^{1 2 3 4} 1 ನಟ ಅನ್ನಾತೆಂಬಿ ಮಾರ್ಲೆ ಪ್ರಬಾವವುಲಳ್ಳನಂಗ್ಲ ಕರ್ತ ಅನಾ ಯೇಸು ಕ್ರಿಸ್ತನ್ಕೊರು ನಂಬಿಕೆಯಿಟ್ಟವರಾನ ನಿಂಗ ಪಕ್ಷ ಪಾತಿಗಳಾಯಿಕ್ರುದಂಚು . 2 ಏನ್ಗುಯಿಂಡೆಕ್ಯ ಒಂಡು ಮನ್ಸು ಚಿನ್ನದ ಉಂಗ್ರತ್ತೆಯ ಶೋಭಾಯ ಮಾನಆನಾ ಬಟ್ಲತ್ತೆಯ ಉಟ್ಗೋ೦ಡು ನಿಂಗ್ಲ ಸಭಾಮಂದಿರ್ತುಲ್ಲಿ ವರೂಕು 3 ಮತ್ತೆ ಒಂಡು ಬಡ ಮನುಷ್ಯ ಹೀನಆನಾ ಬಟ್ಲು ಒಟ್ಗೊಂಡು ವಂದತ್ಗು ನಿಂಗ ಶೋಭಾಯಮಾನ ಆನಾ ಬಟ್ಲತ್ತೆಯ ಒಟ್ಗೊಂಡಿಕ್ರತ್ತ ಮರ್ಯಾದೆಯಿಂಡು ಪಾತು ಅತ್ಗು ನಿಂಗ ಇಟಿ ಈ ಸುಖಾಸನತ ಮೇನಿ ಉಕೊಂಗೋ ಯಿಂಡು ಆ ಬಡಮಣ್ಸುನ್ಕು ನೀನು ಅಟಿ ನಿಂಡ್ರುಗೋ ,ಇಲ್ಲ ನಟ ಕಾಲ್ಮಣೆಯ ಅಂಚ್ಗು ನೆಲ್ತ್ ಮೇನಿ ಉಕೋ ಯಿಂಡು ಸೋನೇಕೆ 4 ನಿಂಗ ನಿಂಗ್ಲುಕೊರು ಭೇದಸೈರಗಾಯಿ ಸೈರಂಗಾಯಿ ಅನ್ಯಾಯಅನಾ ತೀರ್ಪತ್ತೆಯ ಸೈರಾಗ್ಯಅಯಿರಂಗ . ^{5 6 7} 5 ನಟ ಪ್ರಿಯ ಅನ್ನಾತೆಂಬಿಮಾರ್ಲೆ ,ಕೊರಂಗೋ .ದೌವ್ರು ಲೌಕಿಕ ವಿಷಯತ್ಗೋರು ಬಡವರಾಯಿಕ್ರಲ್ಕಿ ಅಂಜ್ಗೊಂಡು ಐಗ್ಯ ನಂಬಿಕೆಕೋರು ಐಶ್ವರ್ಯವಂತರಾಯಿ ತನ್ನತ್ತೆಯ ಪ್ರೀತಿಸ್ರಲ್ಕಿ ತಾನು ವಾಗ್ದಾನ ಸೇಂದ ರಾಜ್ಯತ್ಗು ಬಾಧ್ಯರಾಯಿ ಇಕ್ಕಿರ್ದುಯಿಂಡು ನೇಮುಸ್ಲ್ಯ ? 6 ನಿಂಗನೆಕೋ .ನಿಂಗ್ಲತ್ತೆಯ ಬಾಧಿಸಿ ನ್ಯಾಯಸ್ಥಾನತ್ಗು ಇಗ್ತುಗೊಂಡು ಒಗ್ರಗ್ಯ ಐಶ್ವರ್ಯವಂತ್ರು ಅಲ್ಯ ? 7 ನಿಂಗ ಅಪಿಚುಗ್ರ ಶ್ರೇಷ್ಟಅನಾ ನಾಮತೇಯ ದುಷಿಸ್ರಾಗ್ಯ ಐಗ್ಯಲ್ಯ. ^{8 9} 8 ಅನೇಕು ಶಾಸ್ತ್ರತ್ಗು ಸರಿಯಾಯಿ ನಿಟ ನೆರೆಯವನತ್ತೆಯ ನಿನ್ತರನೇ ಪ್ರೀತುಸ್ರುದುಯಿಂಗ್ರ ರಾಜಾಜ್ಞೆಯತ್ತೆಯ ನಿಂಗ ನೆರವೆರುಸ್ತಯಿಂದೆಕ್ಯ ನಿಂಗ ನಲ್ಲತತ್ತೆಯ ಸೈರಾಗ್ಯ , 9 ಅತ್ತ ಉಟ್ಟು