¹ Oruain e̱ghe̱ li Ijesu o̱ re̱ liero̱n mo̱n vbi ayio̱kpa, li o̱kpa vbi ivbiuokho so̱i re̱ o̱i, "O̱lo̱mo̱e̱n, vbie̱ mai ebi ai li ero̱nmo̱n ebi Ijo̱ni ivbie̱ ivbiuokho so̱i. ² Ijesu re̱ i ain, "Vba kha li ero̱nmo̱n vba o̱i, "Era ai nwin ekpe̱n ni eni se̱. Zi e̱ghe̱ o̱ba se̱ vare, ³ Ri emai si ukpe̱de na mai e̱de̱ e̱de ⁴ Ri o̱kho̱o̱ mai hume̱n mai ela bi mai re̱ hume̱n eia ere̱me̱n le u mai o̱kho̱o̱. E zi mai ovbi Ikhuankhe̱." ⁵ Ijesu ta ni ain ho̱n, "I yi o̱lo̱ u fi vba lo̱ bo̱ mo̱n o̱mo̱, li o̱lo̱ buu vbi udo mu he̱n lo̱i re̱ o̱i, "O̱mo̱, ri usui akaa ea ne̱ me̱n mo̱mo̱n, ⁶ ebo̱i kho̱ o̱mo̱ me̱n ghe za vbi uhumu kpode̱ o re, i mo̱n emi o̱so li lo̱ nwuo̱i vboto̱i nai e." ⁷ E̱ghe̱ an o̱li ri vbi ekein iwe lo̱ anye̱n lo̱ meti o̱i, "Eke kpokpo me̱n. Ake khuhi ukhe̱de̱ le, mai bi ivbi me̱n ke me̱he̱n. I kha meti sho̱re li re̱ nwin akaa na." ⁸ I tai na vba ho̱n khi akha re̱ o̱i khi o̱ sho̱re lo̱i ri akaa nai erimidi khi o̱mo̱ o̱ lo̱ u, o̱ re̱ riiyo̱, erimidi si uri ile̱kho̱i vbio̱i te̱te̱e̱, o̱lo̱ sho̱re lo̱ re̱ ri akaa lo̱bun ebwi hoo o̱ na. ⁹ I ta na ho̱n, mian, olo̱ re̱ na, hoo emi ulo̱ mie̱n, suobo̱ o̱lo̱ uu yea na. ¹⁰ O̱ia lo̱ vbiemi lo̱ mie̱n, o̱ia lo̱ hoo emi o̱mio̱n, ke re̱ yi o̱lo̱ suobo̱, alo̱ vu ye a. ¹¹ Iyi era vbi usee vba, li ovbio̱i lo̱ vbio̱i ehe̱n, o̱ri e̱ye̱n vbi ehee si ehe̱n. I yi era vbi usee vba li ovbio̱i kha o̱i lo̱ rii akaa o̱kpa ni o̱in, o̱ nwin udo nai? Daa ehe̱n lo̱i re̱ rii e̱ye̱n nai? ¹² Da o̱kha vbi eke̱n o̱o̱kho̱ rii ehiaghoi nai. ¹³ O̱hio̱ si o̱na, akhai khi vba vba li vba vbi o̱be e̱n ebai rii ei le̱se̱n hunmi ivbi vba ohan, eke ka ike khi era main lo̱ za vbi okhumi eimi rii etin lo̱fun an ni elo̱ vbi o̱i? ¹⁴ E̱ghe̱ ain, Ijesu o̱ khui ovbi esun lo odi din an re. O̱li ovbiesun ke dian re, o̱li o̱mo̱he li odi, o̱ti et a ali obotu za yin unu a. ¹⁵ Aman, eso vbi eli eia re̱ ta khi. Utotomi si Ibezibo̱bu lo̱ ri ivbiesun shan lo̱ re̱ khui ivbiesu din an re. ¹⁶ Eno̱i damai gho, yan re̱ o̱i lo̱i rii a e̱e̱n vbie̱ i ain. ¹⁷ Aman, Ijesu e̱n ao si ain, o̱ ta ni ain ho̱n khi, "Agbegbe lo̱ u gbei fbei lo̱ kin egbo̱i rekhan egboi o̱lo̱ de. ¹⁸ Akhai khi esun kin egbo̱i re̱khan egbo̱i, ebi o̱li agbegbe so̱i lo̱ kei muzan? ¹⁹ I kha rii ibe̱zibo̱bu khui ivbiesun din an re, utotomi si emi elo̱ re̱khan vba o̱re̱ khui ain din an re? Erimidi si o̱na, yan lo̱ chie̱n elo̱lo̱ gha e̱ zon vba. ²⁰ Aman, I kha ri ukpohiobo̱ si Oise̱le̱bua khui ivbie sun sin an re, e̱ghe̱ an e̱ghe̱ o̱ba vare yi vba. ²¹ O̱mo̱he lo̱ totoi lo̱ mo̱n emio kho̱in vbi o̱khe̱e̱ oa si egbe so̱i, emi lo̱ mo̱en ri vbi ofure. ²² Ama e̱ghe̱ li o̱lo̱ toto le o̱i kha de khun o̱n lo̱i meti gbo̱i, o̱lo̱ toto le̱i o̱n an, o̱lo̱ mie̱ o̱n emi okho̱in shi vbo̱ lo̱ mo̱he obo̱ re, o̱huai emi lo̱ mo̱en. ²³ Oia lo̱i de baa me̱n, o̱be me̱n o̱n, o̱lo̱i de ba me̱n hua koko, o̱ ya ghaa. ²⁴ E̱ghe̱ li etin lo̱ifunan sho̱ vbi e̱ke̱n egbe si o̱mo̱he re, o̱ shain vbi ebo̱ ka kai ra re o̱ hoo i fe tain. So̱i mio̱n o̱ o̱i, "I lo̱ chie lode̱ vbi iwe me̱n, ebi za din an re." ²⁵ Ebo̱i chiere, o̱ ga ze kha we̱li o̱li iwe din an re, a e̱he̱n mi kue̱kue̱, ²⁶ O̱le̱ ghē o̱lo̱ lode̱ lo̱i re̱ o̱ hua etin ihio̱n evbee baa egbe le kho̱o̱ le̱i o̱in, ere̱me̱n ore o̱ dia vbaan. O̱lēghe ebi o̱lo̱ mo̱he kei zegbe ikpuokho o̱lo̱ kho̱o̱ le kpao so̱i." ²⁷ O̱run ain khi ebo̱i tii eli emi, o̱kposo o̱kpa khue urun voo oli obotu, lo̱ re̱ o̱i, "Ihianba li khi e̱kpomon luzan din are bi e ye̱n la re̱ kue̱." ²⁸ Aman, o̱re̱ ta, "Emi lu kha ta li khi, Ihian ba i khi elo̱ hin et a si Oise̱le̱bua le ro̱i hee." ²⁹ Ebi eli obotu o̱ kei bun o̱ vbo̱, Ijesu be̱e̱ lo̱ re̱ ta, "O̱li oree na oree lo̱i hunme̱n o̱n. O̱ hoo ae̱e̱n, be̱ a kha rii ae̱e̱n ni ain, lo̱i vbi ae̱e̱n isi Ijona. ³⁰ O̱hio̱ si ebi Ijona chie̱n ae̱e̱n yi ekhe̱n Ininevi, iyo̱ gboo̱ li ovbio̱ia lo̱i vbi ae̱e̱n yi oree na. ³¹ Oje lo̱kposo si Isaut o̱lo̱ khua egbe e̱ghe̱ si ighae̱zo̱n si o̱li ore na, o̱ri ihohi nain, o̱hio̱ khi oza vbi ebi oto̱i se̱ vare o̱ hin ewain isi isolomoni, kae̱oa, o̱ia lo̱ lei Isolomoni o̱ri vbaan. ³² Imohe si Ininevi lo̱ dan muzan eghe si ighaezo̱n si eia si oree na le i ri ibohi ni ain, o̱hio̱ khi eo ekein ebi Ijona re̱ wewe, vba ghogho, o̱lo̱ lei Ijona ri vbaan. ³³ Oto̱kpa i evbo̱ o̱l kha ri urukpa run le, lo̱i nwoin o̱ vbi ebo̱ la hee da vbi e̱ge̱ge̱n ugin, sokpen vbi okhumi eba nwun urukpa o̱, li eia ni an o̱ vbi eke̱in iwe re̱ ro̱i muye. ³⁴ E̱o see̱ li khi urukpa isi egbe. E̱o se̱ kha hunme̱n egbe ere̱me̱n vo̱n yi o̱fun an. Aman, si e̱ o se̱ i hume̱n, egbe se̱ vo̱n yi aso̱n. ³⁵ O̱hio̱ si o̱na, ri ee o̱vbi egbe, khi o̱li o̱fuan lo̱ ri vbi e̱ke̱n egbe se̱e̱ kho̱i vbi aso̱n. ³⁶ O̱kha keu khi egbe se̱ vo̱n yi o̱fuan khi ebo̱ so vbo̱ i evbi aso̱n, o̱le̱ghe̱ egbe se̱ ere̱me̱n lo̱ u bi e̱ghe̱ li urukpa o̱ vbae nwun e̱n yan yan yan. ³⁷ O̱ke ti eta le, Ifarisi o̱kpa re̱ o̱ de ba i o̱n emae vbi iwe sio̱in, li Ijesu re̱ re̱khain o̱i emae. ³⁸ O̱ nyin o̱li Ifarisi e̱o khi Ijesu ikpi abo̱a o̱kpe emae. ³⁹ Aman, o̱lo̱mo̱e̱n tanai ho̱n, o̱re̱ o̱i, "Enyan, e̱ghe̱ li vba vba li Ifarisi khuu uokhi uko bi itasa a, aman e̱ke̱in vba vo̱n yi ise̱me̱ okhau be ue̱n lebe, ⁴⁰ Vba vba li imohe lei mo̱n e̱wain. O̱li o̱ia lo̱ chin uokhoi ko̱ gbo e̱hin e̱ke̱n o̱n? ⁴¹ Rii emi lo̱ ri vbi e̱ke̱n o̱n ni o̱lo̱i no̱n e̱n, o̱li e̱ghe̱ emi ere̱me̱n lo̱ re̱ fuan na. ⁴² Aman, i khue o o̱ re̱ yi vba vba li ekhe̱n Ifarisi, erimidi khi vba zi ahin igbe vbi iminti bi irue bi ebe no̱i lo ri uvbiado, aman vba gbe̱o raa we̱n lo̱ de ovbo re bi ihume̱nke̱n Oise̱le̱bua. O̱ e ovbo lai re rii wee ebo̱i de o̱vbi bi lai hume̱nke̱n Oise̱le̱bua, bi ai dia khai ui emi no̱i akie̱. ⁴³ Ikhueo o̱ re̱ yi Ifarisi, vba hume̱nke̱n udia lo̱ ri vbi isao vbi e̱ke̱n ebaza di dwekin. ⁴⁴ Ikhue o re̱ yi vba, eri vba u bi idi lai rii ae̱e̱n o̱n li eia o̱ shin o̱khumo̱in rare khin ei e̱n. ⁴⁵ O̱kpa vbi elo̱vbie̱ isi uhi re̱ o̱i, "O̱lo̱vbie, emi li uata gbo ui ukhue yi mai." ⁴⁶ Ijesu re̱ o̱i, "Ikhue o o̱ re̱ yi vba vba li vba vbie̱ uhi! Vba zi ihua lo̱ miame̱ re̱ hua he eia, vba vba i ri ukpohiobo isa vba so oli ihua. ⁴⁷ Ikhue o re̱ yi vba erimidi khi vba ze̱ li idi li ekhe̱n imieo, be̱ eravba le̱de̱, le gboo i an. ⁴⁸ O̱ se̱e̱ vba u, vba mo̱n obo̱ o̱ vbi obia si eravba le̱de̱, o̱hio̱ khi yain go̱o̱n le gboo i an, vba vba za ze̱li idi si ain. ⁴⁹ O̱hio̱ si o̱na, li ewain si Oise̱le̱bua re̱ ta, i lo̱ yi e̱khe̱n imie̱o bi aposto re̱i ain, elo̱ ri uroo kpo kpi ain, egboo eso vbi ain. ⁵⁰ O̱na li khi oree na, la lo̱ ke oi khi yain leke mo̱n obo̱ o̱ vbi e̱ re ere̱me̱n si eli imie̱o la gbi ain e̱re kua obo̱ li agbo̱n re̱ be̱e̱. ⁵¹ Re̱ zavbi e̱re si Abe̱li di e̱re̱ si Izakaria, lagbe vbi esese̱ si ikpe̱kpoisa bi itempo. He̱, i taire̱ yi vba khi oli oreena li alo ke mian gho. ⁵² Ikhueo o̱ re̱ yi vba, elo vbie uhi si ekhe̱n Ijiu, erimidi khi vba hua iko̱ko̱ si oe̱n sho̱re, vba legbe vba o vbi ekei o̱n vba di ele lo̱ ovbo̱ obo̱ yen." ⁵³ Ijesu ke sho̱ vbi an re, ekhe̱n ivbiebe bi Ifarisi bi ohan nai, kpa yo̱i khae run vbe̱ mo̱n emi lebun. ⁵⁴ Ya hoo emi le lo̱ kpe̱ ye̱n vbi eta so̱i.