¹ . ದಾನ್ನಿಂಚ ದೇವುಡು ಜನಲಾಯಿನ ಸಹೋದರುಲಾ ಪರ್ಲೋಕ್ಮು ಸ್ವಾಸ್ತ್ಮುಕ್ಕಾಯಿ ನಾಜೋತ್ಲ ಪಿಲ್ಚಿನೋಳಾ ಮಾಮು ಪ್ರತಿಜ್ಞೆ ಸೇಸಿ ಒಪ್ಕೊನುಂಡೆ ದೇವುಡು ಪ್ರೆರಿತ್ಮು ಪೆದ್ದ ಯಾಜಕುಡು ಆಯುಂಡೆ ಯೇಸುನಿ ಲಕ್ಷ್ಯುಮು ಪೆಟ್ಟಿ ಯೋಚನ್ಮು ಸೇಯಂಡ್ರಿ . ² . ಮೋಶೆಡು ದೇವುಡು ಇಂಟ್ಲ ಅಂತ ನಂಬಿಗಸ್ತುಡಾಯಿ ನಟ್ಗೆ ಯೇಸು ತನ್ನಿ ನೆಮಿಚ್ಚಿ ನೋಡಿಕಿ ನಂಬಿಗಸ್ತುಡಾಯಿನಾಡು . ³ . ಇಂಟ್ಕಿoತ ಇಲ್ ಕಟ್ನೋಡ್ಕಿ ಹೆಕ್ವಾಯಿನ ಮಾನ್ಮು ವುಂಡೆ ದಾನ್ನಿಂಚ ಮೊಶೇಡುಕ್ಕಿಂತ ಯೇಸು ಹೆಕ್ವಾಯಿ ಮಾನಮ್ಕಿ ಯೋಗ್ಯುಡನಿ ಎನ್ಬಿಚ್ಚಲ್ಪಡ್ನಾಡು . ⁴ . ಪ್ರತಿ ಇಂಟ್ನಿ ಯಾವ್ದೋ ಒಕ್ಡು ಕಟ್ಟಿನ್ನಾಡು ಸಮಸ್ತುಮ್ನಿ ಕಟ್ಟಿನೋಡು ದೇವುಡೆ ಮೋಶೆಡು ಸೇವಕುಡಾಯಿ ದೇವುಡು ಇಂಟ್ಲ ಅಂತ ನಂಬಿಗಸ್ತುಡಾಯುಂಡೆ . ⁵ . ವಾಡು ಮುಂದ್ರ ಪ್ರಕಟ್ಮು ಆಯ್ಬೆ ಕಾಯುಂಡಿನ ಸಂಗತಿಲ್ಕಿ ಸಾಕ್ಷಿನೂಯುಂಡೆ. ⁶ . ಕ್ರಿಸ್ತುಡೈಯ್ತೇನೋ ಕೊಡ್ಕಾಯಿ ದೇವುಡು ಇಂಟ ಮಿಂದ ಅಧಿಕಾರಿಡು ಆಯಿನಾಡು ಮಾಮು ಮಾ ಧೈರ್ಯಮ್ನಿ ಮಾ ನೀರಿಕ್ಷೆಯಿಂಚ ಉಂಟಾಯೆ ಉತ್ಸಾಹಮ್ನಿ ಕೊನೆ ಗಂಟ ದೃಡುಮೈಯಿ ಪಟ್ಕೊನ್ನೋಳಾಯ್ತೆ ಮಾಮೇ ದೇವುಡು ಇಂಟೊಳು . ⁷ . ದಾನ್ನಿಂಚ ಪವಿತ್ರಾತ್ಮುಡು ಸೋಪ್ಪೆ ಪ್ರಕಾರ್ಮು ಮೀರು ಈ ಬೋದ್ದು ದೇವುಡು ಶಬ್ದುಮ್ನಿ ಶವ್ವಿಸ್ತೆ . ⁸ . ಮೀ ಪೆದ್ದೋಳು ದೇವುಡು ಕೊಪ್ಮು ಲೇಪಿನ ಸ್ಥಳುಮ್ಲ ಅರಣ್ಯುಮುನೋನ ದೇವುಡುನಿ ಪರೀಕ್ಷಿಚ್ಚಿನ ದಿನುಮ್ಲ ಸೇಸಿನಟ್ಗೆ ಮೀ ಹೃದಯುಮ್ಲನಿ ಕಠಿಣ್ಮು ಸೇಸ್ಕೊವದಂಡ್ರಿ . ⁹ . ವಾಳು ಅರಣ್ಯುಮುಲ ನನ್ನಿ ಪರೀಕ್ಷಿಚ್ಚಿ ಶೋದಿಚ್ಚಿನಲಪೈ ಎಂಡ್ಳು ನಾನು