¹ Mya wul tugami ɗaŋ ɗyaghas tǝ nǝ ŋaa, ci mari tǝ mon hŋ, ko ɗaŋ tu ɗeɓaɗ tughǝnes nǝ gos. ² Beɗ tǝ gi cicha muŋ mǝn yaalghǝn ɗaatǝ tǝ mǝn yo ɗaŋ tǝ caa vwa wasǝŋ hal dzaŋ yo ɗaŋ daagos gaa. ³ Cikkǝn myaani, a kili yo ɗaŋ mǝ ta yi nǝ mǝri, tǝǝ ta nummi ɗaŋ monsǝ a tlǝtǝri kǝ ngǝtn ɗaŋ ci waari kǝ ɗǝgn. ⁴ Beɗ tǝ gi ɗaŋ kiles ta man daɓak, Cogn ta shinndar ŋaawos ɗi, ɓwaaghǝn gǝɗ, ɓwaaghǝn kǝ te mborki. ⁵ A fi gin tǝ vum gya gon ɗaŋ cigha taas mborki, duryo tu mǝ naai ɗaŋ mǝǝri. ⁶ Nǝ duryo tu kini mǝri, Cogn a shinndar zhipti ghǝ ŋaawosɗi a raa wopm, myaani ɗaŋ myaa cim tu, Abba, Daa.'' ⁷ Tǝ cik kinǝ monnda hŋ, kinǝ murghǝ cighǝn duul saɗ a te Cogn. ⁸ Beɗ tǝ gi a kili gi ɗaŋ ka ta yisǝŋ Cogn hŋ, kǝ ta yi nǝ monsǝ ghǝ gya gon ɗaŋ ɓwaaghǝn vartǝ wasǝŋ, tǝǝ ta yinǝ gya Cogn hŋ ko njwatn. ⁹ Beɗ tǝ gi ɗaŋngǝnni ɗaŋ ka yisǝŋ Coghǝi, ko ɗaŋngǝnni ɗaŋ Cogn a yisǝŋ ki waani, wur ghǝnnda kya suu a man suki nǝ monsǝ saɗɗaɗan? ¹⁰ Kya gaa yir dzaŋ, tǝ lǝpm muri, tǝ dǝǝl, tǝ voni. ¹¹ Mya ci vǝrtǝ nǝ durwan tu ɗa cik laatn ɗaŋ mǝ fi tǝ kyaani wo naa nǝ ngǝtn won hŋ. ¹² Mya karaki gya yesatn, naan ɗaŋ myan, duryo tu ma yi naa ɗaŋ kyaani ɗaŋ. Ka fim kuskǝ ngǝtn mǝn hŋ. ¹³ Beɗ tǝ gi ka yisǝŋǝi tu nǝ durghǝ gonngǝn dlii ghuŋ mǝ fuuki vi wusni keni. ¹⁴ Ko ɗaŋ tu ngǝtn yi ɗaŋ mǝ tu gaman ngai a dletn a diiɓki, kǝ sum kǝ gǝm ko kǝ nyaŋngasǝm hŋ. Ɗa bamves kǝ ta kaɓǝm ɗaŋ tu minǝ zhipti shinngǝn Cogn, ɗaŋ tu mini Ɓorghǝn kǝ Cogn Yesu ngǝtnwos. ¹⁵ Nǝ gi, ɗaŋngǝnni shiɗshiɗi wanes yiɗo? Nǝ durghǝ gi mya fuuki tu, kǝn yan wo fi, ki warghaɗ yir wan kǝ taamshi ɗi. ¹⁶ Yin tu, mǝ naai nǝ murghǝ nyaŋngaskǝn wan nǝ durghǝ tu mya fuuki jom jominiya? ¹⁷ Caa mbǝrshi tǝǝ kaɓkinǝɗi, beɗ tǝ gi nǝ dur mbuuni hŋ. Caa suu tǝǝ ɓǝǝl kini tǝ myan.. nǝ duryo tu a mbǝrki ɓasshi. ¹⁸ A ndara ko dzaŋnyi gyo a mbǝrki nǝ dur mbuuni, ɓak tǝ naa tu she kili yi ɗaŋ mi cimki hŋ. ¹⁹ Kyaani mǝretn njwatn njwatn.. migha durghǝ wumngǝn vwa ɓwaaghǝn nǝ durwan hal she Ɓorghǝn kǝ Cogn yaa tu tsǝtnngǝni ɓaski. ²⁰ Mǝ moɓ suughǝn mǝ yi tǝ kyaani ɗaŋngǝnni mǝ su yereti, dur yo tu ma vuui naŋ kyaani. ²¹ Fuu mǝn, kyaani ɗaŋ kya moɓ suughǝn a naa taas mborki, kya sǝǝ kǝǝm a mborkes hŋaa? ²² Duryo tu yin dlyaaɗkǝn tu Ibrahim taa yi tǝ mǝri monci mbǝtlǝm, kǝ namboŋǝi kǝ gǝɗ ɗaŋ nǝ mon, namboŋǝi gon nǝ kǝ gǝɗ ɗaŋ ci sǝriɗ. ²³ Beɗ tǝ gi namboŋes ɓwaaghǝn gǝɗ ɗaŋ ci sǝriɗi yigha mbighǝn a raa. ²⁴ Caa ɗya tǝǝ sughǝɗ ngǝshi gya gin a te giɗkǝn ɗaŋ gin, duryo tu guɗi gya gin cin a bamvi mbighǝn a raa mbǝtlǝm. Namboŋi wasǝŋ ta yiɗa a puus Sinai, ɓwaa mǝri gya gyo ɗaŋ tǝǝ naai nǝ monsǝ. Gin ghuŋ nǝ Hajaratu. ²⁵ Ɗaŋngǝni Hajaratu ghuŋ cigha bamvi puus Sinai ɗaŋ yi Arabiya, caa ndǝr naan a bamvi Urshelima kǝ ɗaŋngǝnni, duryo tu cigha giɓ laa mon tǝ mǝri wos. ²⁶ Beɗ tǝ gi Urshelima kǝ gaami ci sǝriɗ.. yaan ghuŋ ci na wopm. ²⁷ Duryo tu yin dlyaaɗkǝn, ''Tǝ polghǝ, kyaani ɗaŋ ka yi ɓwaa hŋǝi. Kaa, a ndǝr a dlaar vi nǝ polghǝn, kyaan ɗaŋ ka yi wum vwa ɓwaaghǝn hŋǝi. Duryo tu mǝri gǝɗ gii ɗaŋ tǝ gǝmti cinǝ kǝ kwaanngǝn hŋ ngaa kǝ gǝɗ gii ɗaŋ citǝ tuuri ɗa.'' ²⁸ Beɗ tǝ gi kyaani, gya yasatn, ɗaŋ Ishaku, kini mǝri ngǝtn mbighǝn a raa. ²⁹ A kili gi muryo ɗaŋ tǝ ɓwaatǝ a dlii a ta ya fir forǝm muryo ɗaŋ tǝ ɓeaatǝ a zhiptǝ. Yi cik daɓak ɗaŋngǝni. ³⁰ Beɗ tǝ gi vi Cogn wultu ni? ''Nyolarǝn gǝɗi nǝ moni tǝ ŋaawos. Duryo tu ŋaa gǝɗi gi ɗaŋ ci sǝriɗi hŋ.'' ³¹ Durghǝ gi gya yesatn, mibǝ mǝri gǝɗi gi ɗaŋ nǝ moni hŋ, beɗ tǝ gi nǝ kǝ gǝɗi gi ɗaŋ ci sǝriɗi.