¹ Ɗǝghǝrsǝ mǝn Galati! Nughǝn a mbiki gaam ken mǝn no? A yir wan Yesu ɗaŋ nǝ ɓorghǝnni tǝǝ ta nyolarti ɗi kǝrǝŋ kǝrǝŋ nǝ ghǝmmbalghǝni. ² Ginngǝn cinǝ ngǝtn yo ɗaŋ mya suu mǝ kuuɓ ɓaski. Kǝǝ ta tuu zhipti a te laaghǝ mboki, ko a te caaghǝnni raa a ngǝtn yo ɗaŋ kǝ wumi ya? ³ Kǝ ɗǝghǝr cigha? kǝ gǝǝ daaɗi a te zhipti kaa ɓantǝ a te dliya? ⁴ Kaa buŋ a ngǝtn monnda a ɓyemi ǝŋ jomi a taa yinǝ kǝ ɓyemi ya? ⁵ Tu yan ɗaŋ a taa vǝrki zhipti kǝnnda a fi ngǝtn kosarghǝni a dlei wan a taa fi cik a te laaghǝ mborki, ko nǝ wumngǝn a te caaghǝn raa? ⁶ Daɓaɗ ɗaŋ gi ɗaŋ Ibrahim, ''Caa raai a Cognvon tǝ mbiti mǝn tu nǝ taŋ taŋnyi,'' ⁷ nǝ ngǝtn namboŋi, yisǝŋngǝni tu ɓak gya gyo ɗaŋ cinǝ kǝ caaghǝn raa cinǝ mǝri Ibrahim. ⁸ Vik Cokes, tǝ yelghǝn tun ɓanndǝŋ tu Cognvon wo nyolarmǝn yo ɗaŋ nǝ Yahudawa hŋ a te caaghǝn raa a ta fuu vik wusni tun kyaɗ tǝ Ibrahim, cigha wulghǝnni tu, ''Te ɓaskǝ zarsǝ kǝ yatl ɓuruk taa tu mbuuni.'' ⁹ Tǝ cik, mǝn caaghǝn raa ci tǝ mbuuni tǝ gya Ibrahim, zaarghǝ caaghǝn raa. ¹⁰ Ɓuruk gya gyo ɗaŋ tǝ gaa gaam a laaghǝ mbrki cigha giɓkǝ laŋngǝni ɗaŋ gi ɗaŋ nǝ dlyaaɗkǝni tu, ''Ɓuruk konu ɗaŋ ya rii ɓuruk a koni ɗaŋ nǝ dlyaaɗkǝn a tagarta fishi washi hŋ, cinǝ laŋngǝnni.'' ¹¹ Daŋngǝnni yi buɗ buɗ tu gon wo tu nyolggǝn a ken Cognvon a te mborki hŋ, nǝ duryo tu mǝn taŋ taŋnyi taa naa ɗa gwaam a te caaghǝ raa. ¹² Beɗ tǝ gi mborkes nǝ kǝ caaghǝn raa hŋ, ɓaɗ ɗaŋ tu, ''Daashi gyo ɗaŋ yafi laa kǝ te mborki ciɓ wo naa ɗa gwaam a te wasǝŋ.'' ¹³ Yan ɗaŋ nǝ ɓorghǝnni a kaɓmi wopi mǝ laŋ hŋ a tebmborki tǝ naghǝn nǝ laŋngǝni a bamvi wopm, nǝ dlyaaɗkǝni tu, ''Cinǝ laŋngǝni ko gyo ɗaŋ a dluu yer woshi zaraŋ a gwas.'' ¹⁴ Nǝ durghǝ tu mbuuni kǝ Ibrahim wo ɗya mbwaaɗi a gya gyo ɗaŋ cinǝ Yahudawa hŋ a te Yesu ɗaŋ nǝ ɓorghǝnni. Nǝ durghǝ tu a te caaghǝn raa ma ɗya mǝ tuu mbighǝnni ɗa raai kǝ zhipti. ¹⁵ Gya yesatn, dlǝǝrǝni mǝ wul vi ɗaŋ zaar. A naa zaarikǝn ya dlǝǝlar ngǝti, gon won ɗa ɗaŋ wo kǝǝm jalarti a laŋshi hŋ ko tǝ daɗak kai, yan nǝ dlǝǝlarghǝnni a te mborki. ¹⁶ Ɗaŋngǝnni mbighǝnnes ɗa raai ta koni Ibrahim mǝn tǝ usuli wos. A