ನಡ್ಬಿಸ್ತವುಂಡಿನ ಕೃತ್ಯಲ್ನಿ ಸೂಸ್ರಿ . ¹⁰ . ದಾನ್ನಿಂಚ ನಾನು ಆ ಸಂತತಿಯೋಳ್ ಮಿಂದ ಹೆಕ್ವಾಯಿ ಕೊಪ್ಮು ಸೇಸ್ಕೊನಿ ವಾಳು ಎಪ್ಡೂ ಹ್ರುದಯುಮ್ಲ ತಪ್ಪಿಪಾಯೋಳು ಅನಿ ಸೊಪ್ತಿ ಆಯ್ತೆ ವಾಳು ನಾ ಮಾರ್ಗಲ್ನಿ ತಿಲ್ಚ್ಕೋಲೇದು . ¹¹ . ಇಟ್ಟುಂಡೆದಾಯಿ ವೂಳು ನಾ ವಿಶ್ರಾಂತ್ಮುಲ ಸೇರೆಕೆ ಲೇದು ಅನಿ ಕೋಪ್ಮು ಸೇಸ್ಕೊನಿ ಪ್ರಮಾಣ್ಮು ಸೇಸ್ತಿ . ¹² . ಸಹೋದರುಲಾ ಸೂಸ್ಕೊಂಡ್ರಿ ಜೂಡು ಸ್ವರೂಪ್ಮು ಆಯಿನ ದೇವುಡ್ಕಿ ಇಡ್ಸಿ ಪಾಯೇ ಅಪನಂಬುಕ್ಮು ವುಂಡೆ ಶೆಡ್ದೆ ಹೃದಯ್ಮು ಮೀ ನೋನ ಯೋಡ್ಲಾನು ವುಂಡ್ಗುಡದು . ¹³ . ಮೀಲ ಒಕ್ಲಾಯ್ತೆನು ಪಾಪ್ಮಿಂಚ ಯೋಸ್ಮು ಪಾಯಿ ಕಠಿಣುಲು ಅವ್ನಟ್ಗ ಈಹೊದ್ದು ಅನೆ ಕಾಲ್ಮು ವುಂಡೆಗಂಟ ಪ್ರತಿನಿತುಮು ಒಕ್ಳುಕ್ಕೊಕ್ಳು ಎಚ್ರಿಯಂಡ್ರಿ . ¹⁴ . ಮೊದ್ಲಿಂಚವುಂಡೆ ಭರವಸ್ಮುನಿ ಅಂತ್ಯುಮು ಗಂಟ ದೃಡಮಾಯಿ ಪಟ್ಕೊನೆ ಪಕ್ಷಂಕಿ ಕ್ರಿಸ್ತುಡು ಪಾಲುಗಾರುಲು ಆಯಿನಾಮೆಕದಾ . ¹⁵ . ಮೀರು ಈಬೋದ್ದು ದೇವುಡು ಶಬ್ದುಮ್ಕಿ ಶೇವ್ವಿಸ್ತೆ ಮೀ ಪೆದ್ದೋಳು ದೇವುಡು ಕೋಪ್ಮು ಲೆಪೋಳು ಯೋಳು . ¹⁶ . ಮೋಶೆಡು ಸೈದುಗುನುಂಡಿ ಐಗುಪ್ತ್ಮು ನೋನಿಂಚ ವಚ್ಚಿನೋಳಂದ್ರು ಕದಾ . ¹⁷ . ಮಲಿ ನಲ್ ಪೈ ಏಂಡ್ಳು ವಾಡು ಯೋಳು ಮಿಂದ ಹೆಕ್ವಾಯಿ ಕೋಪ್ಮು ಸೇಸ್ಕೊನೆ ಪಾಪ್ಮು ಸೇಸ್ನೋಳ ಮಿಂದ ಕದಾ . ¹⁸ . ವಾಳ್ ಪೀನುಗ್ಲು ಅರಣ್ಯುಮುಲ ಪಡ್ನಾವೇ ನಾ ವಿಶ್ರಾಂತಿಲ ಮೀರು ಸೇರೇಕೆ ಲೇದು ಅನಿ ಯೋಳ್ನಿ ಕುರಿಚ್ಚಿ ಪ್ರಮಾಣ್ಮು ಸೇಸೆ ಅವಿಧೇಯರನ್ನು ಕುರಿಚ್ಚಿ ಕದಾ . ¹⁹ . ವಾಳು ಸೇರೆಕಾಕುಣ್ಣ ಪಾಯಿಂದಿ ಅಪನಂಬುಕ್ಮುಯಿಂಚನೆ ಅನಿ ತಿಳ್ಸಿ ಕೊಂಟಾಮು.