¹ . ದಾನ್ನಿಂಚ ಮಾಮು ಇನಿನ ಸಂಗತಿಲ್ಕಿ ತಪ್ಪಿ ಪಾತ್ಮಿ ಅನಿ ಭಯ್ಮುಪಡಿ ಅವುಟ್ಲುಕಿ ಹೆಕ್ವಾಯಿ ಲಕ್ಸ್ಯುಮು ಇಚ್ಚೋಳಾಯುಂಡಾಲ ² . ಎಂದ್ಕಂಟೆ ದೇವುಡು ದೂತುಲು ಮೂಲಕ್ಮು ಸೊಪ್ಪಿನ ವಾಕ್ಯುಮು ಸ್ಥಿರುಮಾಯಿಂದಿ ದಾನ್ನಿ ಮೀರಿ ಸೇಸಿನ ಪ್ರತಿಯೋಕ್ಟಿ ತಪ್ಪಿಕು ಅವಿಧೇಯತ್ವುಂಕು ನ್ಯಾಯ್ಮಾಯಿನ ³ ಪ್ರತಿಫಲ್ಮು ಉಂಟಾಯಿನ್ಮಿಂದ [ಮಾ ಮುಂದ್ರ ಪೆಟ್ಟುಂಡಿನ ] ಈ ಅತ್ಯುಂತ್ಮು ವಿಶೇಷ್ಮ ರಕ್ಷಣೆನಿ ಮಾಮು ಅಲಕ್ಷ್ಯುಮು ಸೇಸ್ತ ತಪ್ಪಿಚ್ಕೋನೆದಿ ಎಟ್ಟ ಇದಿ ಕರ್ತುಡಿಂಚ ಮೊದ್ಲು ಸೋಪ್ಪಲ್ಪಡೆ . ⁴ . ವಾಡಿಂಚ ಇನಿನೋಳು ದಿನ್ನಿ ಮಾಕಿ ಸ್ಥಿರ್ಮು ಪಡಿಚ್ಚೆ ಮಲಿ ದೇವುಡು ವಾಳ್ ಸೇತಿಂಚ ಸೂಚಕ್ಮು ಕಾರ್ಯಲ್ನಿ ಅದ್ಭುತ್ಮು ಕಾರ್ಯಲ್ನಿ ನಾನಾ ವಿಧ್ಮಾಯಿನ ಮಹತ್ಕಾರ್ಯಲ್ನಿ ನಡ್ಬಿಚ್ಚಿ ಪವಿತ್ರಾತ್ಮು ವರಲ್ನಿ ತನ್ ಚಿತ್ತಾನ್ಮುಸಾಮ್ರಾಯಿ ವಾಳ್ಕಿ ಅನುಗ್ರಹಿಚ್ಚಿ ವಾಳ್ ಮಾಟ್ಕಿ ಸಾಕ್ಷಿ ಇಸ್ತಾವುಂಡೆ . ⁵ . ಮಾಮು ಪ್ರಸ್ತಾಪಿಚ್ಚೆ ಮುಂದ್ರ ಸಾಮ್ರಾಜ್ಯ ಮುನಿ ವಾಡು ದೇವುಡು ದೂತುಲಿಕಿ ಅಧಿನ್ಮು ಸೇಯ್ಲೆದುಕದ ಶಾಸ್ತ್ರುಮಿನ ಒಕ್ ಭಾಗ್ಮುಲ . ⁶ . ಮನುಷ್ಯುಡು ಎಂತ ಮಾತ್ರುಮುಡು ವಾಡ್ನಿ ನುವ್ವ ಎಂದ್ಲು ನೆನೆಯಾಲ ಮಾನವುಡು ಎಂತೋಡು ವಾಡ್ಲ ಎಂದ್ಗು ಲಕ್ಷ್ಯುಮು ಪೆಟ್ಟಾಲ ⁷ . ವಾಡ್ನಿ ದೇವದೂತುಲುಕ್ಕಿಂತಾನು ಕೊಂಚ್ಮೆ ತಕ್ವಾಯಿ ಸೇಸ್ನಾವಿಕದಾ ಪ್ರಭಾವ್ಮುನಿ ಮಾನುನ್ಮುನಿ ವಾಡ್ಕಿ ಕಿರಿಟ್ಮಾಯಿ ಪೆಟ್ನಾವು . ⁸ . ಅಂತಾನು ವಾಡ್ ಪಾದಾಲು ದುಗುನ ಏಸಿ ವಾಡ್ಕಿ ಅಧಿನ್ಮು ಸೇಸ್ನಾವು ಕದಾ ಅನಿ ಸ್ಪಷ್ಟುಮಾಯಿ ಸೋಪ್ಪೆ ವಾಡು ಅಂತಾನು ಮನುಷ್ಯುಡ್ಕಿ ಅಧಿನ್ಮು ಸೇಸಿನ ಅನೆದಾಂಟ್ಲ ವಾಡ್ಕಿ ಒಕ್ಟ್ನಾರಾ ಅಧಿನ್ಮು ಸೇಯ್ಕುನ್ನ ಇಡಿಲೇದು ಅನಿ ಸೋಪ್ಪಿನಟ್ಗಾಯೇ .ಅಯ್ತೆ ಅಂತಾನು ವಾಡ್ಕಿ ಅಧಿನ್ಮು ಆಯುಂಡೆದಾನ್ನಿ ಮಾಮು ಇಂಕ ಕನೆಟ್ಲೆದು ⁹ . ಅಯ್ತೆನು ದೇವುಡು ದೂತುಲುಕ್ಕಿಂತ ಕೊಂಚ್ಮು ತಕ್ವಾಯಿ ಸೇಸಿನ ಒಕ್ದು ಅಂಟೆ ಯೇಸುವು ಪ್ರಭಾವ್ಮುನಿ ಮಾನುಮ್ನಿ ಕಿರಿಟ್ಮಾಯಿ ಹೊಂದುಂಡೆದಾನ್ನಿ ಮಾಮು ಸೂಸ್ತಾಮು ಮೃತುಮು ಪಟ್ಟಿಂದಾನ್ನಿಂಚಾನೆ ಮಾನ್ಮು ಪ್ರಭಾವ್ಮುಲ್ನಿ ಹೊಂದೆ ವಾಡು ದೇವುಡು ಕೃಪೆಯಿಂಚ ಅಂದ್ರುಕೊಸ್ಕರ್ಮು ಮರಣ್ಮುನಿ ಅನ್ಜಮಿಯ್ಬೋಕಾಯುಂಡೆ ¹⁰ . ಸಮಸ್ತಮು ಯೋಡ್ ಕೋಸ್ಕಮ್ರುನು ಯೋಡಿಂಚಾನು ಉಂಟಾಯೇನೋ ವಾಡು ಬಹುಮಂದಿ ಪುತ್ರಲುಲ್ನಿ ಪ್ರಭಾವ್ಮುಕಿ ಸೇರಿಚ್ಚೆದಾಂಟ್ಲ ವಾಳ್ ರಕ್ಷಣ್ಮು ಕರ್ತುಡ್ನಿ ಭಾದೇಲು ಮೂಲಕ್ಮು ಸಿದ್ದಿಕಿ ಎತ್ಕೊಚ್ಚೇದಿ ವಾಡ್ಕಿ ಯುಕ್ತು ಮಾಯುಂಡೆ ¹¹ . ಎಂದ್ಕಂಟೆ ಪವಿತ್ರುಮು ಸೆಸೇವಾಡ್ಕಿನು ಪವಿತ್ರುಮು ಆಯೇವಾಳoದ್ರುಕು ಒಕ್ಡೆ ತಂಡ್ರಿ ವುಂಡಾಲು ಈ ಕಾರ್ಣುಮಿಂಚ ಪವಿತ್ರುಮು ಸೇಸೋಡು ಪವಿತ್ರುಮು ಆಯೋಳ್ನಿ ಸಹೋದರುಲು ಅನ್ಬಿಚ್ಕೋನೆದಾಂಕಿ ನಾಚ್ಕೆ ಪಡ್ಕುಣ್ಣ . ¹² . ನೀ ನಾಮಮು ಮಹಿಮೇನಿ ತನ್ ಸಹೋದರುಲ್ನಿ ಸೋಪ್ತಾನು ಸಭಾ ಮಂದಿಮ್ರುಲ ನೀಕಿ ಸ್ತುತಿಪದಲ್ನಿ ಹಾಡ್ತಾನು ಅನಿಮಾ . ¹³ . ನಾನು ದೇವುಡು ಮಿಂದ ಭರವಸ್ಮು ಪೆಟ್ಟಿನೋಡಾಯಿ ನಾನು ಅನಿನು ಇಗೋ ನಾನು ದೇವುಡು ನಾಕಿ ದಯಪಾಲಿಚ್ಚುಂಡೆ ಬಿಡ್ಳು ವುಂಡಾಮು ಅನಿನು ಸೋಪ್ತಾಡು . ¹⁴ . ಇದ್ಕಾಕುನ್ನ ಬಿಡ್ಲು ರಕ್ತುಮು ತುಂಕುಲು ದಾರಿಲು ಆಯುಂಡೆ ದಾನ್ನಿಂಚ ವಾಡು ವಾಳ್ಳಾಕನೆ ಆಯೇ ತನ್ ಸಾವಿಂಚಾನೆ ಮರಣ್ಮು ಅಧಿಕಾರಿಲ್ನಿ ಅಂಟೆ ಸೈತಾನುಡ್ನಿ ಅಡ್ಗಿಚ್ಚೆದಾನ್ಕು . ¹⁵ . ಸಚ್ಚೆ ಭಯ್ಮು ದಾನ್ನಿಂಚ ತನ್ ಜೂಡ್ ಮಾನಮಂತ ದಾಸತ್ವು ವೂಡೊಳ್ಳಿ ಇಡ್ಬಿಚ್ಚೆದಾನ್ಕು ವಾಳ್ಳಾಕೆ ರಕ್ತಮು ತುಂಕುಲು ದಾರಿಲಾಯೇ . ¹⁶ . ವಾಡು ದೇವುಡು ದೂತುಲ್ನಿ ಪಟ್ನೋಡನಿ ರಾಯ್ಲೇದು ಅಬ್ರಾಮುಡು ಸಂತತಿನಿ ಸೈಪಟ್ಕೋನ್ನಾಡು ಅಂತೆ . ¹⁷ . ದಾನ್ನಿಂಚ ವಾಡು ಅನ್ನಿ ವಿಷಯುಮ್ಲ ತನ್ ಸಹೋದರಲುಕಿ ಸಮಾನುಡು ಅವಾಲನಿ ವಚ್ಚೆ ಇಟ್ಟ ವಾಡು ಜನಲು ಪಾಪಲ್ನಿ ನಿವಾರಣ್ಮು ಸೇಸೆ ದಾನ್ಕಾಯಿ ದೇವುಡು ಕಾರ್ಯಮುಲ್ಲ ಕರುಣ್ಮು ನಂಬುಕ್ಮು ವುಂಡೆ ಮಹಾಯಾಜಕುಡಾಯೆ . ¹⁸ . ವಾಡೆ ಶೋದಿಚ್ಚಲ್ಪಡಿ ನಪ್ಪಿನಿ ಅನುಭವಿಚ್ಚೆದ್ದಾನಿಂಚ ಶೋದಿಸಲಪಿಡೋಳ್ಕಿ ಸಹಾಯ್ಮು ಸೇಸೆದಾನ್ನಿ ಶಕ್ತುಡಾಯಿನಾಡು .