taa wul tu, ''Tǝ gya usulu wos'' taa ca konni zarsǝ monnda, beɗ tǝ gi nǝ zaar namboŋ ngǝtnbwos, Tǝ usuli waa,'' yan cinǝ yan nǝ ɓorghǝnni. ¹⁷ Ɗaŋngǝnni ngǝtn yo ɗaŋ mya kon a gin: Mborkes man ɗa kaari ɗaŋ voni 430 a latsǝi, a sular a laŋshi mbighǝni ɗa raai ɗaŋ Cognvon a ta dlǝǝlari hŋ. ¹⁸ Yan tu, ǝŋ yan cighǝni duul a mbwaaɗi a te mborkes.. yan cik a man mbwaaɗi a te mbighǝni ɗa raai hŋ. Beɗ tǝ gi Cognvon taa vǝr Ibrahim a te mbighǝni ɗa raai. ¹⁹ Yan cik ni ghuŋ a taa yi dei ghǝ laaghǝ mborkesse? Tǝǝ ta daɗak tǝ ghai nǝ durghǝ gya kusǝŋsǝ ngǝtn, hal she usuli Ibrahim ya man a yani ɗaŋ tǝǝ ta fi mbighǝn ɗa raaishi ɗa. Mborkes taa nguɓ laa a te zhipti shinngǝnni Cogn a te gon ɗaŋ wo nda dlei. ²⁰ Ɗaŋngǝni murghǝ ndaghǝn ɗ dlei, a mantu a ngaa zaar namboŋ ɗa, beɗ tǝ gi Cognvon ci namboŋ. ²¹ Nǝ durghǝ gi mborkes a nyaŋngas ni mbighǝni ɗa raai kǝ Cognvona? yei, hal nǝkǝ mbyeɗi! yan ǝŋ mborki taa gǝǝmi gi wo ɗya vǝr raai, kǝnnda taŋ taŋnyi ciɓ ci nbwaaɗi a te mborkes. ²² Beɗ tǝ gi vik Cognvon gaa koni ɓuruk a taas kǝ fighǝnngǝ kuskǝ ngǝtn Cognvon a taa fi gin nǝ duryo tu mbighǝn ɗa raai nǝ vuumi wopi a te caaghǝni raa a Yesu yan ɗaŋ nǝ ɓorghǝnni taa ɗya tǝ vǝr gya gi ɗaŋ caa raai. ²³ Ɗaŋngǝnni kǝnnda caaghǝni raa tǝ mbwaaɗi mǝǝ taa yinǝ nyomngǝni ɗaŋ gyo ɗaŋ tǝ cishi a mannndǝ a te mborki.. nǝ naɗkǝni jarum she ya nyolar caaghǝn raaiɗi. ²⁴ Nǝ durghǝ gi mborki tǝ naa yal ɗami ɗa she gi ɗaŋ nǝ ɓorghǝnni yaa man, nǝ duryo tu ma ɗya tǝ vuumi wopi a te caaghǝn raa. ²⁵ Beɗ tǝ gi, ɗaŋngǝnni caaghǝn raa a man, mǝ man yi a taas kǝ murghǝ yalghǝn wopm ɗa hŋ. ²⁶ Yan tu ɓuruk wan kinǝ mǝri Cognvon a te caaghǝn raa a yani Yesu ɗaŋ cinǝ ɓorghǝnni. ²⁷ ̀Yan kyaani monnda ɗaŋ gya gyi ɗaŋ tǝǝ fishi baɓtisma mǝn a giɓkǝ yan ɗaŋ nǝ ɓorghǝnni, kyaani kaa kaɓ yan ɗaŋ nǝ ɓorghǝnni. ²⁸ Gon ma man yinǝ mǝn Yahudawa, gon nǝ mon ko nǝ gyo ɗaŋ ci gos sǝrghǝdei gon man yinǝ gǝɗ ko momwan, yan tu ɓuruk mii namboŋ a Yesu ɗaŋ nǝ ɓorghǝnni. ²⁹ Yan cik ǝŋ yan ki nǝ kǝ yan ɗaŋ nǝ ɓorghǝnni, kinǝ usuli Ibrahim, murghǝ cighǝn duul a te mbighǝn ɗa raai.