¹ Ketike sidak udah hampeng juan Yerusalem wan udah tibe di Betfage, di buket Zaitun, Yesus mengutos due urang mured-Nye: ² Kate-Nye ke sidak, "Betulaklah ke desa an ade di hedopandi'i, wan kolai bakal langsong menemuan seikok keledai an tekobat wan seikok anak keledai besesamenye. Lopasanam kobatan sidak wan umbaiam keduenye ke-Doan. ³ Jike ade urang an menutoran sesuatu ke'di'i, kolai haros betutor, 'Duate memeroluannye wan Nye'e bakal langsong mengiremnye." ⁴ Hal oyen tejadi supayen tegonapilah ape an ditutoran oleh nabi: ⁵ Tutoran ke putri Sion, Liatam, Rajedi'i rondah hati, wan menunggang seikok keledai, juan seikok ledai mude, anak tanggai keledai boban. Zakharia 9:9 ⁶ Mured-mured betulak wan melakuan macam an udah Yesus perintahan ke sidak. ⁷ Sidak meumbai keledai beserete anak keledai onan, wan meabahan jubah-jubah sidak di pucok keledai-keledai onan, wan Yesus dudok di pucoknye. ⁸ Sebagian onan tanggai urang rami onan membentangkan jubah-jubah sidak di jalan, wan an loyennye menungkong ranteng-ranteng pohon, lopas menyobaranye di jalan. ⁹ Rami urang bejalan di hedopan-Nye wan sidak an memogi'i-Nye beseru, "Hosana bagi Anak Daud! Diberokatilah Nye'e an menjuhak dalam name Duate.' Hosana di tompat an tetinggi!" Mazmur 118:25-26 ¹⁰ Ketike Yesus memasuki Yerusalem, seluroh kute di gomparen. Sidak betakon, " Sape Nye'e inen?'' ¹¹ Wan, urang rami onan menyeout, "Nye'e adelah Nabi Yesus, tanggai Nazaret di Galilea." ¹² Lopas, Yesus tamak ke Bait Allah wan menguser urang-urang an tongah bejualboli di Bait Allah, lopas menyunsangbalek'an mije-mije penukaran duet wan bangku-bangku sidak an menjual burong-burong merpati. ¹³ Nye'e betutor ke sidak, "Tolah tetules, 'Rumah-Ku bakal di sobot rumah du'e, tetapi kolai menjadiannye sebagai sarang padangan perampok.''' ¹⁴ Wan, urang an bute serete an lumpoh menjuhak ke-Nye di Bait Allah, lopas Nye'e menyembuhan sidak. ¹⁵ Anon, ketike padangan domong kepale wan ahli-ahli mukjizat-mukjizat an udah dilakuan Yesus wan meliat anak-anak an beseru dalam Bait Allah, "Hosana bagi Anak Daud," sidak menjadi godi. ¹⁶ Lalu, sidak betakon ke Yesus, "Apekah Engkau mendongai an di tutoran anak-anak inene?" Wan, Yesus menyaout, "ya. Olom kalekah kolai membace, 'Tanggai mulot biak-biak wan anak-anak an menyusu, Engkau udah menyiopan puji engkai di'i-Mu seurang. ¹⁷ Dahnonan, Yesus meninggolan sidak wan keluar tanggai kute onan ke Batania wan bemalam di so'on. ¹⁸ Kanninam, pade ari gage, ketike Yesus beulang ke kute, Nye'e menjadi lapar. ¹⁹ Wan, ketike meliat pohon are di topi jalan, Nye'e mendapati ape-ape, kecuali dowon-dowon saje. Wan,Nye'e betutor ke pohon onan, "Cade bakal kale ade buah lagek tanggai padedi'i sampai selame-lamenye!" Saat onan juge, pohon are onan dijadian koreng. ²⁰ Ketike mured-mured meliat hal inen, padangan mured teheran-heran wan betakon, "Macammene pohon are onan koreng seketike ona gak'am?" ²¹ Wan, Yesus menyaout sidak, " Sesungguhnye doan betutor kedi'i, jike kolai mempunyei iman wan cade bimbang, kolai ukan hanye bakal melakuan ape an dilakuan tehadap pohon are inen, bahkan jike kolai betutor ke gunong inen, 'Torangilah wantercampaklah ke dalam lowot,' hal onan bakal tejadi. ²² Wan, segegale sesuatu an kolai minte dalam du'u, pecayelah, kolai bakal menerimenye." ²³ Ketike Yesus menamak'i Bait Allah, padangan iman kepale wan tetuhe-tetuhe bangse Yahudi menjuhak ke-Nye sementare Nye'e tongah mengajar wan betakon, " Juan kuase spekah Engkau melakuan hal-hal inen? Wan, siapekah an meonjok-Mu kuase inen?" ²⁴ Yesus menyaout sidak, "Doan juge bakal menanyean sutek hal kedi'i, an jike kolai bise menjawabnye, Doan juge bakal memborektohudi'i juan kuase ape Doan