . 6 ಎದ್ನು ಅಳುದ್ನು ಕಿಚ್ಚು ಎದ್ನು ಬೆರು ಕಾಡತ್ತೆಯ ನೆರ್ಪುಅಂಟಿಕ್ಯಕೂ ಪರಂಗೋ .ನಾಲಿಗೆಯೂ ಕಿಚ್ಚೆ ...ನಾಲಿಗೆಯೂ ಅಧರ್ಮಲೋಕರೂಪವಾಯಿ ನಂಗ್ಲ ಅಂಗಗಳ ಮದ್ಯೆ ಅಚ್ಚಿದು ,ಅದು ಹೊಡ್ಮದ್ದಿ ಕೆಡ್ಸಕು .ತಾನೇ ನರಕತಿಂಡು ನೆರ್ಪುಅಂಟಿಕ್ತ ಪ್ರಪಂಚಯಿಂಗ್ರ ಚಕ್ರತ್ಗು ನೆರ್ಪು ಅಂಟಿಕ್ಯಕೂ. ^{7 8} 7 ನರಜಾತಿ ಅದ್ದಿ ಜಾತಿಯ ಮೃಗ (ಪ್ರಾಣಿ ) ಪಕ್ಷಿ ಕ್ರಿಮಿ ಜಲಚರಲ್ಲತ್ತೆಯ ಹತೋತಿಗೂ ಅತ್ತೆರಾದುಯಿದೂ ಮತ್ತೆ ಅತ್ತೆಂದಿಕ್ರಾದುಯಿದೂ . 8 ಅನೇಕೆ ನಾಲಿಗೆಯತ್ತೆಯ ಎದೇ ಮಣ್ಸು ಹತೋಟಿಗೂ ಅತೇರ್ದಿಲ್ಲ ,ಅದು ಸುಮ್ಮದೆಯಿಕ್ಯರಾದ ಕೆಡುಕೈದೂ ;ಮರಣಕರ ಆನಾ ವಿಷಯತಿಂಡು ಮೇತ್ತಿದೂ. ^{9 10} 9 ನಾಲಿಗೆಯಿಂಡು ಹವಾನ ಕರ್ತನತ್ತೆಯ ಕೊಂಡಡಾರೋ ;ಅತಿಂಡು ದವ್ರ ಹೋಲಿಕೆಕೂ ಸರಿಯಾಯಿ ಉಂಟುಸೇಂದ ಮಣ್ಸುರತ್ತೆಯ ಶಪಿಸರೋ . 10 ಅದೇ ವಾಯಿಂಡು ಸ್ತುತಿ ಶಾಪ ರಂಡು ವರಕು ,ನಟ ಅನ್ನಾತೆಂಬಿಮಾರ್ಲೆ ,ಹಿನ್ಗುಯಿಕ್ರದು ಯೋಗ್ಯಅಲ್ಲ. ^{11 12} 11 ಊಟೆಯ ಒಂಡೇ ವಾಯಿಂಡು ಸಿಹಿತನ್ನಿ ಕಹಿತನ್ನಿ ರಂಡು ಹೊಕ್ದೋ ? 12 ನಟ ಅನ್ನಾತೆಂಬಿಮಾರ್ಲೆ ,ಅಂಜೂರದ ಮರು ಅನ್ನಿ ಮರ್ತ ಕಾಯಿ ಉಡಕೋ ?ದ್ರಾಕ್ಷೀ ಬಳ್ಳಿಕೋರು ಅನ್ಜೂರ್ತ ಪಂಗ್ಗುಹಾಕ್ದೋ ?ಅನ್ಗೆ ಉಪ್ಪು ತನಿತ ಬಾವಿಯಿಂಡು ಸಿಹಿ ತನ್ನಿ ವರ್ರುದ್ದಿಲ್ಲ. ^{13 14} 13 ನಂಗ್ಲುಲ್ಲಿ ಜ್ಞಾನಿಯೂ ಬುದ್ದಿವಂತನೂ ಏದು ?ಅಂಥದು ಯೋಗ್ಯವಾಯಿ ನಡ್ದುಗೊಂಡು ಜ್ಞಾನತ ಲಕ್ಷಣವಾಯಿಕ್ರ ಶಾಂತಗುಣತಿಂಡು ಅತ್ರ ಫಲತ್ತೆಯ ಕಟೋಟು . 14 ಅನೇಕೆ ತಿಕ್ಷ್ಣ ಆನಾ ಮತ್ಸರಯೂ ಪಕ್ಷಭೇದವು ನಿಂಗ್ಲ ಹೃದಯತ್ಗೋರು ಇನ್ದೆಕ್ಕೆ ನಿಂಗ ಸತ್ಯತ್ಗು ವಿರೋದವಾಯಿ ಸುಲ್ಲಾಡಿ ಹೋಗ್ಲಿಗ್ಮನಂಗ. ^{15 16 17 18} 15 ಅದು ಮೆನ್ನಿಂಡು ವಂದ ಜ್ಞಾನಅಲ್ಲ ;ಅದು ಭೂಸಂಬಂದ ಆನಾ ,ಪ್ರಾಕೃತ ಭಾವಅನಾದು .ದವುಲ್ಕು ಸಂಬಂದ ಪಟ್ನಾದು . 16 ಮತ್ಸರ ಪಕ್ಷಬೇಧ ಇಕ್ರ ಜಾಯಿ ಗಲಿಬಿಲಿಯೂ 17 ಅದ್ದಿತರ್ತ ನೀಚಕೃತ್ಯಗ ಇಕ್ಯಾಕು .ಅನೇಕೆ ಮೇನಿಂಡು ವರ್ರ ಜ್ಞಾನವು ಮುನ್ನಿ ಪರಿಶುದ್ದ ಆನಾದು .ಆ ಮೇನಿ ಸಮಾಧಾನಕರ ಆನಾದು ,ವಿನಯಯಿಕ್ರದು ,ಸಂತೋಸ್ತಿಂಡು ಒಪ್ಪಿಗ್ರದು ,ಕರುಣೆ ಇನ್ನೂ ನಲ್ಲ ಫಲತಿಂಡು ಮೇತ್ತಿಕ್ರದು ಐದು ,ಅತ್ಗೋರು ಚಂಚಲವೂ ಕಪಟವೂ ಇಲ್ಲ . 18 ಸಮಾಧಾನ ಸೈರಾಗ್ಯ ಸಮಾಧಾನಯಿಂಗ್ರ ಬೀಜತ್ತೆಯ ಬಿತ್ತಿ ನೀತಿಯಿಂಗ್ರ ಫಲತ್ತೆಯ ಪ್ಪಿಕ್ಯಾಕ್ನು.