ಪಕ್ಷಪಾತ ಕಟ್ರಗ್ಯಹಾಯಿಕ್ದೆ ನಿಂಗ ಪಾಪಸೈರಾಗ್ಯಹಾಯಿಂದು ಅಪರಾಧಯಿಂಡು ಧರ್ಮಶಾಸ್ತ್ರತಿಂಡು ತಿರ್ಮಾನಿಸಲ್ಪಡರಂಗ. ^{10 11} 10 ಯಾ೦ತ್ಗುಯಿಂಡೆಕ್ಯ ಎದನಾಅನೇಕು ಧರ್ಮಶಾಸ್ತ್ರತ್ತೆಯ ಕೈಗೊಂಡು ನಡ್ಜು ಒಂಡೇ ಒಂಡುಕೊರು ತಪ್ನೇಕೆ ಅದು ಅದ್ದಿ ವಿಷಯತ್ಗೋರು ಅಪರಾಧಿಅಕ್ದು. 11 ವ್ಯಭಿಚಾರಸೇಯಿರ್ದಂಚು ಯಿಂಡು ಸೋನ್ನಿಕ್ರದೆ ನರಹತ್ಯ ಸೈಯಿರ್ದಂಚುಯಿಂಡು ಸೋನ್ಸು .ಅತಿಂಡು ನೀನು ವ್ಯಭಿಚಾರಸೈದೆ ಇಂದೇಕು ನರಹತ್ಯ ಸೇನ್ದೆಕೆ ಧರ್ಮಪ್ರಮಾಣತ್ತೆಯ ಮಿರ್ನವ್ಅಯೋಗ್ರೆಸಿ. ^{12 13} 12 ನಿಂಗ ಬಿಡುಗಡೆಸೈರಾದು ಧರ್ಮಪ್ರಮಾಣತ್ ಪ್ರಕಾರ ತೀರ್ಮಾನತ್ತೆಯ ಹೊಂದ್ರಗಿಂಡು ವಸೇತಂಗೋ ,ನಡ೦ಗೋ . 13 ಕರುಣೆಕಾಟರ್ಕನಿ ಇಕ್ರತ್ಗು ನ್ಯಾಯತೀರ್ಮಾನತ್ಗೋರು ಕರುಣೆಯು ಕಾಟ್ರುಕುಅಗ್ದಿಲ .ಕರುಣೆಯು ನ್ಯಾಯತೀರ್ಮಾನತ್ತೆಯ ಗೆದ್ದಿ ಹಿಗ್ಗಕೂ. ^{14 15 16 17} 14 ನಟ ಅನ್ನಾತೆಂಬಿಮಾರ್ಲೆ ,ಒಂಡು ತನ್ಕು ನಂಬಿಕೆಯಿದೂಯಿಂಡು ಸೋನ್ನಿಗೊಂಡು ತಕ್ಕ ಕ್ರಿಯೆಯಿಲ್ದೆಯಿಕ್ರದೂ ಅಯಿನ್ದೇಕೆ ಪ್ರಯೋಜನಯೆಂದ ?ಅಂಥ ನಂಬಿಕೆಯೂ ಇತ್ತತ್ತೆಯ ರಕ್ಷಿಸಕೋ ? 15 ಒಂಡು ಸಹೋದರ್ನ್ಕು ಇಲ್ಲವೇ ಒಂಡು ಸಹೋದರ್ಕಿ ಬಟ್ಗು ಆ ನಾಲ್ತ 16 ಕಲಿ ಇಕ್ದೇ ಇಕ್ರಪೋದು ನಿಂಗ್ಲುಕೊರು ಒಂಡು ಅಲ್ಕಿ ಹೋಡುಮ್ಕು ಬೇಕೈಕ್ರತ್ತ ಕುಡ್ಕದೆ –ಸಮಾಧಾನತಿಂಡು ಹೊ. ನೇರ್ಪುಕಾಯಿಸ್ಗೋ ,ವರ್ಗುಮೆತ್ತಡುಸ್ಗೋ ಇಂಡು ಬರೀ ಹೋಕು ಸೋನ್ನೇಕೆ ಪ್ರಯೋಜನಯೆಂದ? 17 ಅನ್ಗೆ ಕ್ರಿಯೆಯಿಲ್ದೆಯಿಂದೆಕ್ಯ ನಂಬಿಕೆಯೂ ತನ್ನಚ್ಲಿ ಜೀವಯಿಲ್ಲರದೂ ^{18 19 20} 18 ಹೀಗಲ್ಲದಿಂದೆಕ್ಯ ಒಂಡು ಮಣ್ಸು –ನಿನ್ಕು ನಂಬಿಕೆಯಿದೂ ,ನನ್ಕು ಕ್ರಿಯೆಗಾಯಿದು ,ನಾನು ನಟ ಕ್ರಿಯೆಗಳ ಮುಖಾಂತರ ನಟ ನಂಬಿಕೆಯತ್ತೆಯ ನಿನ್ಕು ಕಾಟರೇ ;ನೀನು ಕ್ರಿಯೆಯಿಲ್ದೆ ನಿಟ ನಂಬಿಕೆಯತ್ತೆಯ ನನ್ಕು ಕಾಟೂ ಪಕೋಮು ಇಂಡು ಸೋನ್ನಕುಅಲ್ಯ . 