¹ Uso na nin dandaunu ba, Yesu cizina ucin nanya nigbir ngangan na nitari, nbellu nliru ucine, kitene kipin tigo Kutelle, inung likure nya nanghe. ² Among awani alenga na iwa kalla nani Uruhu unanzan nan tikonu. Inughere, Maryamu ule na idin yicughe Magdaliya, Kitime iwa kalla ghe agbergenu kuzor. ³ Yuwana uwanin Kuza, unan katuwa Hirdus, Suzana, nan namon awani gbardang, alenge na iwa buun nani nin nimon nacara mine. ⁴ Nene na ligozi nanit gbardang nzura ligowe, umunu anit ale na iwa cinu udak kiti mye unuzu nigbir gbardang, asu uliru nanghinu nin tinan tigoldo. ⁵ Unan tibila ndo nbilisu nimus, na adi tibile imon imusu disso, libau, ipatila inin nin nabunu anyin kitene kani da pilla inin. ⁶ Imon imus disso kiti ikoto, bara na idinin nmyin ba. ⁷ Har nene imon imus disso kiti nimart, na imarte nkuno ligowe nin nimuse, imarte buco imuse. ⁸ Bara nani imon imus disso kutyin kucine inin na iyoli na iwa duru akat kazakure." Kube na Yesu nbelle nani, ayicila nani, "Vat nlonge na adinin natuf na alanza." ⁹ Inung nono kadura mye tiringhe iyaghari tinan tigoldo mye di nbellu. ¹⁰ Yesu woro nani, "Ina ni munu kubi iyinin imon linyeshin kitene kipin tigo Kutelle, bara kagisine iba bellu nani nin tinan tigoldo, 'iba yenju na iba yene gegeme ba, iba lanzu, na iba yinnu ba.' ¹¹ Nene tinan tigoldo tinere, imuse uliru Kutelle ri. ¹² Imus ile na idisso libou, innere anit alenge na ilanza ligbulang nliru, shetan uni nda ada bollo ligbulang nliru nanya nibinai bara iwa yinin ise utucu. ¹³ Inin ile na idisso kiti natala anitari alenge na ilanza ligbulang nliruwe, inani sere nin liburi liboo na iyisin nin likara ba, inung sa iyinna bara kubi baat, kubi na igwada nani asa idio. ¹⁴ Imus ile na idisso kiti nimart inughere anit alenge na ilanza ligbulang nliru, inani nsuna linin inani nda parda nani nin nbellen nikurfung nin nlanzu nmang nlai, na isa ina imus ile na idisso kutyin kucine. ¹⁵ Inughere anit ale idinin kibinai kilau ninn nan nbellu kidegen, na imala ulanzu nlire, imino unin nin likara, isu kumat nin likara. ¹⁶ Nene, na umon duku ule na aba ti ulah npitila awufu nin kishik, sa a ceo nanya lii nkoni, se dei atarda unin kutet, vat nlenge na apira ama yenu nkananghe. ¹⁷ Na imomon nyeshin, ilenge na una sali sa uyinnu ba, a na imomon nyeshin ile na iba yinnu idak nanya nkanang. ¹⁸ Suun seng nanya nlanzu, vat nlenge na adumun, amere iba kpinghe ku, ame ule na asali mun, iba seru ile na adin kpilizu a adumun." ¹⁹ Kubi na unan Yesu nin nuane wa kiti mye, iwase uduru kupo mye ba, bara gbardang nanit. ²⁰ Ibellin ghe, "Unafe nin nuanafine yisin ndas, idinin su iyene fi." ²¹ Yesu kauwa aworo nani, "Una nighe nin nwana nighe, inunghere alenge na idin nwana nighe, inughere alenge na idin lanzu uliru Kutelle idorto unin." ²² Nene uso nlon liyiri, Yesu nin nono kadura mye ipira nanya nzirgin nmyen, a woro, "Nati kafin udu uleli uwul kulle." Itunna ndinna ikafinar. ²³ Na idinna ukafine, Yesu tina nmoro fiyilili nfunu fita kang nanya kulle, uzirge kullo nin nmyen itunna ipira nanya tikanci. ²⁴ Nono katuwa mye di fiyaghe, iworo, "Cikilari, Cikilari, nmyen ba millu nari!" A fita akpada ufune nin mye ne, fiyilili yisina kite so dang. ²⁵ Uyinnu mine, sa uyene de atirino nono katuwa mye nanya fiu