¹ Ayicila nono katwa mye likure nin wabe, ana nani likara kitene nagbergenu nin shizhinu nin tikonu. ² Ato nani, idi bellin uliru kiti kipin tigo mye, nin shizinu nanan tikonu. ³ A woro nani na iwa yiru imon bara ucine ba, sa uca, imon inyi, imonlii, ukurfung, sa alutuk abba. ⁴ Vat kilari ka na ipira soo kinin, udu liyiri lo na iba cinu kipine. ⁵ Inung alle na inari munu, asa iba nuzu nanya kipin, kotinon lidau we nabune mine, liba so ushaida nati mine." ⁶ Itunna iwatuna, ipira nigbire itina nbellin nliru umang, nin shizinu nanit niti niti. ⁷ Hirdus ugo na alanza ile imon na idinsu, au Yohanna unan shintu nanit infita. ⁸ Kiti namong idin su Iliya nsah, among woro umon unan nburnari, in fita nanya na nan nlai. ⁹ Hiridus woro, "Ina malu ukalu liti Yohanna, ani ghari ndi nlanzu kiti mee nene." Hiridus do npiziru ayene Yesu ku. ¹⁰ Alenge na iwa tuu nani issah, ibellinghe vat nile imon na isu, anya nanghinu ligowe nanghe, udu kipin Batsaida. ¹¹ Inung ligoze lanza nani Idofinghe, atah nani mahadi, abelle nani ubellen kipin tigo na idinin su inshinue. ¹² Nin ndu kulelen, inung likure nin wabe, woroghee suuna ligoze idoo nigbir nkilinue, idi piziru kiti linanin nin nimonli, bara kikane na tidi ku kushori. ¹³ Aworo nani, "Nan nani imonli ili." Inug woro, "na tidi nin nimomon na ikatin nfungul utaun nin niboo ibba ba, sse tido tidi seru nani imonli bara ligozi vat. ¹⁴ Iwadi annit amui alaun. A woro nono kadura mye, "Taan nani iso acuri akut ataun taun. ¹⁵ Isu nani anite so vat kutyin. ¹⁶ A yauna ufungul utaune nin niboo ibe, ato iyiizi kitene atah nmari ku, a pucu agir anaa nono katuwa mye, inin koso nani. ¹⁷ Inung vat leo ishito, kagisin nbubun nimole nazza, ipitirno ita nakuzun likure nin nabba. ¹⁸ Idoo nkon kubi adin nti nliran usame, nono katuwa mye nanghe anin tirino nani, "Ligozi din su meng ghari?" ¹⁹ Ikauwa ghe iworo, "Yohanna unan shintu nmyen (Baptisma) amon woro Iliya, amon woro nkon kunan nburnuari in fita." ²⁰ Anin woro nani, "Anung dinsu meng ghari?" Bitrus kauwa aworo kristi unuzu Kutelle." ²¹ A wunno nani atuf, Yesu woro nani na iwa bellin umon ba. ²² Nworu gono nnit ba niu nin nimon gbardang, iba nari ghe, akune nin uso napirist a anan ninyerte, iba mollughe ayiri atat a ba fitu nin lai. ²³ A woro nani vat, "Asa ule na adinin nsu adak kiti nigh, aba nari liti mye, aba diru, ule na anari litime bara meng aba se utucu. ²⁴ Ulenge na idinin su a tucu liti mye, aba diru, ule na anari litime bara meng aba se utucu. ²⁵ Iyaghari ncaute unit se imon inye vat, anin dira ulai mye? ²⁶ Vat nle na adi nlanzu ncin nigh nin ligbulang nigh, gono nnit ba lanzu ncin mye nwui une na aba dak nanya ngongon Ncif mye nin nono kadura Kutelle. ²⁷ Nworo munu kidegenere indi bellu munu, among yisin kikane, na ukul ba dudu nani ba, se idoo kipin tigo Kutelle." ²⁸ Na ayiri kulir nkata na Yesu nbelle nani tigbulang tone, ayira Bitrus, Yohanna, a Yakubu, ighana kitene kupara ati nlirag. ²⁹ Na adi nliraghe, umuro mye saka, imon mye tunna ipo pau nwaltu. ³⁰ Itunna ise amon naba ida idin nliru nanghe, ashe Musa nin Iliya. ³¹ Ale na iwa