¹ Sobab, Kerajaan Suru'ge adelah macam punye kobon an gage-gage sekali betulak engkai meontot pekerije-pekerije bagi kobon anggurnye. ² Ketike nye'e udah sepaham juan padangan pekerije onan engkai sedinar seari, nye'e menyioh sidak ke kobon anggurnye. ³ Wan kire-kire pade wayah ketige an loyennye tongsh bediri menganggor di tompat umom. ⁴ Lalu ,nye'e betutor ke sidak, 'Kolai, betulak'am juge ke kobon anggur wan ape an pantas bakal doan enji'i kedi'i.' Wan, sidak pon betulek. ⁵ Sekali lagek, sekitar wayah keonam wan wayah kesembilan nye'e betulak wan melakuan hal an same. ⁶ Wan, kire-kire pade wayah kesebolas , nye'e betulak wan menemuan an loyennye tongah bediri wan nye'e betutor ke sidak, Meape kolai bediri di se'en mengenggor sepanjang ari?' ⁷ Sidak betutor ke'nye, 'Kerene olom ade an mempekerijean urang koai.' Pemilek kobon onan betutor ke sidak, 'Kolai, berangkatam juge ke kobon anggurdan.' ⁸ Ketike ari udah mule potang, pemilik kobon onan betutor ke mandornye, 'Talauan padangan pekerije wan bayaran ke sidak upahnye, dimule juan an teraker sampai an petame.' ⁹ Ketike sidak an dipekerijean pade wayah kesebolas, menjuhak, manseng-manseng urang menerime 1 dinar. ¹⁰ Ketike sidak an dipekerijean petame kali, menjuhak, sidak mengire bakal menerime lobeh banyak. Amon,sidak maseng-maseng juge menerime 1 dinar. ¹¹ Ketike menerimenye, sidak perotes ke pemilik kobon. ¹² Sidak betutor,' Urang- urang terakher hanye bekerije selame 1 jam, wan engkau meuleh sidak same juan urang koai, an udah menganggong boban wan podek torek seharian.' ¹³ Kliagak, pemilik kobon onan menyahot wan betutor ke satu tanggai sidak, ' Dulor, doan cade besalah kedi'i. Ukankah kolai udah sepakat juandan engkai satu dinar? ¹⁴ Utekdam punyedi'i wan betulaklah, tetapi doan hondak meenji'i ke urang an teraker inen same macam kedi'i ¹⁵ Apekah doan cade dibonaran engkai melakuan ape pon an danpehondak tehadap punyedan seurang? Atau, apekah matedi'i johat kerene doan?' ¹⁶ Jadi, an teraker bakal menjadi an petame, wan an petame menjadi an teraker." ¹⁷ Ketike Yesus bakal betulak ke Yerusalem, Nye'e meumbei due bolas mured-Nye secare bepisah. Dalam pejolanan, Nye'e betutor ke sidak, ¹⁸ "Liatam, kite tongah menuju ke Yerusalem wan Biak Mendesie bakal diserahan ke domong-domong kepale wan ahli-ahli Taurat. Siadak bakal meukom-Nye juan kematian ¹⁹ Lalu, sidak bakal menyerahan Nye'e ke bangse-bangse loyen engkai mengejek,mencambuki, wan menyalibkan-Nye. Wan, pade ari ketige, Nye'e bakal dibangketan." ²⁰ Dahnonan, indai tanggai biak-biak Zebedeus besesame biak-biaknye menjuhak ke Yesus wan besujod engkai meminte sesuatu ke Yesus. ²¹ Wan, Yesus betutor ke'nye, "Ape an kolai pehondak?" Indai onan menyaout, "Perintahanlah supaye kedue biakdan bise dudok dalam Kerajaan-Mu, seikok di sebolah kanan-Mu wan seikok di sebolah kibe-Mu." ²² Kliagak, Yesus menyaout, "Kolai cade mengeroti ape an kolai pinte. Apekah kolai hanggop minom tanggai cawan an haros Danminom?" Sidak betutor ke Yesus, "Ya, urang koai sanggop." ²³ Yesus betutor ke sidak, " Kolai memang bakal monom tanggai cawan-Dan, tetapi engkai dudok kanan-Ku atau kibe-Ku, ukanlah hak-Ku meenji'inye, meloyenan bagi sidak an tolah dipersiopan oleh Bapa-Ku. ²⁴ Ketike sepuloh mured an loyen mendongainye, sidak godi ke kedue dulor onan. ²⁵ Namon, Yesus menenalau sidak wan sidak betutor, "Kolai tohu abhwe padangan penguase bangse-bangse loyen memerintah pucok sidak, wan urang-urang bosar sidak menjalanan wewenang pucok sidak. ²⁶ Seharosnye cade macamnan diantare kolai, tetapi siape an hondak menjadi bosar di antare kolai, nye'e haros menjadi pelayandi'i. ²⁷ Wan, siape saje an honddak menjadi an petame di antare kolai, nye'e haros menjadi hambadi'i, ²⁸ same macam Biak Mendesie an menjuhak ukan engkai dilayani wan meenji'i nyawe-Nye sebagai tobosan bagi rami urang." ²⁹ Wan, ketike sidak meninggolan Yerikho, kerumunan bosar urang memogi'i-Nye. ³⁰ Wan, due urang bute an tongah dudok di pingger jalan, ketike mendongai bahwe Yesus lalu, sidak berseru, "Duate, Anak Daud, kasehilah urang koai!" ³¹ Urang rami menogor sidak supaye sidak bediam. Kliagak, sidak semangken bogai mendorok, "Duate, Anak Daud, kasehilah urang koai!" ³² Lopas, Yesus behonti wan menenalau sidak. Nye'e betutor, "Ape an kolai pehondak Doan lakuan engkaidi'i?" ³³ Sidak betutor ke-Nye, "Duate, urang koai hondak mate urang koai dibukean." ³⁴ Yesus tegorak oleh molas kaseh ke sidak, wan menjamah mate sidak, wan pade onan juge sidak menerime peliatannye ule, wan memogi'i Yesus.