¹ Vbi uvbi e̱ghe̱ kere li e̱gbe̱ e̱n lo̱bun si eia re̱ sikoko kugbe, le bun se̱vbo khi yan ri iza te̱e̱n egbe ye̱n, o̱ re̱ be̱e̱ lo̱ re̱ kpa o ta li okho so̱i ho̱n, "Vba ri iee o̱vbi egbevbi iyist si ekhe̱n Ifarisi lo̱ vbi ovbee." ² Aman, I mii emi lare hee la kha re̱vbie̱, ai mii emi si uhegbe la kha e̱n. ³ Emi khe mi li vba tai vbi e̱ke̱n aso̱n, alo̱ ho̱in vbi odan mi, emi li vba ta o̱ vbi ehvn vbi e̱ke̱n aza alo̱ ro̱i gbobe vbi okhumoa. ⁴ I tai li vba re̱ ho̱n, imo̱me̱n, vbae ya lofe̱n si eia le lo̱ gbi egbe, o̱ain kha ke rare le mo̱n emi le lo̱ ke meti u. ⁵ Aman, I lo̱ hiukeke la vba vbi emo̱n o̱li vba lo̱ lofe̱n ni. Lofe̱n ni o̱lo̱ to̱kpa lo̱ khagbe le, o̱ mo̱n ase̱ lo̱ lo̱ re̱ fie̱ fio̱ vbi oimerain. He̱, itai li vba ho̱n, lofe̱n so̱i. ⁶ Egho eva kere ka re̱ shin ana mi ihie̱n? O̱re̱ de iyo̱, ai e o̱kpa vbio̱a vbi isao si Oise̱le̱bua. ⁷ Ako̱o̱ eto si uhumi se̱ ere̱me̱n elofe̱n. Vba mo̱n ukutu le inahmi le bun. ⁸ vI ta la vba ho̱n, eia ere̱me̱n lo ta khi o̱in e̱n me̱n vbi irae̱o si eia, o̱li ovbi oia lo̱ gbo̱ o̱i khi yo̱in e̱n i ain vbi irae̱o si ekhe̱n angeli si Oise̱le̱bua. ⁹ Aman o̱lo̱ i khi yoin e̱n me̱n vbi isao si eia, alo̱ gbo o̱i khai e̱n o̱n vbi ira e̱o si ekhe̱n angeli si Oise̱le̱bua. ¹⁰ Eia ere̱me̱n lo̱ ti eta lobe si ovbi oia, alo̱ re̱ humo̱in, aman o̱lo̱ ti Iblasphemi etalo̱be̱, si etin lo̱fun an, akha re̱ humo̱in. ¹¹ A kha nwun vbi di isao si Isinago̱gu re, elo̱ ri ea shan bi ele mo̱n ase, e mo̱n okpokpo vbi emo̱n ebi ulo̱i fin egbe se̱ da eta lu lo̱ ta. ¹² Etin lo̱funan o̱lo̱ vbie̱ vbo̱ li e̱gbe̱ emi lu lo̱ ta." ¹³ O̱kese̱ oto̱kpa zavbi use si o̱lo botu o̱i, "O̱lo̱ vbie̱, ta ni omio̱n me̱n ho̱n loi kin uku ne̱ men." ¹⁴ Ijesu re̱ o̱i, "O̱mo̱he o̱ ke re̱ me̱n chie̱n o̱lo̱ghae̱zo̱n da o̱miogue̱ vbi uhumi vba?" ¹⁵ O̱re̱ i ain, "Ri ie o̱ vbi egbe vba li si egbe le̱ vbi ise̱ me̱ uo̱kpa o̱ kha u, erimidi agbo̱n u umi so̱i a, o̱ vbi emi lo̱bun ogbe re lo̱ mo̱e̱n." ¹⁶ O̱kese̱ Ijesu za kpita si evbe niain ho̱n lo̱ re̱ oi, 'Ime si o̱lo̱ fe o̱kpa, mii ikpe̱ko̱mi lo̱ zukpe bun. ¹⁷ O za oo uhumi, o̱re̱ o̱i, "Emi ilo̱ ke u erimidi khi imo̱n ebi lo̱ za hua eli ikpe̱ko̱mi me̱n ya?" ¹⁸ O̱re̱ o̱i, I na li ilo̱ u, i lo̱ po̱o̱n iru me̱n di oto̱i li e̱hin elo̱ gba lo̱i, eain ilo̱ ke hua eli ikpe̱kho̱mi ere̱me̱n bi emi evbe o̱. ¹⁹ I lo̱ ehi me̱n, "Ehi u mo̱n emi lo̱bun la hua ya khe̱ ikpe lo̱bun. Fetin an ohoo, emae, yan o̱n, ya gho̱gho̱n." ²⁰ Aman, Oise̱le̱bua za o̱i, "O̱mo̱he lo̱ruru, aso̱na a hoo ehi se̱, emi lu e̱he̱n o̱ vboto̱i, iso̱ o̱lo̱ ke u?" ²¹ I yo̱ li o̱lo̱ ia iri lo̱ hua emi lo̱ hume̱n so̱i