yenje nani gongon, idin nliru kitene nnyiu mye, ule na iba kullu nanya Urushelima. ³² Kubi, Bitrus nan nale na iwa di nanghe nmoro wadi nani kang, na izinto, iyene ngongon mye nin nale iwa yisin nanghe. ³³ Uso nani, na inya ligowe nan Yesu, Bitrus woroghe, "Cikilari ucaun na tidi kikane, tiba ke adanga atat, ti ke kurum kun Iliya." Na ayinno ile imon na adin belle ba. ³⁴ Kube na adin belle nleli imone, kuwut tolo ku tursu nani, fiu da nani, na kuwute nkilino nani. ³⁵ Liwui nuzu nanya kuwute liworo, "Gono nighari kane na ina fere lanzan ghe." ³⁶ Na imala ulanzu liwuiye, Yesu yita usame, inung so tik, nanya nayiri ane na iwa bellin umong ba, ile imon na iyene. ³⁷ Ukurtunu nkuiye, na isa unuzu kupara, ligozi nanit da zuro nanghe. ³⁸ Umon nanya ligozi gilla a woro, "Unan yiru ndin fofi nacara yene usaun nighe, amere gono nighe cas. ³⁹ Yene Uruhu sa uyaunghe, amalzino, aketize, anutuzuno kupunget nnuwe, na asa usunghe ba, se ushalaghe. ⁴⁰ Asa nfo nono katwa fa acara, nshin ninghe na isa iyinno ba." ⁴¹ Yesu kauwa a woro, "Anung anan salin nyinnu nin kuji kugbas, udu kishiyari nba yinu uso nanghinu danin nsaun fe kikane." ⁴² Na gone din cinu uduwe agbergenu yaunghe ilina kutyin atunna nketizu. Yesu kpada Uruhu unanzang, ashino nin gone, anin nakpa ucife. ⁴³ Vat mine yene nziziki ngbardang Kutelle, na vat mine nkiffo tunu nile imon asu, ani woro nono katuwa mye, ⁴⁴ "Na to tigbulanghe do piit nnit nacara nanit." ⁴⁵ Na inin wa yinin ule idiru ba, Bara na uwa nyeshin kiti mine na iyinno liti nlire ba. Vat nani nlanza fiu nworu itiringhe uliru une. ⁴⁶ Manyardang fita nanya mine, nbelleng nworu ghari ba so udiya mine. ⁴⁷ Yesu nin yiru nkpilizu nibinai mine, a yicila kagone kabene a yisa likot me, ⁴⁸ Anin woro nani, ulenge na asere gono kane, asere menku. Ulenge na asere menku, asere ulenge na ana tuuyi, ulenge na aceo liti me nafo gono kibene amere ba so udya nanya mine. ⁴⁹ Yohanna kauwa, "Cikilari tiyene umong nutuzunu nagbergenu nin lisafe, tinanin wantinghe, bara na adi ndortu nari ba." ⁵⁰ Na iwa wantinghe ba, "Ubellun Yesu, vat nlenge na adi nivira nan ghinu ba unminere." ⁵¹ Na ayiri nyiu me nda susut aceo umuro me udu Urushelima. ⁵² Ato anan kadura nbun me, inya ipira kagbir Nsamariya, ikeleghe imone. ⁵³ Anite kikane wa tighe mahabi ba, bara amal ciu umuro me udu Urushelima. ⁵⁴ Na nono katuwa me, Yakubu nin Yohanna inyene nani, iworo, "Cikilari titi ulah tolu umolu nani?" ⁵⁵ A gitirino a kpada nani. ⁵⁶ Itunna inya udu nkan kagbir. ⁵⁷ Na idin cine libau we, umon woroghe, "Meng ba dofin fi udu kika na uba duu." ⁵⁸ Yesu kauwa a woroghe, "Ninyan yau dinin tiyyi, Anyin yita nin nado, meng gono nnit dinin kiti nciu liti ba. ⁵⁹ Anin woro nmong, "Dofini." Ame woroghe, "Cikilari ucizine na ndo ndi kassu ucif nigh." ⁶⁰ Ame atimine anan nkul, fe can udi belle piit nin npash uliru kipin tigo Kutelle." ⁶¹ Umong ugang woroghe, "Meng ba dofinfi Cikilari, na ntuu ndi bellin anan kilari nighe meng nya." ⁶² Yesu kauwa a woroghe, "Na umong duku alenge na ata ucara me nkeke nikawa, asa a gitirno, na abase upiri kipin tigo Kutelle ba."