10 ¹ ತರುವಾಯಮು ಬಲಿಷ್ಟಮೈನ ಇ೦ಕ್ಕೋಕ ದೇವದೂತುಡು ಪರಲೋಕಮ್ನಿಚ್ಚ ದಿಗಿ ವಚ್ಚೆದಾನಿ ಸೂಸ್ತಿ . ವಾಡು ಮೇಘನೀ ಧರಿಬಿಚ್ಕೊವು೦ಡೆ ; ವಾಡ್ ತಲಕೈಮಿಂದ್ದ ಮುಗಿಲು ಬಿಲ್ಲು ವು೦ಡೆ ; ವಾಡ್ ಮಖಮು ಸೂರ್ಯೋಪಾಧಿವು೦ಡೆ . ² ವಾಡ್ ಪಾದಲು ಅಗ್ಗಿ ಕ೦ಬಲಕ ವುಂಡೆ ; ವಾಡ್ ಸೇತ್ಲಾ ಇಪ್ನಾಟ್ಟ ಒ೦ಕ್ಕ ಸನ್ನಿದಿ ಸುರುಳಿ ವುಂಡೆ ; ವಾಡು ಕುಡುಮ್ ಕಾಲ್ನಿ ಸಮುದ್ರಮ್ಮಿಂದ್ದನೂ ಹೇಡಮ್ ಕಾಲ್ನಿ ಭೂಮಿಮಿನ್ದನೂ , ಪೆಟ್ಟಿ ಸಿ೦ಹಮೂ ಗರ್ಜಿಚ್ಚೆ ಪ್ರಕಾರ೦ಗ ಪೆದ್ದ ಶಬ್ದಮ್ನಿಚ್ಚ ಕೂಸೆ . ³ ಕೂಸ್ನಾಪ್ಡು ಯೋಡು ಗುಡುಗುಲು ಒಕ್ಕೋಕ್ ಟೈಯಿ ಮಾಟನಿ ಇಚ್ಚೆ . ಆ ಯೋಡು ಗುಡುಗುಲು ಮಟ್ಲಾಡ್ನಪ್ಡು ನಾನು ರಾತಮು ಅನ್ಕೊನ್ನುಟ್ಟಿ . ಅಯ್ತೆ - ಆ ಯೋಡು ⁴ ಗುಡುಗುಲು ಮಟ್ಲಾಡಿನ್ದಾನಿ ನೂವ ರಾಸ್ದನೆ ಗುಪ್ತಮೈಯ್ಯಿ ಪೆಟ್ಟು ಅನೆ ಸೋಪ್ಪ ಆಕಾಶ ವಾಣಿನೀ ಇನ್ಟಿ . ⁵ ಅಮೆಕಿ೦ದ್ದ ಸಮುದ್ರಮಿನ್ದನೂ , ಭೂಮಿಮಿನ್ದನೂ , ನಿಲ್ಚಕನ್ ವು೦ಡೆ ರೀತಿ ನಾಕಿ ಕಮಡಿಚ್ಚಿನಾ ದೇವದೂತುಡು ವಾಡ್ ಕುಡಮ್ ಸೈ ಎತ್ತಿ ಪರಲೋಕಮ್ನೀ ದಾಟ್ಲವುಂಡ ಸಮಸ್ತನ್ನಿ , ಭೂಮಿಲಾವುಂಡ ಸಮಸ್ತನ್ನಿ , ⁶ ಸಮುದ್ರಮ್ಲಾವುಂಡ ಸಮಸ್ತನ್ನಿ ಸೃಷ್ಟಿಚ್ಚಿ ಯುಗಯುಗಾ೦ತರಮ್ಲಾನು ಜೀವಿಚ್ಚೆ ಆತುಡ ಮಿಂದ್ದ ಆಣೆ - ಪೆಟ್ಟಿ ಇಕ್ಕ ಅವಕಾಶಮು ವುಂಡೆಲೇದು . ⁷ ದೇವದೂತುಡು ಶಬ್ದಮ್ ಸೇಸ್ಸೇ ದಿನಮ್ಲಾ ಅಟ್ಟೆ ವಾಡು ತುತೂರಿನೀ ಊದೇ ಸಮಯಮ್ಲ ದೇವುಡು ಇನ್ನಿ ತನಕ ಗುಪ್ತಮೈ ಪೆಟ್ನಾಟ್ಟ ಸ೦ಕಲ್ಪನೀ ತನ್ ದಾಸುಲ್ ಐನಾ ಪ್ರವಾದಿಲ್ಕಿ ಶುಭವರ್ತಮೈಯ್ಯಿ ತಿಲಿಬಿಚ್ನಟ್ಟ ಪ್ರಕಾರ೦ಗ ನೇರೆವೇರಿಸ್ತಾಡು ಅನಿ ಸೊಪ್ನಾಡು . ⁸ ಅಮೆಕಿ೦ದ್ದ ಪರಲೋಕಮ್ನಿಚ್ಚ ನಾಕಿ ಇನ್ಬಡಿಚ್ನಾಟ್ಟ ಶಬ್ದಮು ತಿರುಗಿ ನಾ ಜೊತ್ಲಾ ಮಾಟಾಡಿ ನೂವ ಪೈಯ್ಯಿ ಸಮುದ್ರಮಿನ್ದನೂ , ಭೂಮಿಮಿನ್ದನೂ ನಿಲಚ್ಕನ್ನುಂಡ ದೇವದೂತುಡ ಸೈಲಾ ವುಂಡ ಆ ಇಪ್ನಾಟ್ಟ ಸುರುಳಿನೀ ಸಿಸ್ಕೋ ಅನಿ ಸೋಪ್ಪೆ . ⁹ ನಾನು ದೇವದೂತುಡ ಹತ್ರನ್ಕಿ ಪೈಯ್ಯಿ ಆ ಸನ್ನ ಸುರುಳಿನೀ ನಾಕಿ ಇಯ್ಯಿ ಅನಿ ಅಡಗ್ನಪ್ಡು ವಾಡು ನಾಕಿ - ನೂವ ದಿನ್ ನೀ ಸಿಸ್ಕೊನೀ ತಿನೀಡಿ , ಇದಿ ನೀ ಕೊಡಪ್ನಿ ಕಹಿ ಅಯ್ಯೇ ರೀತಿ ಸೇಸ್ತಾದೀ ಅಯ್ತೆ ನೀ ನೋಟ್ಲ ಜೇನ್ಕಿಂತ ಸಿಹಿ ಅಯ್ಯಿ ವುಂಟಾದೀ ಅನಿ ಸೋಪ್ಪೆ . ¹⁰ ಅಪ್ಡು ನಾನು ಆ ಸುರಳಿನೀ ಆ ದೇವದೂತುಡ ಸೈಯಿಚ್ಚ ಸಿಸ್ಕೊನಿ ತಿನಿಸ್ತಿ . ಅದಿ ನಾ ನೋಟ್ಲ ಜೇನ್ಲಕ ಸಿಹಿ ಅಯ್ಯುಂಡೆ ; ದಾನಿ ತಿನ್ ಅಮೆಕಿ೦ದ್ದ ನಾ ಕೊಡ್ಪು ಕಹಿ ಅಯಾ . ¹¹ ಅಮೆಕಿ೦ದ್ದ ಇ೦ಕ್ಕ ನೂವ ಅನೇಕಮೈನಟ್ಟ ಪ್ರಜೆಲು , ಜನಮು , ಭಾಷೆ , ರಾಜುಲು , ವುಳ್ ವಿಷಯಮ್ಲ ಪ್ರವಾದನೇನೀ ಸೋಪ್ಪಾಲ್ ಅನಿ ನಾಕಿ ತಿಲ್ಬಿಚಲ್ ಪಟ್ಟೆ .