ya legbo̱i, lo̱i ri efe so̱i o̱vbi esi Oise̱le̱bua." ²² Ijesu ekhe̱n ivbiuokho so̱i, "O̱hio̱sio̱na i tai li vba ho̱n, vba e ke mo̱n uee vbo̱ hio̱ si emo̱n agbo̱n vba - emi lu lo̱ wee, ²³ Ari vbo̱ le̱ emae, egbe le̱ ikpun. ²⁴ Vba o emi vbi emo̱n uvbiare̱, khi eya re̱ ko̱, eya lie. E mo̱n aza li an hua emi o̱n da irun, aman, Oise̱le̱bua o̱ kue̱iain. Ebi u kei mo̱n ukutu le̱ eli i fian mi! ²⁵ O̱ u vbi vba lo̱ hoo, lo̱lo̱ meti rii ikabo ba e̱dagbo̱n so̱i, ebo̱lo̱i to̱n se̱. ²⁶ Akhai khi vba kha meti ui emi lo̱i kere an, emi vba ke kpokpo o̱ vbi eno̱i ni? ²⁷ O emi vbi emo̱n iumi ilili e bi ain huu. E ya bia, eya ma gbo doo emi. I che tai yi vba, Isolomoni vbi o̱ khae so̱i ere̱me̱n o̱i ri kupun voo egbe le̱ o̱kpa vbi ena. ²⁸ Oise̱le̱bua kha ke ri ukpun o̱i iumi le ri vbo go vbegbe, le kha ri vbo̱ e̱na la lo̱ hua kuo̱ vbi erain akho̱, eke kao̱lo̱ zukpe̱ re̱ le̱ lo̱i ukpun lo̱lo̱ re̱ vo e̱, vba vba li vba mo̱n adiudu an kere! ²⁹ Vba eke li izeze si emi li vba lo̱ e akho̱ bi emi vba o̱o̱n vba eke gbi idade̱o. ³⁰ Uhumuroo si o̱li agbo̱n na ere̱me̱n yan hoo eli emi na; Era vba e̱n khi ukutu li khi eli emi ba re̱ yi mai. ³¹ Aman, mai se̱ kpao hoo e̱ghe̱ o̱ba so̱i eli emi na ere̱me̱n alo̱ re̱ baa na. ³² Vbae lofe̱n, ivbi asikoko li kere, erimidi era vba zemi mo̱n o̱en ghe̱ me̱n vbi udu lo̱ lo̱ rii e̱ghe̱ o̱ba so̱i na mai. ³³ Vba shin emi li vba mo̱e̱n vba re̱ ni eli e̱so̱n o̱gbe. Vba e̱he̱n e̱kpe̱gho li egbe vba lo̱ kha so̱o̱ a - efe vbi okhumi - eimi lo̱ ya foo, ebi o̱i kha meti se̱, li ekhain kha ria a. ³⁴ Ebi efe se̱ rii, evbo li udu se̱ lo̱ gbo e.e ³⁵ Vba fili ukpun vba lo̱ rere o vbi e̱ke̱n ebi ulo̱ za ri ekugba nwuo̱in, vba zi urukpa vba ya vbae. ³⁶ Vba u bi eia li an goo o̱ga si ain, li e̱ghe̱ lo̱lo̱ re̱ vare, vbi eba za o̱ koo o̱kposo, lo̱ i u kho̱ o̱kha vare lo̱i sobo̱, li yain re̱ khu li ukhe̱de̱ nai agalagala. ³⁷ Ela hian ba i khi eli ayi ain uhumi na li o̱ga si ain kha vare, o̱ gi ain ze vbi ekhe̱e̱. Ata vbata, i re̱o̱ vba, o̱lo̱ fili e̱un so̱i li woo o̱ vbi ebi ekungba ri, o̱ i ain dia lei re̱ emae, o̱lo̱ vare yan yi o̱i uhumi. ³⁸ Oli o̱ga kha ri akhe egbe lo̱ zeva vare vbi aso̱n, da akheegbe o̱zi ea, lo̱ re̱ gaze khi e ehen egbe, elahianba i khi eli o̱gbo̱madia an. ³⁹ Vba e̱n e̱na bai, khi o̱li oga li o̱mo̱ oa kha ēn e̱ghe̱ li oi lo̱ re̱ vare, o̱kha zo̱i gob iwe so̱i a nai re̱ ore. ⁴⁰ Vba gboi e̱he̱be, erimidi khi vbai e̱n e̱ghe̱ li ovbi o̱ia lo̱ re̱ vare. ⁴¹ Ipita re̱o, "Ōlo̱mo̱e̱n mamai uo̱kpa wa ti o̱li evbena ni ho̱n, da gbo re̱ yi eia ere̱me̱n?" ⁴² O̱lo̱mo̱e̱n re̱ o̱i, "O̱i ke khi o̱li o̱gbo̱madia