nin kiti tinu itirino atimine, ghari ule adi kpadizu ufunu nin nmyen, inani din dortu ghe?" ²⁶ Ikafina udu kipin Ngarisinawa, na ki nleli uwul Ngalili. ²⁷ Kubi na Yesu yisina nbiu kurawa, a zuro nin nmong unan nilaza nanya kipine, nin dandaunu na adin nsho. Imon a sosin kilari ba, asosin nissek. ²⁸ Na ayene Yesu ku, usu agilla adio nabunu mye, atah ntet kang, "Iyaghari udin piziru kiti nighe Yesu gono Kutelle? Inan kitene, ndin nfofi nacara yenje uwa fuuni ba." ²⁹ Yesu atta uruhu unazan ghe a nuzu nanya nnite, nkon kubi gbardang asa imone yiraghe. Inani sa itaghe inyang naccara nin nabunu, iceoghe unan ncaa, asa atasa inya ghe agbergenu wunnu ghe udi niti ninanzang. ³⁰ Yesu tiringhe, "Lisafe ghari?" A kawoghe, "Libutari," Bara agbergenu gbardang di nanya mye. ³¹ Ifoo Yesu ku acara kang, na awa mollu nani ba. ³² Ligo naladu wa di kileo kusari, agbbergenu foo Yesu ku acara, asun nani, ipiru nanya naladu, Yesu yinna nani. ³³ Na agbergenu nnuzu nanya nnite, idi piru nanya naladue, itunna iputu nin ncum idi diu kule ituna iwulu. ³⁴ Na anan libiya nalade nyene ile na isu, ido nanya kipine nin ncum, idi bellin kagbire nin nanya kipine. ³⁵ Anite nuzu idi kiti Yesu, ise unite ule na agbergenu nnuzu kiti mye, sosin nabunun Yesu, nin nimon kidowa nin kibinai dert, ilanza fiu. ³⁶ Alenge na iyene nani ibelle anite inda na agbergenu nnuzu, unite uni nshino. ³⁷ Vat nanite kipin Ngarisinawa woro Yesu ku asun nani, bara anite apira uzirgi nmyen a nya. ³⁸ Unite ulenge na agbergenu nnuzu kiti mye, foo Yesu ku acara adofinghe. Yesu kpiliya ghe aworo, ³⁹ "Kpilla kilari, ubellin ile imon na Kutelle nsu fi, unite kpilla abelle nanya kipine vat nile imon na Yesu nsu ghe. ⁴⁰ Na Yesu nkpilla, ligozi nanite ta ghe mahabi, bara vat mine di ncaa mye. ⁴¹ Umon unit lisa mye Jairus, udia kutyi nlirag ada dio nabunu Yesu nfo ghe nacara adak kilari mye, ⁴² bara gono kishono mye kirum, unan nakus likure, anon fawal, na Yesu wa cinu uduwe, ligozi keseghe. ⁴³ Umong uwani wa duku, ulenge na awadi nanya nmyi, akus likare, na ase unan nshinu ninghe ba. ⁴⁴ Ada mamal mye, adodo imon mye likot nanya kube nmyi mye yisina. ⁴⁵ "Ghari ndudui?" Yesu tirino, vat mine ta amusuku, Bitrus woro, "Cikilari, anite di gbardang ina ni din parduzu fi." ⁴⁶ Yesu woro, "Umong ndudui, yinno likara nnuzu kiti nighe." ⁴⁷ Uwani nin nyene, na awanya anya likire ba, ada nin ketizu adeo nabunu mye. Nbun nanite vat, abelle ile imon na ita amini ndudoghe, nin inda na atunna ashino. ⁴⁸ Atunna aworo, "Ushono, nigh uyinu sa uyenu fe nshino ninfi. Can sheu." ⁴⁹ Kube na Yesu wadi nliru, umon da kiti mye unuzu kilarin Jairus udia kutyi nliran, "Ushono fe, nkuu. Yenje uwa damu unan dursuzu ninyerte. ⁵⁰ Nin lanzu nani, Yesu woro, "Jairus ku, yenje uwa lanza fiu, yinna ushono fe ba shinu." ⁵¹ Kubi na aduru kilarin Jairus, na ayinna umon pira ninghe ba, se Bitrus nin Yohanna a Yakubu, a ucif nin nnan ngone. ⁵² Vzat ninite yita kuculu nin tiyom, "Cinnon kuculu Yesu woro na akuu wari ba, adi nmorari." ⁵³ Isisaghe, bara inug yiru a kuu, wari. ⁵⁴ Akiffo ghee ncara a woro, "Gono nig fita." ⁵⁵ Ulai mye kpila, nanya mye, kubi atuna afita, Yesu woro nani inighe imomon alii. ⁵⁶ Anit mye kiffo tinu, yesu woro nani na iwa bellin umon imon ile na idi ba.