11 ¹ ತರುವಾಯಮು ದಂಡಮ್ಲಕ ವುಂಡ ಒಕ್ಕ ಅಳತೆ ಕಟ್ಟಾ ನಾ ಸೇತ್ಕಿ ಇಚ್ಚಲ್ಪಟ್ಟೆ . ಮಲ್ಲಿ ಒಕ್ಕ ವಾಣಿ ಉಂಟಾಯ . ಅದಿ ನಾಕಿ ಸೋಪ್ಪಿದ್ ಹೆಮಂಟ್ಟೆ - ನೂವ ಲೇಸಿ ದೇವುಡ ಆಲಯಾನೀ ಯಜ್ಞವೇದಿನೀ ಅಳತೆ ಸೇಸಿ ಆಲಯಮ್ಲಾ ಆರಾಧನೆ ಸೇಸೋಳ್ನಿ ಲೇಕ್ಕಮ್ ಸೇಯ್ಯಿ . ² ಆಲಯನ್ಕಿ ಅತಾರವುಂಡ ಅ೦ಗಳಾನೀ ಅಳತೆ ಸೇಸ್ದನೆ ಇಸ್ಪೆಟ್ಟು ; ಅದಿ ಅನ್ಯ ಜನಲಕೈಯ್ಯಿ ಇಸ್ಪೆಟ್ಟುಡಾದೀ ; ವಾಳು ಪರಿಶುದ್ದ ಪಟ್ಟಣಮ್ನಿ ನಲ್ಪೆರೊಂಡು ನೆಲ್ಲು ತೊಕ್ತಾರೂ . ³ ನಾ ಇದ್ರೂ ಸಾಕ್ಷಿಲು ಗೊನ್ತಿತ್ನಿ ಕಟ್ಕೊನೀ ಸಾವಿರದ ಇನ್ನೂರ ಅರವೈ ದಿನಲ್ ತನಕ ಪ್ರವಾದಿಚ್ಚೆ ರೀತಿ ಸೇಸ್ತಾನೂ . ⁴ ಭೂಮಿ ಒಡೆಯುಡ್ ಮುದ್ರ ನಿಲ್ಚನುಂಡ ರೊಂಡು ಎಣ್ಣೆ ಮಾನ್ಲು ರೊಂಡು ದೀಪಸ್ತಂಭಲು ವೂಳೆ . ⁵ ವುಳ್ಕಿ ಯೋವಡ್ ಐತ್ನೂ ಕೆಡ್ನಿ ಉಂಟುಸೇಯಲಾ ಅನ್ಕನುಟ್ಟೆ ವುಳ್ ನೋಟ್ನಿಚ್ಚ ಅಗ್ಗಿ ವಚ್ಚಿ ವುಳ್ ಶತ್ರುಲ್ನಿ ದಹಿಸ್ತಾದೀ . ⁶ ವುಳ್ಕಿ ಯೋವಡ್ ಐತ್ನೂ ಕೆಡ್ನಿ ಉಂಟುಸೇಯಲಾ ಅನ್ಕನುಟ್ಟೆ ವಾಡ್ಕಿ ಈ ರೀತಿಅಯ್ಯಿ ಕೊಲೆಕವಲಾ . ವಾಳು ಪ್ರವಾದಿಚ್ಚೆ ದಿನಮ್ಲಾ ವಾನ ರಾನ್ನಟ್ಗ ಆಕಾಶಮ್ನಿ ಮೂಸೆ ಅಧಿಕಾರಮು ವುಳ್ಕಿ ವುಂಡಾದೀ . ಇದುಕಾಕು೦ಡ ವುಳ್ಕಿ ಇಷ್ಟಮ್ ವಚ್ನಾಪ್ಡೆಲ್ಲಾ ನೂಳ್ನಿ ರಕ್ತಮ್ ಸೇಸೆಕ್ಕು ಅನೇಕ ಉಪದ್ರವಲ್ನಿಚ್ಚ ಭೂಮಿನೀ ಪಿಡಿಚ್ಚೆಕ್ಕೂ ಅಧಿಕಾರಮ್ ವುಂಡಾದೀ . ⁷ ವೂಳು ವುಳ್ ಸಾಕ್ಷಿನೀ ಸೊಪ್ಪಿ ಮುಗಿಚ್ ಅಮೆಕಿ೦ದ್ದ ಅಧೋಲೋಕಂನಿಚ್ಚ ವಚ್ಚೆ ಮೃಗಮು ವುಳ್ ಮಿಂದ್ದ ಯುದ್ದಮ್ ಸೇಸ್ಸಿ ವುಳ್ನಿ ಜಯಿಚ್ಚಿ ಸೇಪ್ತಾದೀ . ⁸ ಸಾಕ್ಷಿಲಾ ಶವಲೂ ಪೆದ್ದ ಪಟ್ಟಣಮ್ ಬೀದಿಲಾ ಪೋಡುನ್ಟಾವಿ . ಆ ಪಟ್ಟಣಕ್ಕಿ ಗೂಡಾರ್ಥಮೈಯ್ಯಿ ಸೋದೊಮ್ ಅನಿ ಐಗುಪ್ತಮು ಅನಿ ಪೇರುಲು ವುನ್ನಾವೀ ; ವುಳ್ ಒಡೆಯುಡು ಕೂಡ ಶಿಲುಬೆಕಿ ಹೇಸ್ಸುಡ್ಲಿ . ⁹ ಸಕಲ ಪ್ರಜೆಲೂ ಕುಲಮು ಭಾಷೆ ಜನಾಂಗಲ್ಕಿ ಸೆರುನ್ಡೋಳು ಈ ಸಾಕ್ಷಿಲಾ ಶವಲ್ನಿ ಮೂಡು ನರ್ ದಿನಲ್ ತನಕ ಸೂಸ್ತಾ ವುಂಟಾಳು . ಅವುಟ್ಲುನೀ ಸಮಾಧಿಕಿ ಪೆಟ್ಟೆಕಿ ಇಸ್ಪೆಟಲೇದು . ¹⁰ ಈ ಇದ್ರೂ ಪ್ರವಾದಿಲು ಭೂನಿವಾಸಿಲ್ನಿ ಪಿಡಿಚ್ಚೆದಾನ್ನಿಚ್ಚ ವುಳು ಸೇಚ್ಪೋಯಿನ್ದಾನ್ಕಿ ಭೂನಿವಾಸಿಲೂ ಸಂತೋಷಮ್ ಪಡಿ ಒಕ್ಕುಲ್ಕಿ ಒಕ್ಲು ಉಡುಗೋರೆಲ್ನಿ ಅಂಪಿಸ್ತಾರು . ¹¹ ಮೂಡು ನರ್ ದಿನಲ್ ಅಮೆಕಿ೦ದ್ದ ದೇವುಡ್ನಿಚ್ಚ ಜೀವಾತ್ಮಮು ವಚ್ಚಿ ಆ ಶವಲ್ ಮಿಂದ್ದ ಪೈನಪ್ಡು ಅವಿ ಕಾಲೂರಿ ನಿಲಚ್ಕನೆ .ಅವುಟ್ಲುನೀ ಸುಸ್ನಟೋಳ್ಕಿ ಪೆದ್ದ ಭಯಮು ಪುಟ್ಕನೆ . ¹² ಅಮೆಕಿ೦ದ್ದ ವಾಳ್ಕಿ - ಗೀಕಿ ಪೈನ್ಕಿ ರಾಂಡಿ ಅನೆ ಆಕಾಶ ವಾಣಿ ಅಯಾ . ದಾನಿ ವಾಳು ಇನಿ ಮೇಘ ವಿಮಾನಮ್ಲಾ ಪರಲೊಂಕಕ್ಕಿ ಏರಿ ಪಾಯ್ಲಿ . ವಾಳ್ ಶತ್ರುಲು ವುಳ್ನಿ ಸೂಸ್ತಾ ವು೦ಡ್ಲಿ . ¹³ ಅದೇ ಸಮಯಮ್ಲಾ ಮಹಾಭೂಕ೦ಪಮ್ ಅಯ್ಯಿ ಆ ಪಟ್ಟಣಮ್ಲಾ ಪೋದ್ಲಾ ಒಕ್ಕ ಭಾಗಮು ಪೋಡಿ ಪಾಯ . ಆ ಭೂಕ೦ಪಮ್ನಿಚ್ಚ ಯೋಡು ಸಾವಿರ ಜನಲು ಸೇಚ್ಚಿಪಾಯ್ಲಿ . ಮಿಕ್ನೋಳು ಭಯಗ್ರಸ್ತುಲ್ ಅಯ್ಯಿ ಪರಲೋಕ ದೇವುಡ್ನಿ ಘನಪಡಿಚ್ಲಿ . ¹⁴ ರೊಂಡ್ನೆ ವಿಪತ್ತು ಮುಗಿಸ್ಪಾಯ ; ಇಗೋ ಮುಡ್ನೆ ವಿಪತ್ತು ಬಿರ್ನ ವಸ್ತಾದೀ ¹⁵ ಯೋಡ್ನೆ ದೇವದೂತುಡು ತುತೂರಿನೀ ಉದಾನಪ್ಡು , ಅಪ್ಡು ಪರಲೋಕಮ್ಲಾ ಮಹಾ ಶಬ್ದಮ್ ಉಂಟೈಯಿ - ಲೋಕ ರಾಜ್ಯಧಿಕಾರಮು ಮಾ ಕರ್ತುಡ್ಕೂ ಆತುಡು ಅಭಿಷೆಕಿಚ್ನೋಡ್ಕು ಉಂಟಾಯ ; ಆತುಡು ಯುಗಯುಗಾ೦ತರಮ್ಲಾನು ರಾಜ್ಯನೀ ಆಳ್ತಾಡು ಅನಿ ಸೋಪ್ಪೆ . ¹⁶ ತರುವಾಯಮು ದೇವುಡ ಸಮಕ್ಷಮಲಾ ವಾಳ್ ವಾಳ್ ಸಿ೦ಹಾಸನಮ್ ಮಿಂದ್ದ ಕುಚನುಂಡ ಇರವೈನಾಲ್ಗು ಮ೦ದಿ ಹಿರಿಯುಲು ಆತುಡ್ಕಿ ಅಡ್ಡಪೋಡಿ - ¹⁷ ಕರ್ತುಡೆ , ಸರ್ವಶಕ್ತಮೈನಟ್ಟ ದೇವುಡೆ , ಸದಾ ವುಂಡಆತುಡೆ , ನೂವ ನೀ ಮಹಾ ಅಧಿಕಾರನೀ ವಹಿಸ್ಕೊನೀ ಆಳಿನ್ದಾನ್ಕಿ ನೀಕಿ ಕೃತಜ್ಞತಾಸುತ್ತಿನೀ ಸಲ್ಲಿಬಿಸ್ತಾಮು . ಜನಾ೦ಗಲೂ ಕೊಪಿಚ್ಕೊನೆ , ನೀ ಕೊಪಮು ಪ್ರಕಟಮಾಯ . ¹⁸ ಸೇಚ್ಚಿಪೋನೋಳು ತಿರ್ಪುನೀ ಹೊಂದೆ ಸಮಯಮು ವಚ್ಚಿಂದಿ . ನೂವ ನೀ ದಾಸಲೈನ ಪ್ರವಾದಿಲ್ಕೂ ದೇವುಡ್ ಜನಲ್ಕೂ ನೀ ನಾಮಕ್ಕಿ ಭಯಮ್ ಪೊಡೆ ಪೆದ್ದೊಳ್ಕೂ , ಸಂನೋಳ್ಕೂ ಪ್ರತಿಫಲನೀ ಇಚ್ಚಿ ಲೋಕ ನಾಶಕಲ್ನಿ ನಾಶಮ್ ಸೇಸ್ತಾವ್ ಅನಿ ಆತುಡ್ನಿ ಆರಾಧಿಚ್ಲಿ . ¹⁹ ಅಪ್ಡು ಪರಲೋಕಮ್ಲಾ ವುಂಡ ದೇವುಡ್ ಆಲಯಮು ತೆರ್ಸೆ ; ಆತುಡು ಆಲಯಮ್ಲಾ ಆತುಡ ಒಡಂಬಡಿಕೆ ಮಂಜೂಷಮು ಕಮಡಿಚ್ಚೆ ; ಇದುಕಾಕು೦ಡ ಮಿಂಚುಲೂ , ವಾಣಿಲೂ , ಗುಡುಗುಲೂ , ಭೂಕಂಪಮ್ಮು , ಪೆದ್ದ ಆನೆಕಲ್ಲಿನ ವಾನನೂ ಉಂಟಾಯ .