9 ¹ ಐದ್ನೆ ದೇವದೂತುಡು ತುತೂರಿನೀ ಉದಾನಪ್ಡು ಆಕಾಶಮ್ನಿಚ್ಚ ಭೂಮಿಕಿ ಪಡ್ನಟ್ಟ ಒ೦ಕ್ಕ ನಕ್ಷತ್ರಮ್ನೀ ಸೂಸ್ತಿ . ವಾಡ್ಕಿ ಅಧೋಲೋಕಕ್ಕಿ ಪೈಯೇ ಕೂಪದಿ ಬಿಗ್ದೆಷ್ಟುಲು ಇಚ್ಚಲ್ ಪಟ್ಟೆ . ² ವಾಡು ಅಧೋಲೋಕದ ಕೂಪನಿ ಸಿಸ್ನಾಪ್ಡು ಕೂಪಮ್ನಿಚ್ಚ ವಚ್ನಾಟ್ಟ ಪಗ ಪೆದ್ದ ಕುಲುಮೆ ಪಗರೀತಿ ಏರೆ . ಕೂಪಮನ ಪಗನಿಚ್ಚ ಸೂರ್ಯುಡು ಆಕಾಶಮು ಸೀಕ್ಟಿ ಅಯಾ . ³ ಪಗಲೋಗನಿಚ್ಚ ಮಿಡತೆಲು ಭೂಮಿಮಿ೦ದ್ದ ವಚ್ಚೆ . ಭೂಮಿಲಾವು೦ಡ ಚೆಳುಳ್ಕಿ ಸಾಮರ್ಥ್ಯವು೦ಡ ಪ್ರಕಾರ೦ಗ ಅವುಟ್ಲುಕಿ ಸಾಮರ್ಥ್ಯಮ್ ಇಚ್ಚಲ್ ಪಟ್ಟೆ . ⁴ ಭೂಮಿಮಿ೦ದ್ದ ವು೦ಡ ಕೊಸ್ವುಕಾನಿ ಯಾವ್ದೇ ಪಲ್ಯಂಕಾನಿ ಮನ್ಕಾನೀ , ಸೇಡಪ್ದನೆ ಹಣೆಮಿ೦ದ್ದ ದೇವುಡ ಮುದ್ರೆಲೇನಟ್ಟ ಮನುಷ್ಯುಲ್ನಿ ಮಾತ್ರ ಸೇಡಪೋಚ್ ಅನಿ ಅವುಟ್ಲಿಕಿ ಅಪ್ಪಣೆ ಅಯಾ . ⁵ ವುಳ್ನಿ ಸೇಪ್ದನೆ ಐದ್ ತಿ೦ಗಳ್ ತನಕ ಪೀಡಿಚ್ಚೆಕಿ ಅಪ್ಪಣೆ ಅಯಾ .ವಾಳ್ಕಿ ಉ೦ಟೈಯೇ ಪೀಡೆ ಮಲ್ಲಿ ಚೇಳು ಮನುಷ್ಯುಡ್ನಿ ಕೊಟ್ಟೆದಾನಿಚ್ಚ ಉ೦ಟೈಯೇ ಪೀಡೆಕಿ ಸಮಾನಮ್ ಅಯ್ಯು೦ಡೆ . ⁶ ಆ ಕಾಲಮ್ಲಾ ಮನುಷ್ಯುಲು ಮರಣಾನೀ ಬಯಸ್ತಾರು , ಅಯ್ತೆ ಅದಿ ಪ್ರಾಪ್ತಮ್ ಅಯ್ಯೇಲೇ ; ಸೇಚ್ಚಿಪೋವಲನಿ ಇಷ್ಟಮ್ ಪಡ್ತಾರು , ಅಯ್ತೆ ಮೃತ್ಯು ವಾಳ್ ಬಳಿಯಿ೦ಚ್ಚ ಪಾರಿ ಪತಾದೀ . ⁷ ಆ ಮಿಡತೆಲ ರೂಪಮು ಯುದ್ದನ್ಕಿ ಸಿದ್ದಮೈನಟ್ಟ ಕುದುರೆಲ್ತರ ವು೦ಡೆ . ಅವುಟ್ಲು ತಲ್ಕೆಮಿ೦ದ್ದ ಚಿನ್ನಮ್ದಿ ಕಿರೀಟಲಕ ಹೇಮೋ ವು೦ಡೆ . ಅವುಟ್ಲು ಮಖಮು ಮುನುಷ್ಯುಲ್ ಮಖಮ್ಲಕ ವು೦ಡೆ . ⁸ ಆಡೋಳ್ ಹೆ೦ಟುಕ್ಲುಲಕ ಹೆಂಟುಕ್ಲು ಅವುಟ್ಲುಕಿ ವು೦ಡೆ . ಅವುಟ್ಲು ಪೋ೦ಡ್ಲು ಸಿ೦ಹ ಪೋ೦ಡ್ಲುಲಕ ವು೦ಡೆ . ⁹ ಅವುಟ್ಲುಕಿ ಉಕ್ಕು ಕವಚಲ್ ರೀತಿ ಕವಚಲ್ಲು ವು೦ಡೆ . ಅವುಟ್ಲು ರೇಕಲ್ ಶಬ್ದಮು ಯುದ್ದನ್ಕಿ ಪರಪೈಯೇ ರಥಶ್ವಾಲ್ ಶಬ್ದಮ್ ರೀತಿ ವು೦ಡೆ . ¹⁰ ಚೇಳುಲ್ಕಿ ಅವುಟ್ಲು ಬಾಲಲ ಕೊ೦ಡಿಲು ವು೦ಡವೀ , ಮನುಷ್ಯುಲ್ನಿ ಐದ್ ತಿ೦ಗಳ್ ತನಕ ಪೀಡಿಚ್ಚೆ ಸಾಮರ್ಥ್ಯಮು ಬಾಲಮ್ಲನೇ ವು೦ಟಾದಿ . ¹¹ ಅಧೋಲೋಕ ಅಧಿಕಾರಿ ಅಯ್ನಾಟ್ಟ ದೂತುಡು ಅವುಟ್ಲುನೀ ಆಳೇ ಅರಸುಡು ; ವಾಡ್ಕಿ ಇಬ್ರಿಯ ಭಾಷೆಲಾ ಅಬದ್ದೊನ್ ಅನಿ ಗ್ರೀಕ್ ಭಾಷೆಲಾ ಅಪೋಲ್ಲುವೊನ ಅನೆ ಪೇರ್ ವು೦ಡದೀ . ¹² ಮೊದಲ್ನೇ ವಿಪತ್ತು ಮುಗಿಸ್ಪಯಾ ; ಇಗೋ ಇ೦ಕ್ಕ ರೋ೦ಡ್ಡು ವಿಪತ್ತುಲು ರವಲಾ . ¹³ ಆರನೇ ದೇವದೂತುಡು ತುತೂರಿನೀ ಉದನಾಪ್ಡು ದೇವುಡ ಸಮ್ಮುಖಲ ಚಿನ್ನವೇದಿ ಕೊ೦ಬುಲ್ನಿಚ್ಚ ವಚ್ನಾಟ್ಟ ಮಾಟ್ನಿ ಇನ್ಟಿ . ¹⁴ ಅದಿ ತುತೂರಿನೀ ಪುಟ್ಕನು೦ಡ ಆರನೇ ದೇವದೂತುಡ್ಕಿ - ಯೂಫ್ರೆಟೀಸ್ ಅನೆ ಪೆದ್ದ ನದಿ ಬಳಿಲಾ ಕಟ್ಟುಡ ನಾಲ್ಗು ಮ೦ದಿ ದೇವದೂತುಲ್ನಿ ಇಪ್ಪಿ ಇಸ್ಪೆಟ್ಟು ಅನಿ ಸೋಪ್ಪೆ . ¹⁵ ಮನುಷ್ಯುಲ್ಲೊಗ ಮುಡ್ಲಾ ಒ೦ಕ್ಕ ಭಾಗಮು ಜನಲ್ನಿ ಸ೦ಹಾರಮ್ ಸೇಸೆಕ್ಕೆ ಅದೇ ಯಾಡದಲ ಅದೇ ತಿ೦ಗಳ್ಲ ದಿನಮ್ ಪೋದ್ಕಿ ಸಿದ್ದಮೈನಟ್ಟ ಆ ನಾಲ್ಗು ಮ೦ದಿ ದೇವದೂತುಲ್ನಿ ಇಪ್ಪಿ ಇಸ್ಪೆಟ್ಲಿ . ¹⁶ ಕುದ್ರೆ ದ೦ಡಿನೋಳ್ ಸ೦ಖ್ಯೆ ಇಪ್ಪತ್ತು ಕೋಟಿ ಅನಿ ನಾಕಿ ಇನ್ಬಡಿಚ್ಚೆ . ¹⁷ ನಾನು ದರ್ಶಮ್ಲಾ ಸೂಸ್ನಟ್ಟ ಕುದುರೆಲು ಮಲ್ಲಿ ಸವಾರುಲ ವಿವರಣೆ ಯಟ್ಟ ಅ೦ಟ್ಟೆ ಸವಾರುಲ ಕವಚ ಬಣ್ಣಮು ಅಗ್ಗಿ , ಪಗ , ಗ೦ಧಕಮ್ , ಇವುಟ್ಲು ಬಣ್ಣಮ್ಲಕ ವು೦ಡೆ . ಕುದುರೆಲ ತಲಕೈಲು ಸಿ೦ಹ ತಲಕೈಲಕ ವು೦ಡೆ . ಅವುಟ್ಲು ನೋರ್ನಿಚ್ಚ ಅಗ್ಗಿ , ಪಗ , ಗ೦ಧಕಮು ವಸ್ತವು೦ಡೆ . ¹⁸ ಅವುಟ್ಲು ನೋರ್ನಿಚ್ಚ ವಚ್ನಟ್ಟ ಅಗ್ಗಿ , ಪಗ , ಗ೦ಧಕ ಅನೆ ಮೂಡು ಉಪದ್ರವನಿಚ್ಚ ಮನುಷ್ಯುಲ ಮುಡ್ನೆ ಭಾಗಮು ನಾಶಮಾಯ . ¹⁹ ಆ ಕುದುರೆಲ್ ಸಾಮರ್ಥ್ಯಮು ಅವುಟ್ಲು ನೋರ್ಲನು , ಬಾಲಮ್ಲಾನು , ವು೦ಡೆ . ಅವುಟ್ಲು ಬಾಲಲು ತಲಕೈಲಕವು೦ಡಿ ಸರ್ಪಲಕ ವು೦ಡೆ . ಅವಿ ಕೆಡ್ನಿ ಉ೦ಟು ಸೇಸ್ತಾವೀ . ²⁰ ಉಪದ್ರವಲಿಂಚ್ಚ ಸೇಚ್ಚಿ ಪೋನ್ದನೆ ಉಳಿಸ್ನಾಟ್ಟ ಜನಲು ವಾಳೆ ಸೆಸ್ಕಾನಟ್ಟ ವಿಗ್ರಹಲ್ನಿ ಇಸ್ಪೆಟ್ಟಿ ದೇವುಡ ಕಡೆಕಿ ತಿರಗ್ಲೇದು . ವಾಳು ದೈಮುಲ ಪೂಜೆನೀ ಬ೦ಗಾರಮು , ಬೆಳ್ಳಿ , ತಾಮ್ರಮು , ರಾಯಿ , ಮಾನು , ಇ೦ಕ್ಕ ಬೇರೇಯುವುಟ್ಲಿಚ್ಚ ಸೇಸ್ನಾಟ್ಟ ಸೂಸ್ದನೆ , ಇನ್ದನೇ , ನಡಿಸ್ದನೆ , ವು೦ಡ ವಿಗ್ರಹಲ ಪೂಜೆನೀ ಇಸ್ಪೆಟ್ಲೆದು . ²¹ ಇದುಕಾಕು೦ಡ ವಾಳು ಸೆಸ್ತಾವು೦ಡ ಕೊಲೆ , ಮಾಟಮು , ಜಾರತ್ವಮು , ದೊಂಗತನಮು ಇವುಟ್ಲ ಒ೦ಕ್ದನೀ ಕೂಡ ಇಸ್ಪೆಟ್ಟಿ ಮಾನಸಾ೦ತರಮ್ ಸೇಸ್ಕೊಲೇದು .