19 ದವ್ರು ಒಂಡೇ ಇಂಡು ನೀನು ನಂಬ್ರದು .ಹಾನ್ಗೆ ನಂಬ್ರದು ನಲ್ಲದು .ದೌವಂಗ್ಲುನು ಹಾನ್ಗೆ ನಂಬಿ ಬಿತ್ಗೊಂಡು ನಡ್ಗಕ್ನು 20 ಅಪ್ರಯೋಜಕನೇ ,ಕ್ರಿಯೆಯಿಲ್ದೆಯಿಕ್ರ ನಂಬಿಕೆಯೂ ವ್ಯರ್ಥವೈದೂ ಇಂಗ್ರತ್ಗು ದೃಷ್ಟಾಂತಬೇಕಾ ?. ^{21 22 23 24} 21 ನಂಗ್ಲ ಪಿತೃಅನಾ ಅಬ್ರಹಾಮನು ಇಸಾಕಯಿಂಗ್ರ ತಟ ಮೌವತ್ತೆಯ ಯಜ್ಞವೇದಿಯ ಮೇನಿ ಅರ್ಪಿಸ್ನಪೋದು ನೀತಿವಂತಯಿಂಗ್ರ ನಿರ್ಣಯತ್ತೆಯ ಹೊಂದ್ನಾದೂ ಕ್ರಿಯೆಗಳಿಂಡುಲ್ಯ . 22 ಅತ್ರ ನಂಬಿಕೆಯು ಕ್ರಿಯೆಗಲಿಂಡು ಪ್ರವರ್ತಿಸಿ ಆ ಕ್ರಿಯೆಗಲಿಂಡೆ ಸಿದ್ದಿಕು ವಂಚುಯಿಂಗ್ರತ ಕಾ – ಗಾಕುಅಲ್ಯ .... 23 ಅಬ್ರಹಾಮನು ದವ್ರತ್ತೇಯ ನಂಬ್ಸು ;ಆ ನಂಬಿಕೆ ಅತ್ರ ಲೆಕ್ಕುತ್ಗು ನೀತಿಯಿಂಡು ಎಣಿಸಲ್ಪಟ್ಸು ಇಂಗ್ರ ಶಾಸ್ತ್ರತ ಹೋಕು ಹಿನ್ಗು ನೆರವೆರ್ಸು ,ಮತ್ತೆ ದವ್ರ ಸ್ನೇಹಿತಯಿಂಗ್ರ ಪೇರು ಅತ್ಗು ಉಂಟಾಸು . 24 ಮಣ್ಸು ಕ್ರಿಯೆಗಲಿಂಡು ನೀತಿವಂತಯಿಂಡು ನಿರ್ಣಯಿಸಲ್ಪಡಕು ಹೊರೆತು ಬರೀ ನಂಬಿಕೆಯಿಂಡಲಯಿಂಡು ಪಕಾರಂಗ. ^{25 26} 25 ಅದೇ ರೀತಿಯಾಯಿ ಸೂಳೆಹಾನ ರಹಾಬಳು ಗೂಢಚಾರತ್ತೆಯ ತಟ ಉಟ್ಗೋರು ಅಗುಸ್ಗೊಂಡು ಬೇರೆ ಹೇಗಿಯಿಂಡು ಐಲ್ಯತ್ತೆಯ ಅಮ್ಪ್ನತ್ಗೊರು ಕ್ರಿಯೆಗಳಿಂಡೆ ನೀತಿವಂತಲಿಂಗ್ರ ನಿರ್ಣಯತ್ತೆಯ ಹೊಂದುಸುಅಲ್ಯ .... 26 ಆತ್ಮಯಿಲ್ದೆಯಿಕ್ರ ಹೊಡ್ಮು ಸೆತ್ತಿಕ್ರ ತರ ಕ್ರಿಯೆಯಿಲ್ದೆಯಿಕ್ರ ನಂಬಿಕೆಯೂ ಸೆತ್ತಿಕ್ರದೇ.