12 ¹ ಪರಲೋಕಮ್ಲಾ ಒ೦ಕ್ಕ ಮಹಾ ಲಕ್ಷ್ಮಣಮೂ ಕಮಡಿಚ್ಚೆ . ಅದೇಮ್ ಅಂಟ್ಟೆ ಸೂರ್ಯುಡ್ನಿ ಧರಿಚ್ಕನು೦ಡ ಒ೦ಕ್ಕ ಸ್ತ್ರೀ ವುಂಡೆ ; ದಾನ್ ಕಾಳ್ಳು ದುಗುನ ಚಂದ್ರುಡು ವುಂಡೆ . ದಾನ್ ತಲಕೈಮಿಂದ್ದ ಪನ್ನೆಂಡು ನಕ್ಷತ್ರಲ್ ವುಂಡ ಒ೦ಕ್ಕ ಕಿರೀಟಮೂ ವುಂಡೆ . ² ಆ ಸ್ತ್ರೀ ಗರ್ಭಿಣಿ ಅಯ್ಯಿ ಪ್ರಸವವೇದನೆಯಿಂಚ ಸಂಕಟಮ್ನಿ ಪಡ್ತಾ ಕುಸ್ತಾವುಂಡೆ . ಪರಲೋಕಮ್ಲಾ ಇಕ್ಕೊಕ್ಕ ಲಕ್ಷ್ಮಣಮೂ ಕಮಡಿಚ್ಚೆ . ³ ಅದೇಮ್ ಅಂಟ್ಟೆ ಯೆರ್ರಗೈನಟ್ಟ ಪೆದ್ದ ಘಟಸರ್ಪಮ್ ವುಂಡೆ ; ದಾನ್ಕಿ ಯೋಡು ತಲಕೈಲೂ ಪದಿ ಕೊಂಬ್ಲೂ ವುಂಡೆ ; ದಾನ್ ತಲಕೈಮಿಂದ್ದ ಯೋಡು ಮಕುಟಲು ವುಂಡೆ . ⁴ ದಾನ್ ತ್ವಕಾ ಆಕಾಶಮ್ಲಾ ವುಂಡ ನಕ್ಷತ್ರಲ್ಲೋಗ ಮುಡ್ಲಾ ಒಕ್ಕ ಭಾಗಮ್ನಿ ಎಳಸ್ಕೊನೀ ಭೂಮಿಕೀ ಹೇಸ್ಸೇ . ಹೇರ್ತಾ ವುಡ್ನಾಟ್ಟ ಆ ಸ್ತ್ರೀ ಹೆತ್ತ ತಕ್ಷಣಮೇ ಆಕೆಯ ಬಿಡ್ನಿ ನುಂಗಲನೀ ಆ ಘಟಸರ್ಪಮೂ ಗಾನೆ ಕಾಸ್ಕೊನ್ನುಂಡೆ . ⁵ ಆಕೆ ಜನಾಂಗಲ್ನಿ ಕಬ್ಬಿಣ ಕಟ್ನಿಚ್ಚ ಆಳಬೇಕೈನಟ್ಟ ಒಕ್ಕ ಮೋಕ್ ಸುನೋಡ್ನಿ ಹೇತ್ತೆ . ಆ ಬಿಡ್ಡ ತಕ್ಷಣಮೇ ದೇವುಡ ಬಳಿಕೀ ಆತುಡ ಸಿಂಹಾಸನ ಬಳಿಕೆ ಎತ್ತಲ್ಪಟ್ಟೆ . ⁶ ಆ ಸ್ತ್ರೀ ಅರಣ್ಯಂಕಿ ಪಾರಿ ಪಾಯಾ ; ಗಾನ ಆಕೆಕಿ ಸಾವಿರ್ದ ಇನ್ನೂರು ಅರವೈ ದಿನಲ್ ತನಕ ಪೋಷಣೆ ಅವಲನೀ ದೇವುಡು