¹ Dahnonan, Yesus beromong ke urang rami wan mured-mured-Nye, ² "Padangan ahli Taurat wan urang-urang Farisi dudok di pucok kurusi Musa. ³ Oleh kerene onan, segale hal, sbanyak an sidak katean kedi'i, lakuanam wan peratianam. Kliagak, gowok lakuan kelakuan-kelakuannye kerene sidak menutorannye, tetapi cade melakuannye. ⁴ Sidak mengobatan boban-boban an borat wan meletak'nye di pucok bohu urang laen. Kliagak, sidak seurang cade hondak memindahannye juan kukot sidak. ⁵ Sidak melakuan semue kelakuan sidak supaye dilihat urang. Sidak memperluaskan tali-tali sesombahnye wan mempeluas rumbai-rumbai ujung jubah sidak. ⁶ Sidak menyukei tompat terhormat dalam perjamuan, tompat dudok hedopan dalam sinagoge-sinagoge, ⁷ salam penghormatan di tompat-tompat umom, wan disobot Rabi oleh urang-urang. ⁸ Kliagak, kolai gowok disobot rabi kerene ongkah seikok Gurudi'i, wan kolai semue sedulor. ⁹ Gowok menyobot sape saje sebagai bapadi'i di dunie inen kerene seikok saje Bapadi'i, Yeonan Nye'e an di suru'ge. ¹⁰ Gowok pule kolai disobot pemimpen kerene seikok saje pemimpendi'i, yaitu Kristus. ¹¹ Namon, an tebosar di antare kolai, hondaklah nye'e menjadi pelayandi'i. ¹² Sape an meningolan di'inye an dirondahan wan sape an merendahan di'inye bakal ditinggolan. ¹³ Celakelah kolai, ahli-ahli Taurat wan urang-urang Farisi, urang-urang munafik! Kolai menutop pintu Kerajaan Suru'ge di dopan urang kerene kolai seurang cade menamak'inye wan juge cade mengijinnan sidak an tongah tamak engkai menamak'inye. ¹⁴ Celakelah kolai, hai ahli-ahli Taurat wan urang-urang Farisi, urang-urang munafik! Kolai melahao rumah padangan jande wan engkai kepura-puraan kolai meulah du'e-du'e an panjang. Kerene onan, kolai bakal menerime ukoman an lobeh bosar. ¹⁵ Celakelah kolai, hai ahli-ahli Taurat wan urang-urang munafik! Kolai menjelajahi lowotan wan deratan engkai meumbai seurang tamak ke dalam agamedi'i. Wan, ketike nye'e udah menjadi salah satunye, kolai menjadikannye anak neraka, tanggai pade kolai seurang. ¹⁶ Celakalah kolai, hai padangan pemimpen bute, an betutor, "Sape an besumpah domi Bait Allah, hal onan cade ade artinye. Kliagak, sape an besumpah onan.' ¹⁷ Kolai, an awak wan an bute! Mene an tebosar, Omas atau Bait Allah an mengudusan omas onan? ¹⁸ Wan, 'Sape an besumpah domi altar, sumpah onan cade ade artinye. Kliagak, sape an besumpah domi persahabatan di pucok altar onan, nye'e terikat oleh sunpahnye onan.' ¹⁹ Hai kolai urang-urang bute! Mene an bosar, persombahan atau altar an mengudusan persahabatan onan? ²⁰ Kerene onan, sape an besumpah domi altar, besumpah domi altar wan semue an ade di pucoknye. ²¹ Wan sape an besumpah domi Bait Allah, besumpah domi Bait Allah wan domi Nye'e an diam di dalamnye ²² Wan sape an besumpah domi suru'ge, besumpah domi takhta Allah, wan domi Nye'e an dudok di pucoknye. ²³ Celakelah kolai, hai ahli-ahli taurat wan urang-urang Farisi, urang-urang munafik! Kolai meenji'i perpuluhandi'i tanggai selasih, adas manis, wan jintan, tetapi tolah mengabaiyan hal-hal an lobeh borat tanggai Ukom Taurat, yenonan keadilan, bolas kaseh, wam iman. Hal-hal inenlah an seharosnye udah kolai lakuan tanpe mengabayan hal-hal an loyen. ²⁴ Kolai pemimpen-pemimpen bute, an menyaring nyamok wan menolan seikok unte! ²⁵ Celakelah kolai, hai ahli-ahli Taurat, wan urang-urang Farisi, urang-urang munafik! Sobab, kolai memberisahn bagian luar cawan wan pinggandi'i, tetapi bagian dalamnye ponoh rampasan juan keserakahan. ²⁶ Kolai, urang-urang farisi an bute! Beresihan lohok bagian dalam cawan wan pinggan, make bagian luarnye juge bise menjadi beroseh. ²⁷ Celakehlah kolai, ahli-ahli Taurat wan urang-urang Farisi, urang-urang munafik! Sobab, kolai same macam posaran an dicat puteh, pade bagian laurnye keliatan bagas, tetapi bagian dalamnye ponoh juan tulang-tulang urang mati wan semue kenajisan. ²⁸ Benonan pule juan juan kolai, pade bagian luar kolai tampak bonar bagi mendesie. Kliagak kolai ponoh kemunafikan wan kejohatan. ²⁹ Celakelah kolai, ahli-ahli taurat wan urrang-urang Farisi, urang-urang munafik! Sobab, kolai membangun posaran-posaran padangan nabi wan memerintahan nisan-nisan urang-urang saleh, ³⁰ wan betutor, 'Jike urang koai udah hidop pade mase nenek bayan urang koai, urangkoai bakal jatah juan sidak dalam darah padangan nabi.' ³¹ Juan beonan, kolai bersaksi terhadap di'ikolai seurang anak-anak sidak an membunoh padangan nabi. ³² Jadi, gonapilah ukuran padangan ninek bayandi'i. ³³ Kolai, ular-ular, keturonan ular-ular beludak, macammene kolai bakal melopasan di'i tanggai ukoman neraka? ³⁴ Kerene ona, liatlah, Doan mengutos nabi-nabi, urang-urang bijaksane, wan ahli-ahli Taurat kedi'i. Bebeyepe tanggai sidak bakal kolai bunoh wan salibkan, bebeyepe bakal kolai pungkali di sinagoge-sinagogedi'i, wan kolai aniaya tanggai kute ke kute, ³⁵ supaye semue darah urang-urang bonar an ditumpahan di bumi bakal menjuhak ke'di'i, mule tanggai darah Habel, sampai ke darah Zakharia, Biak Berekhya, an kolai bunoh di antare Bait Allah wan altar. ³⁶ Sesunggohnye, doan menutoran ke'di'i bahwe semue hal-hal inen bakal menjuhak pucok generasi inen.'' ³⁷ "Oh Yerusalem, Yerusalem, an membunoh padangan nabi wan menikami juan batu sidak an diutos ke'nye. Betape puasnye Doan hondak mengumpulan anak-anakdi'i besesame, bagaikan indok manok mengumpulan anak-anaknye di babah sayapnye tetapi kolai cade hondak. ³⁸ Liatlah, rumahdi'i ditinggolan bagidi'i wan menjadi sunyek. ³⁹ Sobab, Doan mengatean ke'di'i bahwe mule kanninam, kolai cade bakal meliat Doan lagek sampai kolai betutor, Diberokatilah Nye'e an menjuhak dalam name Duate.''