¹ Kubi na Yesu nmala ubellu nimon natuf nanite, a pira Ukafarnahum. ² Kucin nmong unit udia, na awadi nin nkanu acina ukuu, Cikilari wa di nin su mye. ³ Bara na alanza ubellen Yesu, unit udia une to akukune na Yahudawa idi yicila ghe adak ada tucu kucin kone bara awa kuu. ⁴ Kubi na ida kupoo Yesu inung tiringhe iworo, "Ucaun isughe nani, ⁵ Bara adinin su nanit bite, amere na ke nari kutyin nliran kone." ⁶ Bara nani Yesu leo ubun nanghinu kubi na awadii piit nin kilare unit udia une to adondon mye iworoghe, "Cikilara na uwa ti litife kudira ba, na meng batin uda piru nanya kilari nig ba. ⁷ Bara nanere na nyene liti nighe nbatin ndak kitife ba, belle ligbulang kucin nighe ba shinu. ⁸ Bara meng wang unitari na idinin tigo, ndinin nasojja, asa nworo ulle, 'Cang,' asa anya andi nworo umong, 'Da,' asa ada, ame kucin nighe su nenge asa asu." ⁹ Kubi na Yesu nlanza nani akiffo unu, a gitirino kiti ligozi na idin dortu ghe, "Meng bellin munu, vat nanyan Israila na nse umon nin nimusin nle uyinu sa uyenu ba." ¹⁰ Inung alenge na to nani, kpilla udu kilari idi se kucine nshino. ¹¹ Nin nkon kubi, uso na Yesu wadi ncinu udu kipin na idin yicu unayin, adon katwa mye wadin ncinu nanghe, ligowe nin ligozi nanit gbardang. ¹² Na ada kupo kipine kidia we, iwa min umong unit na akuu, amere gone cas kitin nene, ame wand ules mye na kuu, ligozi gbardang nanya kipine wa di nanghe. ¹³ Na ayeneghe, Cikilari lanza nkunekune mye kang, "Na uwa sillu ba." ¹⁴ A da ubun mine adudo akwatu libe, itunna iyisina a woro, "Kwanya, nbellin fe, fita." ¹⁵ Atina a fita a so acizina uliru, Yesu yiraghe ana unene. ¹⁶ Feu tina fi da nani vat. Itina nzazinu Kutelle iworo, "Unan nliru nin nnu Kutelle udia nnuzu nanya bite" nin "Kutelle din yenju anit mye." ¹⁷ Uleli uliru kitene Yesu malla kiti nanya vat Yahudiya nin nigbir kupowe. ¹⁸ Adon katuwa Yohanna bellinghe vat nile imone. ¹⁹ Yohanna yicila adon katuwa mye an waba, a ti nani udu kiti Cikilari i woro, "Fere unan dak ule, sa umon ghari ule na tiba so nca mye?" ²⁰ Kubi na ida kupon Yesu, anite woro, "Yohanna unan shintizinu nanit nmyen nto nari kilifi ti woro fi, 'Fere unan Dak Ule, sa umon duku na tibo soon nca mye?'" ²¹ Nkoni kube anit gbardang wa shinn nin tikonu mine nin nniu na nan nruhu unanzang, ata anit gbardang aduu yenje kiti. ²² Yesu kauwa a woro nani, "Asa ikpilla, bellen Yohanna ku ile imon na iyene inani lanza. Anit aduu di nyenju kiti, a gurgu din cinu, akuturu din nshizhinu, aturi din lanzu, idin fizu anan kul udu ulai, akimon din lanzu uliru nlai. ²³ Unit ulenge na asuna uyinnu nin bara imon ile na ndi su ba, ame unan nmariari." ²⁴ Kubi na anan kaduran Yohanna nkpilla, Yesu cizina ubellu ligoze nanite kitene Yohanna, "Iyaghari iwa do nanya kusho ndi yene amon ale na ufunu din pilluwa? ²⁵ Bara nani iyaghari iwa nuzu ndi yene, unit unan kuyok kucine? Yene anit alenge na idinsu kuyok kucine inani sosin nanya nlanzun mang, idi kilari tigo wari. ²⁶ Bara nani Iyaghari i wa nuzu udas idi yene, una nliru nin nnu Kutelle? Nanere, mong bellin munu, ame katin unan nliru nin nnu Kutelle. ²⁷ Amore ulenge na ina nyertin litime, 'Yene meng nto unan kadura nighe nbun fe, ulenge na aba kelu libau kamin fe.' ²⁸ Meng nbellin munu nanya nale na awani na macu nani, na umon katin Yohanna ku ba, nin nani tigo Kutelle akatinghe." ²⁹ Kubi na vat nanite nlanza nani, umunu anan sesun ngandu, itambata Kutelle unit ulau wari, iwadi nanya nalenge na iwae ushintinu Yohanna. ³⁰ Bara nani, Afarisiyawa nin na nan nyiru nanyan nduka na Yahudawa, alenge na awa shintin nani, iwa nari njinjin Kutelle bara atimine. ³¹ Nin nyanghari mba gwadu anit nko kuje muna? Idi nafo iyaghari? ³² Idi nafo nono na idi navu nanya nkassa, alenge na isa iso iyica atimine iwroro, 'Tidin npee nishirau bara anughe, na anug nsu ikarma ba, tisu tiyom ana anung nsu kuculu ba.' ³³ Bara na Yohanna wa dak na asu kilecu sa usonu ba, anung woro, 'Ame kugbergenu ri.' ³⁴ Gono nnit daa adin nlii, aso anug woro, 'Yene, ame unan kileou nin nso udondon na nan sesun ngandu nin nanan kulapi!' ³⁵ Bara nani njinjin nsu utucu nvat nnono mye." ³⁶ Nene nkon ku Farisiyawa waddi likura au Yesu lii imonli ninghe. Bara kubi na Yesu npira kilari ku Yahudawe, ikilino kutebul isu kileou. ³⁷ Nani umon uwani wa duku nanya kagbire unan kulapi, ayinno nworu Yesu din nli nimon li kilari Kufarisiyawa, ada nin nmon nnut albasta. ³⁸ A da yisina nbun mye, kupo na bunu mye a gilla. Imizine tantizo nabune, atina nweze nin titi liti mye, ngbindirizinu nabunu, nlolizu nanin nin nufe. ³⁹ Kube na Afarisiyawe alenge na iyicila Yesu ku, Iyene nani a kpiliza nanya kibinai mye aworo, "Ndah unit ule unan nliru nin nnu Kutelleri, awa yinnu imusi nwani ule na adin duduzughe ame unan kulapiari." ⁴⁰ Yesu kauwa a woroghe, "Simon, ndinin nimon ile na mba bellinfi." A woro, "Belle unan yiru!" ⁴¹ Yesu woroghe, "Amon wa duku an waba iwa seru ure kiti nnan nizu nre, warum wa sere tidinari akat ataun, ulele tidinari akut ataun. ⁴² Na iwa dinin nikurfin nbiuwe ba, a woro nani na iwa biya ba. Bara uyemeari nanya mine ba katinu nin su mye?" ⁴³ Simon kauwa ghe aworo, "Ndi yenju ulenge na adin dortu ghe ikurfun idia." Yesu woroghe, "Fe uwusu kidegen dert." ⁴⁴ Yesu gitirno kiti nwane a woro Simon ku, "uyene uwani ule npira kilari fe, na unayi nmyen nkusu nabunu, ame nin nmizin a kikkai abunu, amini nwese nin titi mye. ⁴⁵ Na fe ngbindiri ba, amere, unuzu kube na ndah nanye, na asuna ugbindiri zinu nabunu nigbe ba. ⁴⁶ Na uwolo abunu nighe nin nuf ba ame nwolo abunu nighe nin nnuf. ⁴⁷ Bara ile imon na asu, nworo fi ame ulenge na adinin nalapi inani nyapa ghe, ata usu gbardang, bara ulenge na iyapa ghe cinglin, ame nta usu cingling." ⁴⁸ Atuna aworoghe, "Iyapa alapi fe." ⁴⁹ Alenge na idi kileowe ligowe woro nati mine, "Ghari ule na awasa ayapa kulapi?" ⁵⁰ Nani Yesu woro nwani une, "Uyinnu fe sa uyene nsu utucufe caan sheuwu."