¹ Pade wayah onan, Herodes, raje welayah mendongai berite-berite tontang Yesus. ² Wan, Nye'e betutor ke hambe-hambenye, "Inenlah Yohanes Pembaptis. Nye'e tolah bangket tanggai antare urang amti wan kerene onalah mukjizat-mukjizat inen bekerije didalamnye.'' ³ Sobab, Herodes tolah menangkap Yohanes, mengobatnye, wan menamak'annye ke penjare kerene Herodias, bini Filipus, dulornye Herodes. ⁴ Karene Yohanes kale betutor kenye, "Cade dibonaran bagidi'i engkai memiliki Herodias.' ⁵ Wan, meskipon Herodes hondak membunoh Yohanes, nye'e golak ke urang rami kerene sidak menganggap Yohanes sebagai nabi. ⁶ Kliagak, ketike ari ulang tohon Herodes tibe, biak betine Herodias menari di hedopan sidak, wan onan menyonangan Herodes, ⁷ sehingge nye'e besumpah engkai meenji'i ape saje an di minte dare onan. ⁸ Make, setolah didosak oleh indainye, dare onan betutor, "enji'ilah kedan di se'en, kepale Yohanes Pembaptis di pucok napan.' ⁹ Meskipon raje sodeh, tetapi kerene sumpahnye wan kerene urang-urang an makan besesamenye, nye'e pon memerintahan supaye hal onan dienji'i ¹⁰ Nye'e menyioh enggkai menungkong kepale Yohanes di penjare. ¹¹ Wan, kepale Yohanes diumbai di pucok napan, dienji'i ke dare onan wan nye'e meumbainye ke indainye. ¹² Dahnan, mured-mured Yohanes menjuhak meutek bukangnya' wan memasarnye. Lopas, sidak pogi wan memborektohuan Yesus. ¹³ Ketike Yesus mendongai hal inen, Nye'e menarek di'i tanggai so'on juan perohu, ke tompat an sunyek seurangan. Wan ketike urang-urang mendongai inen, sidak memogi'i-Nye juan bejalan pehe tanggai kute-kute. ¹⁴ Ketike Yesus keluar, Nye'e meliat kerumunan bosar urang, wan bebolas kasehan ke sidak, wan menyombuhan saket sidak ¹⁵ Ketike ari meadap potang, padangan mured menjuhak ke Yesus wan betutor, "Tompat oyen sunyek wan ari dah mule potang. Siyoh'am urang rami onan pogi ke desa-desa wan memboli pemakan bagi sidak surang,"' ¹⁶ Kliagak, Yesus betutor ke sidak, "Sidak cade perlu betulak. Kolai, onjoklah sidak makanan." ¹⁷ Sidak betutor ke-Nye," Di se'en kite cede punye ape-ape, kecuali 5 roti wan 2 ikan." ¹⁸ Wan, Nye'e betutor, "Umbailah onan kese'en ke-Doan ¹⁹ Dahnan, Nye'e menyioh urang rami onan dudok di guron, wan Nye'e meutek 5 roti wan 2 ikan onan lopas, sambel meliat ke langet, Nye'e mengucap syukur wan memocahan-mocahan roti onan. Setolah onan, Nye'e meonjoknye ke mured-mured-Nye, wan mured-mured-Nye ke uran rami. ²⁰ Wan, sidak semue makan wan dikonyangan. Lopas, sidak meutek ketungkong-ketungkongan an sise, ade due bolas keranjang ponoh. ²¹ Wan sidak an makan kire-kire ada 5.000 laki-lakiolom temansok betine wan biak-biak. ²² Yesus ocak mendosak mured-mured-Nye lumpat ke perohu wan betulak melohok'i-Nye ke seborang, sementare Nye'e menyioh urang rami onan pulang, ²³ Wan, setolah Yesus menyioh urang rami onan pulang, Nye'e noyek kepucok bukit seurang di'i wan bedu'e. Ketike menjolang potang, Nye'e seurangan di so'on. ²⁴ Kliagak, perohu onan udah jowoh tanggai doratan, diombang-abingan gelumbang kerene belawanan juan ribot ²⁵ Wan, pade wayah keompat malam onan, Nye'e menjuhak di pucok aek. ²⁶ Ketike padangan mured meliat-Nye bejejalan dipucok aek, sidak paleng golak wan berseru, "Onan hantu!" Lopas, sidak beciak-ciak kerene kegolaan. ²⁷ Kliagak, Yesus langsong beromong ke sidak, kate-Nye, "Kuatkanlah hatidi'i! Inen Doan, gowok golak." ²⁸ Wan, Petrus betutor kepade-Nye," Duate, jike onan Engkau, siohlah doan menjuhak ke-Mu di picok aek." ²⁹ Yesus betutor, "Menjuhak'am!" Make, Petrus keluar tanggai perohu, wan bejejalan di pucok aek, wan menjuhak ke Yesus. ³⁰ Namon, ketike meliat ribot, nye'e kegelek'an wan mule tenggolam. Nye'e beciak, "Duate, selamatkan doan!" ³¹ Yesus langsong meuluran kukot-Nye, menyonggam Petrus, wan beromong, "Kolai an kurang iman, meape kolai ragu-ragu?" ³² Ketike sidak tamak kedalam perohu, ribot pon behonti. ³³ Dahnan, sidak an ade di perohu menyombah Yesus wan betutor, "Sesunggohnye, Engkau adelah Biak Allah!" ³⁴ Selopas menyeborang, sidak tibe di tanah Genesaret. ³⁵ Ketike urang-urang di tompat onan mengenali-Nye, sidak memberitohuannye ke seluroh daerah onan wan meumbai semue urang an saket ke Yesus. ³⁶ Sidak memuhon ke Yesus supaye bise menyontoh ujung jubah-Nye, wan semue urang an menyontohnye menjadi somboh.