¹ Ntyo lero, Kristu anacilibuka omu mubiri, ninyu mucihangane mulyi ezo ntanya bulya owalibukaga omu mubiri, ayusiz'ebyaha, ² obuzinda, murhacilamaga omu lwifinjo lw'abantu, ci om'obulonza bwa Nyamuzinda, mwa kano kasanzi kasigire k'okulama oku mubiri. ³ Bibenrage ntyo, ako kasanzi rhwalamire, om'obulonza bw'abapagani, mwalambagira omu enyifinjo mbi z'obugonyi, endalwe, obudambi, kulya n'okunywa n'okucikumba enshushano n'obunisi. ⁴ Ntyo mucibone bigolo omu kurhacikweba haguma nabo omukuhabukira omu bugonyi n;okubakoza. ⁵ Baishi ana omubale, gw'abatwira abazine n'abafire olubanja. ⁶ Bulya omwanzi gw'akalembe nago gwali gwadesirwe ok'abafire, mpu lyo e'nyuma ly'okutwirwa olubanja nk'abantu okumubiri balamire mulyi Nyamuzinda omu murhima mweru. ⁷ Obuzinda bwa ngasi kantu buyegerire. Mubage benge mugendekere omu mahuno. ⁸ Enyanya z'emyanzi yoshi, muzigirane mwene ne mwene, bulya obuzigire, buna bundike obunji bw'ebyaha. ⁹ Muyegerezanye mwene na mwene, buzir'akarhinda. ¹⁰ Nka bakozi binja b'olukogo lwa Nyamuzinda, ngasi muguma wirhu akolere abandi om'ensokano ahabagwa, ¹¹ Nka muguma ankaderha, aderhe emyanzi ya Nyamuzinda, nka muguma ankayunjula mikolo, kugerera emisi ya Nyamuzinda. Ayalagaze, mpu ly'omu ngasi bintu, Nyamuzinda akuzibwe muly'Yesu Kristu, oy'oderhe obuhashe n'obukuze e'myaka m'emyaka. Amena. ¹² Bazigirwa, murhasomeragwa nka kantu ka cigolo kamuishire egarhi kinyu k'amarhangulo ga muliro, kakubagera. ¹³ Cikone nka mwankaba lushangi omu malibuko ga Kristu, mpu lyo haguma naye om'obufuke bwage mushagaluke, hano aisha. ¹⁴ Nka mwanka ganyaguzibwa oku izino lya Kristu, muli bany'iragi, bulya omurhima g'obukuze n'omurhima gwa Nyamuzinga gulyi e'nyanya zinyu. ¹⁵ Nta muguma winyu, ciru arhaciribuzagya nka munizi, erhi cishambo, erhi nkola maligo, erhi nkawakucibika omu birhali byage. ¹⁶ Cikone, nka muguma wirhu ankalibuka, nka mukristu, arhafaga nshonyi, okukulu akuze Nyamuzinda e'nyanya ly'ely'izino. ¹⁷ Cicirhumire, akasanzi k'okutwa olubanja karhonderera omu nyumpa ya Nyamuzinda. Lero erhi ankaba, rhwe karhonderera koo, obuzinda bw'abarhakengiri akalembe ka Nyamuzinda kurhi bikaba? ¹⁸ N'erhi ankab'abashinganyanya baishi cunguka oku malibuko, kurhi byaishi bera abarhacire n'abanya byaha? ¹⁹ Na ntyo ngasi abali balibuka ok'obulonza bwa Nyamuzinda bali babika emirhima yabo em'omulangalirwa mulemi, omukujira ebiri binja.