isi ata bi o̱zi e̱wain lo̱rii e̱o khu, li o̱ga so̱i lo̱ nwun o̱ vbi uhumi si o̱gbo̱madia no̱i, lo̱ i ya ri emae si ain ni ain vbi e̱ghe̱ lo̱ de o̱vbo? ⁴³ O̱la hianba i khi o̱li o̱gbo̱madia li o̱ga lo̱i lo̱ ga ze kho̱ o ui yo̱ so̱ vare. ⁴⁴ Atai re̱tai yi vba khi o̱li ro̱i chie̱n o̱lo̱ gbe̱o khae̱o gho emi so̱i ere̱me̱n. ⁴⁵ O̱li o̱gbo̱madia kha ke re̱ke̱n udu so̱i ta, "O̱lo̱mo̱e̱n me̱n o̱ ke te̱ vbi uvare so̱i, Lo̱i ya gbi o̱gbo̱madia li imo̱he bi eli ikposo, lo̱i ya ee bi o̱da se̱ vbo̱ khi o̱de̱ yo̱n gbegbe, ⁴⁶ o̱ga si o̱li o̱gbo̱madia an o̱ vare vbi ukpe̱de̱ lo̱i ka o̱vbo̱, bi eke̱n ēghe̱ lo̱ i e̱n, o̱ lo̱ gue gho̱i ese̱se̱mi o̱ kpe hoo ehe nai de ba elei uata. ⁴⁷ O̱li o̱gbo̱madia lo̱ u kho̱ o̱ e̱n ihume̱nken si oga so̱i, lo̱i re̱ e̱he̱n gbe, da o̱i uemi ebi o̱i hoo̱i, a lo̱ rii ekpa lo̱bun gbo̱i. ⁴⁸ Aman o̱lo̱ i e̱n lo̱ uemi la lo̱ gbo̱i ni a lo̱ ri ekpai kere gbo̱i. Aman eia ere̱me̱n la ri emi lo̱bun ni, obo̱ si ain alo̱ gbo za hoo emi lo̱bun, o̱la ri adiudu an nwin emi o̱i vbi obo̱, emi lo̱bun le̱ iyo̱ miain. ⁴⁹ I vare lire̱ ri erain run o̱vbi agbo̱n, evii khai mio̱n khi o̱ve̱n lee. ⁵⁰ Aman, I mo̱n Ibaptisti li lo̱ u ukha mii ebo̱i to̱ nwin iria ekein an ne me̱n se̱ vbo̱ khi a uo̱i le! ⁵¹ Vba oo khi I vare li re̱ nwin o̱fure o̱ vbi o̱lagbon na? O̱gho̱, I tai navba ho̱n, aman, emo̱n u, o̱ gha ye. ⁵² Re̱ za vbi e̱na raale̱, etui ihie̱n vbi iwe o̱kpa le kin egbe - eia ea muzan re̱ khaan eia eva, eia ei a emuzan re̱khaan eia ea. ⁵³ Elo̱ gha yi egbe, era muzan rekhaan ovbioi lo̱mo̱he, ovbio̱ia lo̱mo̱he muzan re̱khaan erai, inyo̱n muzan re̱khan ovbio̱i lo̱ kposo, ovbio̱ia lo̱kpo so muzan re̱khaan inyo̱in; inyo̱n do̱n muzan re̱khaan o̱ho̱mo̱n. So̱i, bi o̱ho̱mo̱ so̱ia muzan re̱khan inyo̱ndo̱in. ⁵⁴ Ijesu ogboi tani eli obotu ho̱n, o̱re̱ iain, "Vbakha mie̱n khi ohuu o̱ khua egbe vbi ebi o̱ e̱n o̱za deo, agalagala vba o̱i khi "Ame̱n lo̱ ro̱n, i yo̱ lo̱i ruan. ⁵⁵ E̱ghe̱ li efioo si ebi adele̱o ye o̱ fu o, vba o̱i, "ovo̱n lo̱ to vbi egbe o̱lo̱ vbae, iyo̱ lai mio̱in. ⁵⁶ Vbavba ekhe̱ eia si eo, vba e̱n emari emi lo̱ yi ebe dianre vbi uhumoto̱i da okhumieimi, ta. aman e bo̱ ke i u khi vbi metin e̱n ebai ri o̱le̱ghe̱ na? ⁵⁷ Emo̱ze̱ li vbai re̱ meti ghaezon si emi lo̱ de o̱bbo̱ legbe vba? ⁵⁸ Vba bi o̱be se̱ kha lo̱de vbi esi o̱lo̱ ghaezo̱n, vba kha di idamu kpode̱ hoo ebi vba lo̱i ri egbe vba haan, lo̱ eo̱ si e̱ lode̱ vbe si o̱lo̱gue̱zo̱n o̱ ze̱ we̱ obo̱ li olisighan, li olisighan eo̱ nwue̱n jio̱ vbi ighan. ⁵⁹ I tai ni vba ho̱n, u kha za vbi evbo dian re, se̱ vbi e̱ghe̱ lu lo̱ re̱ hai iko̱bo̱ okere le lu mo̱o̱in.