¹ Yesus beromong lagek ke sidak dalam perumpamaan-perumpamaan, tutor-Nye, ² "Kerajaan Suru'ge bise diumpamaan macam seurang raje an mengadean pesta pepalet engkai anak laki-lakinye. ³ Wan, nye'e menyioh padangan hambenye engkai menalau urang-urang an udah diundang ke pesta onan, tetapi sidak cade hondak menjuhak. ⁴ Lopas, raje menyioh lagek hambe-hambe an loyen. tutornye, 'Romonganam ke urang-urang an diundang, Liat, doan udah mempesiyopan hidangandan. Lembu-lembu lelaki wan hiyoman-hiyoman gomok semuenye tolah disemboleh, wan semuenye udah siap. Menjuhak'am ke perjamuan pepalet inen.' ⁵ Kliagak, sidak menyelalengan wan betulak, an laen ke lakaunye, an laen ke usahenye, ⁶ wan an laenye mengkap hambe-hambe raje onan, menyikse, wan membunoh sidak. ⁷ Make, sang raje godi, wan mengirem tentare-tentarenye, membinasaan pembuno-pembunoh onan, wan mecucol kute sidak. ⁸ Dahnonan, Nye'e betutor ke hambe-hambenye, ' Kamoh pepalet udah siap, tetapi urang-urang an diundang onan cade layak. ⁹ Oleh kerene onan, betulaklah ke jalan-jalan raye wan undangam sebeyepe rami urang an bise kolai nyumpei ke kamoh pepalet inen. ¹⁰ Make, hambe-hambe onan betulak ke jalan-jalan wan mengumpolan semue urang an sidak temui, an boyek wan an johat. Wan, tompat pepaletan onan di ponohi juan padangan tamu. ¹¹ Kliagak, ketike raje tamak engkai betomu juan padangan tamunye, nye'e meliat seseurang di so'on,an cade mengenean pekoyan engkai kamoh pepalet. ¹² Nye'e betutor ke'nye, 'Dulor, macammene kolai bise tamak ke se'en tanpe memakai pekoyan engkai kamoh pepalet? Wan, urang onan tediam. ¹³ Dahnonan raje onan betutor ke hambe-hambenye, 'Kobatlah kukot wan pehenye, wan buanganam nye'e ke dalam kepotang an paleng kuar, Di so'on, bakal adw tanges wan kertk gigi.' ¹⁴ Sobab, rami an ditalau, tetapi sediket an dipileh.'' ¹⁵ Dahnonan, urang-urang Farisi betulak wan bekomplot supaye sidak bise menjerat Yesus juan romong-Nye. ¹⁶ Wan, sidak meutos mured-mured sidak ke Yesus, besesame juan urang-urang Herodian. Sidak betutor, "Guru, rang koai tohu bahwe Engkau jujor wan memadahi jalan Allah dalam kebonaran. Engkau cade golak pade sape pon kerene Engkau cade meliat rupe. ¹⁷ Kalau benonan, tutoranlah pendapat-Di'i ke rang koai. Apekah dibonaran engkai mebarai pajak ke kaisar atau cade? ¹⁸ Kliagak, Yesus mengetohui kejohatan sidak wan betutor, "Meape kolai mencubei Doan, hai munafik" ¹⁹ Tunjokanlah ke-Dan duet engkai pajak onan. "Lopas, sidak menyerahan sekopeng dinar ke-Nye ²⁰ Wan, Nye'e betutor ke sidak, ''Gambar wan tulesan sape inen?" ²¹ Sidak menjawab, "Kaisar". Dahnonan, yesus betutor ke sidak, " Oleh kerene onan, bayarlah ke kaisar hal-hal punye kaisar, wan ke Allah hal-hal an adelah punye Allah." ²² Ketike mendongainye, sidak teheran-heran, wan meninggolan-Nye wan betulak ²³ Pade ari an same, urang-urang Saduki, an betutor bahwe cade ade kebangkitan, menjuhak ke Yesus wan betakon ke-Nye. ²⁴ Sidak betutor, "Guru, Musa betutor bahwe jika seurang laki-laki mati wan cade mempunyei anak, dulor laki-lakinye haros memaleti bininye wan menerusan keturonnye bagi dulornye an meninggal onan. ²⁵ Kanninam, ade tujoh sepedulor dia antare rang koai. An petame bepalet, wan mati tanpe mempunyei anak, wan meninggolan bininye bagi sepedulornye. ²⁶ Macamnonan juge juan an kedue, an ketige, sampai an ketujoh. ²⁷ Aker tanggai semuaenye, betine onan juge mati. ²⁸ Pade ari kebangketan, betine onan menjdi bini sape tanggai tujuh sepeduloran onan sobab, sidak semue tolah mengawinininye. ²⁹ Kliagak, Yesus menyaout wan betutor ke sidak, "Kolai tesosat, cade mengeroti Kitab Suci, ataupon kuase Allah. ³⁰ Sobab, pade ari kebangkitan, sidak cade bepalet atau pon dipepalet, tetapi macam malaikat-malaikat di suru'ge. ³¹ Namon, mengenei kebangketan urang-urang mati, olomkah kolai membace ape an ditutoran kedi'i oleh Allah, ³² Doanlah Allah Abraham, Allah Ishak, wan Allah Yakub'? Nye'e ukan Allah urang mati, meloyenen Allah urang an hidop." ³³ Ketike urang rami mendongai hal inen, sidak teheran-heran tehadap-Nye. ³⁴ Namon, ketike urang-urang Farisi mendongai bahwe Yesus tolah meulah urang-urang Saduki tediam, bekekumpol. ³⁵ Dahnonan, seikok tanggai sidak, seurang ahli Ukom Taurat, betakon ke Yesus engkai menguji-Nye, ³⁶ "Guru, perintah menekah an teponteng dalam Ukom Taurat?" ³⁷ Wan, Yesus betutor kenye, " Kolai haros mengesihi Duate Allahdi'i juan segonap hatidi'i, wan juan segonap jiwedi'i wan juansegonap pikerandi'i. ³⁸ Inen adelah perintah an tebosar wan an petame. ³⁹ An kedue adelah macam inan, "Kolai haros mengasehi sesamedi'i macam di'i seurang ⁴⁰ Dalam kedue perintah inen, tegantong semue Ukom Taurat wan kitab padangan nabi." ⁴¹ Kanninam, sementare urang-urang Farisi bekekompol besesame, Yesus betakon ke sidak, ⁴² "Macammene menuroddi'i tontang Kristus? Anak sapekah Nye'e?" Sidak betutor ke-Nye "Anak Daud." ⁴³ Nye betutor ke sidak, "Kalau benonan, macammenekah Daud, dalam Roh, manalau-Nye 'Tuan', tutornye, ⁴⁴ Duate berfirman ke Tuandan, "Dudoklah di sebolah kanan-Dan, sampai Doan menompatan munsoh-munsoh-Mu di babah pehe-Di'i? Mazmur 110:1 ⁴⁵ Jike Daud menalau Kristus sabagai 'Tuan', macammene mungken Nye'e adelah anak Daud?" ⁴⁶ Cade seurangpon an bise menjawab sutek kate pon ke-Nye. Wan, sejak ari onan, cade ade urang an berani menanyak'an pertanyean-pertanyean lagek ke-Nye.