¹ Ukan am doan urang bibas? Ukanam doan rasul? Ukan am doan dah meliat Yesus Duate kite? Ukan am kayen hasel pekerejean doan dalam Duate? ² Jike bagi urang laen doan ukan rasul paleng cade doan rasul bagi kayen. Sobab, kayen meterai kersaulan doan dalam Duate. ³ Inenam pembileaan doan ke sidak an bakal memerikse doan. ⁴ Apekah urang kayen cade ade hak kai makan wan minom? ⁵ Apekah urang kayen cade ade hak seurang bini an seiman, same macam rasul an laen, peduloran Duate wan Kefas? ⁶ Apekah kah Barnabas wak doan an cade ade hak kai cade bekereje? ⁷ Sapebah an kale mengabdi sebagai tentara juan biayanye seurang? Sapebah an menanami kobon anggur wan cade memakan buahnye? Sapebah an meulangan bakal heyoman wan cade meminom susunye? ⁸ Apekah doan mengateaan hal inen menurot mendesie? Ukanam Hukom Taurat jak mengateaan hal-hal an same? ⁹ Ade tetules dalam hukom Taurat Musa, ''Gowokam kayen memakse lembu an gek meirek gandum!" Apekah lembu an gek Allah perhatian? ¹⁰ Apekah Nye'e mengateaan macam onan demi kite? Oi, demi kiteam hal ditules kerene an membajak haros membajak dalam pengheropan an meirik haros meirek dalam pengheropan kai mendepotan bagianye. ¹¹ Jike urang kayen menabur boneh rohani di antare kayen apebah belebihan kalau urang koai jak menuai hal materi nggai kayen? ¹² Jike urang laen ade hak atas kayen, ukanam urang kayen lobeh berhak? Meskipon lopas onan, urang kayem cade mengunean hak nontai. Sebaleknye, urang kayen menanggong semue kai urang kayen cade meonjok setek helongan bagi Injil Kristus. ¹³ Apekah kayen cade tohu sidak meejoran ha an kudos, makan nggai Bait Allah jak? Siak an meleyoni di altar mendepotan bagian nggai pesoran pesembahan? ¹⁴ Benonan, Duate menyioh sidak an memberiteaan Injil kainhidop nggai Injil jam. ¹⁵ Doan cekale memakai sutek pon ngai hak sidak. Doan cade menulisan kai dilakuan ke doan. Sobab, lobeh boyek doan mati nggai urang memulanan kebanggeaan doan. ¹⁶ Kerene, jike doan memberiteaan Injil, doan cade ade alasan nkai bemogah kerene kewajiban ade atas doan. Celakeam doan, jike doan cade memberiteaan Injil. ¹⁷ Kalau doan memberiteaan Injil kerne kehondak doan seurang, doan adr upah. Namon, kalau ukan kehondak doan adelah tugas an dipecayean kedoan. ¹⁸ Kalau, apebah upahdoan? Upahdoan adelah ketike doan memberitean Injil doan uleh memberitean Injil tanpe upah wan cade menyalahgunean hak doan dalam Injil. ¹⁹ Walaupon doan bibas ke semue urang, doan mejadian diri doan seurang hambe bagi semue urang kai doan uleh memenangan lobeh banyak lagek. ²⁰ Bagi urang Yahudi, doan mejadian urang Yahudi kai doan dapat memenangan urang Yahudi. Bagi urang hidop dibabah Hukom Taurat, doan mejadi macam urang an hidop di babah Hukom Taurat (Meskipon doan dibahah Hukom) kai doan dapat memenangan sidak ade dibabah Hukom Taurat. ²¹ Bagi sidak tanpe Hukom Taurat doan mejadi tanpe hukom Taurat (ukanam tanpe hukom Allah, keliagak dibabah hukom Kristus) kai doan dapat memenangan sidak tape Hukom Taurat. ²² Bagi urang an lomah, doan mejadi pomah kai doan dapat memenangan sidak an lomah. Doan dah mejadi semuenye bagi semue urang kai segale care doan dapat menyelemotan banyak urang. ²³ Doan melakuan semue demi Injil kai doan uleh mendepotan bagian didalamnye. ²⁴ Cade tohuai kayen sidak an bekojot dalam petandingan semunye bekojot, keliagak kah sutek an menerime hadiah? Jadi, bekojotam kai kayen mendapatanye! ²⁵ Setiap urang betandeng belateh menguasei diri dalam segale hal. Sidak melakunye kai menerime mahkota an fana, keliagak kai mendepotan an abadi. ²⁶ Sobab, doan cade bekojot tanpe tujuan. Doan cade meninju macam meninju angen. ²⁷ Namon, doan melateh bukang doan juan koras wan menguaseinye kai dah doan memberiteaan Injil ke urang laen, doan seurangcade ditulak.