ಸ್ಥಳನ್ನಿ ಸಿದ್ದಮ್ ಸೇಸ್ಸುಂಡೆ . ⁷ ಪರಲೋಕಮ್ಲಾ ಯುದ್ದಮ್ ನಡ್ಸೆ . ಮೀಕಾಯೇಲುಡು ವಾಡ್ ದೂತುಲೂ ಘಟಸರ್ಪಮ್ ಮಿಂದ್ದ ಯುದ್ದಮ್ ಸೇಸ್ಸೇಕಿ ಪಾಯ್ಲಿ . ಘಟಸರ್ಪುಡು ವಾಡ್ ದೂತ್ಲೂ ಯುದ್ದಮ್ಲಾ ಸೊತ್ ಪಾಯ್ಲಿ . ⁸ ಮಲ್ಲಿ ಪರಲೋಕಮ್ಲಾ ವಾಳ್ಕಿ ಸ್ಥಾನಮು ತಪ್ಪಿ ಪಯಾ . ⁹ ಭೂಲೊಕ್ ಮೋಳ್ ಅಂದ್ರೂನೂ ಮರುಳು ಗೊಳಿಚ್ಚಂಟ್ಟ ಆ ಮಹಾ ಘಟಸರ್ಪುಡು ಅಂಟ್ಟೆ ಪಿಚಾಚಿ ಅನಿ ಸೈತಾನ ಅನಿ ಪೇರುಂಡ ಪುರಾತನ ಸರ್ಪಮು ದೊಬ್ಬಲ್ ಪಡಿ ಭೂಮಿಕೀ ಪಡೆ ; ವಾಡ್ ದೂತುಲೂ ವಾಡ್ ಜೊತ್ಲಾ ದೊಬ್ಬಲ್ ಪಡ್ಲಿ . ¹⁰ ಅಪ್ಡು ಪರಲೋಕಮ್ಲಾ ಪೆದ್ದ ಶಬ್ದಮ್ನಿ ಇನ್ಟಿ ಅದಿ - ಇಪ್ಡು ಜಯಮೂ ಶಕ್ತಿ ರಾಜ್ಯಮೂ ಮ ದೇವುಡ್ಕಿ ಉಂಟಾಯ ; ಆತುಡು ಅಭಿಷೆಕಿಚ್ನೋಡ ಅಧಿಕಾರಮು ಇಪ್ಡು ಸ್ಥಾಪಿತ ಮಾಯಾ ; ಹಗಲಿರುಳು ಮಾ ಸಹೋದುರುಡ್ ಮಿಂದ್ದ ಮಾ ದೇವುಡ ಮುಂದ್ರ ದೂರು ಸೋಪ್ನಾಟ್ಟ ದೂರುಗಾರುಡು ದೊಬ್ಬಲ್ ಪಡ್ನಾಡು . ¹¹ ವಾಳು ಪ್ರಾಣ ಮೇಲಣ ಪ್ರೀತಿನೀ ತೋರ್ಸಿ ಮರಣನ್ಕಿ ಹಿಂತೆಗಿಸ್ದನೆ ಯಜ್ಞದ ಕುರಿಯಾದಾತುಡ ರಕ್ತದ ಬಲಮ್ ನಿಚ್ಚ ತಮ್ ವಾಕ್ಯದ ಬಲಮ್ ನಿಚ್ಚ ವಾಡ್ನಿ ಜಯಿಚ್ಲಿ . ¹² ಪರಲೋಕಮೆ ದಾಟ್ಲಾ ವಾಸಮ್ ಸೇಸ್ಸೊಳೆ ಹರ್ಷಗೊಳ೦ಡಿ . ಭೂಮಿಯೇ , ಸಮುದ್ರಮೇ , ಮೀ ದುರ್ಗತಿನೀ ಹೆಮ್ ಸೋಪ್ಪುದ್ನೂ ; ಸೈತಾನುಡು ನಾಕಿ ವುಂಡ ಕಾಲಮೂ ಕೊಚ್ಮೂ ಅನಿ ತಿಲಿಚ್ಕೊನಿ ಮಹಾ ರೌದ್ರವುಳ್ಳೋಡ್ ಅಯ್ಯಿ ಮೀ ಹತ್ರನ್ಕಿ ದಿಗಿ ವಚ್ನಾಡು ಅನಿ ಸೋಪ್ಪೆ . ¹³ ಘಟಸರ್ಪುಡು ತಾನು ದೊಬ್ಬಲ್ ಪಡಿ ಭೂಮಿಕಿ ಪಡುಂಡೆ ದಾನ್ನಿ ಸೂಸ್ಸಿ ಮೋಕ್ ಸುನೋಡ್ನಿ ಹೆತ್ನಾಟ್ಟ ಆ ಸ್ತ್ರೀನೀ ಹಿಂಸಿಚ್ಚೆಕಿ ತೊಮ್ರುಕನೀ ಪಯಾ . ¹⁴ ಆ ಸ್ತ್ರೀ ಅರಣ್ಯಮ್ಲಾ ವುಂಡ ತನ್ ಸ್ಥಳನ್ಕಿ ಹಾರ್ ಪಯ್ಯೇಕಿ ಆಕೆಕಿ ಪೆಂದ್ದ ಗರುಡ ಪಕ್ಷಿಯ ರೆಕ್ಕೆಲು ಇಚ್ಚಲ್ ಪಟ್ಟೆ . ಗಾನಾ ಒಕ್ಕ ಕಾಲಮು , ರೊಂಡು ಕಾಲಮು , ಅರ್ಧ ಕಾಲಮು ಸರ್ಪುಡ ಮುಖಕ್ಕಿ ಮರೆ ಅಯ್ಯಿ ಪೋಷಣೆ ಹೊಂತಾದಿ . ¹⁵ ಸರ್ಪುಡು ಸ್ತ್ರೀನ್ನಿ ಹೇತ್ಕೊನ್ ಪೋವಲನೀ ಆಕೆ ಹೇಂಕ ತನ್ ನೋರಿ೦ಚ್ಚ ನೂಳ್ನಿ ನದಿ ರೀತಿ ಇಸ್ಪೆಟ್ಟೆ . ¹⁶ ಅಯ್ತೆ ಭೂಮಿ ಆ ಸ್ತ್ರೀಯ ಸಹಾಯಂಕಿ ವಚ್ಚಿ ನೋರ್ ಇಸ್ಪೆಟ್ಟಿ ಘಟಸರ್ಪುಡು ತನ್ ನೋರಿಂಚ ಇಸ್ಪೆಟ್ನಾ೦ಟ ನದಿನ್ನಿ ತಾಗೆಸೇ . ¹⁷ ಅಪ್ಡು ಘಟಸರ್ಪುಡು ಆ ಸ್ತ್ರೀ ಮಿಂದ್ದ ಕೊಪಮ್ ಸೇಸ್ಕೊನೀ ಆಕೆಯ ಸಂತಾನಮ್ಲಾ ಉಳಿಸ್ನಟೋಳ್ ಮಿಂದ್ದ ಅಂಟ್ಟೆ ದೇವುಡ ಆಜ್ಞೆಲ್ನಿ ಕೈಗೊನ್ನೀ ನಡ್ಸಿ ಯೇಸು ವಿಷಯಮೈಯ್ಯಿ ಸಾಕ್ಷಿನೀ ಸೋಪ್ನಾಟೋಳ್ ಮಿಂದ್ದ ಯುದ್ದಮ್ ಸೇಸ್ಸೇಕಿ ಪೈಯ್ಯಿ ಸಮುದ್ರ ತೀರ ಮರಳ್ ಮಿಂದ್ದ ನಿಲ್ಚನೇ .