melakuan semue hali nen. ²⁵ Tanggai menekah baptisan Yohanes? Tanggai suru'ge atau tanggai Mendesie?" Wan, sidak mule meromonginye diantare sidak surang, katenye, "Jike kite betutor, 'Tanggai Suru'ge, 'Nye'e bakal betutor, 'Kalau benonen, meape kolai cade pecaye ke Yohanes?' ²⁶ Kliagak, jike kite menjawab. Berasal tanggai mendesie,' Kite golak ke urang rami kerene sidak semue menganggap bahwe Yohanes adelah nabi." ²⁷ Make sidak menjawab Yesus, " Urang koai cade tohu,'" Wan, Yesus betutor, " Kalau benonen, Doan juge cade bakal memborektohudi'i juan kuase apekah doan melakuan hal-hal inen."" ²⁸ "Amon, ape pendapatdi'i? Ade urang an mempunyei du anak laki-laki, wan nye'e menjuhak ke ke an petame wan betutor, 'Anakdan, betulak wan bekerije ari inen di kobon anggor.' ²⁹ Wan, nye'e menyaout, 'Ya, Bapa, ' tetapi setolah onan nye'e cade betulak. ³⁰ Dahnonan apang onan betulak ke an kedue wan menutoran hal ansame, Anak onan menyaout, 'Cade hondak. 'tetapi nye'e menyosal wan betulak. ³¹ Siapekah tanggai kedue anak onan an mematuhi apangnye? '' Sidak betutor, An teraker.'' Yesus betutor ke sidak, "Sesunggohnye, doan menutoran kedi'i bahwe padangan pengumpol pajak wan pelacur-pelacur bakal tamak ke dalam Kerajaan Allah melohok'i kolai. ³² Sobab, Yohanes menjuhak kedi'i dalamjalan kebonaran wan kolai cade mempecayeinye, tetapi, padangan pengumpol pajak wan pelacor-pelacor mempecayeinye. Wan, kolai, ketike meliat hal ine bahkaan cade menyosal seudahnye sehingge kolai bise mempercayeinye." ³³ "Dongailah perumpamaan an loyen. Ade punye kobon an menanami sebuah kobon anggur, wan memasang pagar di sekelilingnye, wan menggali tompat pemorasan anggur, wan mendirian menare. ³⁴ Dahnonan, nye'e menyiwean kobon anggurnye ke bebeyepe petani, wan nye'e betulak ke luar negori. Ketike musem buah hamper tibe, nye'e menyioh hambe-hambenye ke petani-petani onan engkai menerime buahnye. ³⁵ Wan, padangan petani manangkap padangan pelayan onan wan memungkal an seurang, wan membunoh an satu, wan an loyennye ditikammi batu. ³⁶ Sekekali lagek, punye kobon onan menyioh hambe-hambenye an loyen, an lobeh rami tanggai pade seolomnye. Wan. padangan petani onan melakuan hal an same tehadap sidak. ³⁷ Akernye, punye kobon onan mengutos anaknye ke sidak, tutornye, 'Sidak bakal menghormati anakdan. ³⁸ Kliagak, ketike padangan petani onan meliat anaknye, sidak betutor di antare sidak seurang, 'Nye'e adelah ahli waris, ayok'am kite unoh nye'e wan merampas warisannye. ³⁹ Lalu, sidak menangkap anal punye kobon onan, membuangannye ke luar kobon anggur, wan membunohnye ⁴⁰ Kerene onan, ketike punye kobon anggur onan menjuhak, ape an bakal nye'e lakuan ke petani-petani onan?" ⁴¹ Sidak betutor ke-Nye, "Nye'e bakal membinasakan urang-urang johat onan juan paleng johat, wan bakal menyiwean kobon anggurnye ke petani-petani an loyen, an bakal menyerahan kenye buah-buah pade musemnye.'' ⁴² Yesus betutor ke sidak, "Apekah kolai cade kale membace dalam Kitab Suci: 'Batu an ditulak oleh tukang-tukang bangunan tolah menjadi batu penjuru. Hal inen tejadi tanggai pihak Duate, wan hal ine ajaib di mate kite'? Mazmur 118:22-23 ⁴³ Kerene onan, Don betutor kedi'i, Kerajaan Allah bakal di utek tanggaidi'i wan bakal dionjok'an ke urang-urang an menghaselan buah tanggainye. ⁴⁴ Wan, sape an garak ke pucok batu inen bakal di pecahan bekopeng-kopeng; wan sape pon an ditinggang batu inen bakal ropok." ⁴⁵ Ketike domong-domong kepale wan urang-urang Farisi mendongai perumpaan-perumpamaan-Nye, sidak mengeroti bahwe Yesus tongah beromong tontang sidak. ⁴⁶ Kliagak, ketike sidak berusahe engkai menangkap Yesus, sidak golak ke urang rami kerene urang rami onan mengenggap bahwe Yesus adelah nabi.