¹ Kǝn ɗaŋ voni dzuɓ tliiti wuɓsǝ ta latsǝi, mǝ ta tli Urshelima mi tǝ Barnabas, mǝ ta kǝnndar mi Titus. Mǝ taa tlii nǝ durghǝ zhiɗkǝni ² won, tǝ mǝ gaa a ken wasǝŋ vik wusnes ɗaŋ mya ŋalar a dlǝk mǝnyo ɗaŋ cinǝ Yahudawa hŋ. Mǝ wul a lǝǝɓ waaɗi a gya gyo ɗaŋ tǝ fii ɗaŋ dǝllǝŋsǝ zarsǝ, yan tu mǝ yisǝŋǝi tu ma kiir ko ma kiir kǝ mbǝnnɗǝ mi hŋ. ³ Beɗ tǝ gi ko yan Titus ɗaŋ mi cimtii yan ɗaŋ nǝ mǝn Hǝli na gyo ɗaŋ mǝ caa tu sǝǝrǝti hŋ. ⁴ Gya yes wopm kǝ naa mbyerni tǝ dli dlii wasǝŋɗi tǝ man nyom vwaa wopm a sǝrghǝde yo ɗaŋ mǝ ta tuu a Yesu ca suu tǝ sular mi wopi nǝ monsǝ. ⁵ Beɗ tǝ gi mǝ ta gǝǝmshi dǝǝlmǝn hŋ ko ŋaanjwatn, nǝ duryo tu jom jomni kǝ vik wusnes tǝ naa tǝ kyaani. ⁶ Beɗ tǝ gi gya gi ɗaŋ tǝ wul tǝ naa ɗaŋ tu cinǝ varaŋshii, (ko tǝǝ ta yinǝ gya nu, nǝ ngǝtn vuughǝnni ɓasǝm hŋ, Cognvon caa wor hŋ) yanshi ɗaŋ tǝ wul tu, tǝǝ wul tǝ naa nǝ varaŋshi, tǝǝ daɗakǝn ngǝtn won mǝnngai hŋ. ⁷ Ko ɗaŋ tu yinǝ napti, taa caa vwaati tǝ vik wusni kǝ gya gyo ɗaŋ ta sǝǝrǝshi hŋǝi. Ɗaŋ gi ɗaŋ tǝ caa vwaak Biturushi, tǝ vik wusnes kǝ gya gyo ɗaŋ cinǝ sǝǝrǝghǝnni. ⁸ Yan Cognvon ɗaŋ a fi laa tǝ Biturus dǝllǝk murghǝ shinngǝnni nǝ kǝ gya gi ɗaŋ cinǝ sǝǝrǝghǝni cik, a laa tǝ myan nǝ kǝ gya gi ɗaŋ cinǝ Yahudawa hŋǝi. ⁹ Ɗaŋ gya Yakubu.. tǝ Kefas.. tǝ Yohana gya gyo ɗaŋ tǝǝ yisǝŋshi ɗaŋ gya gyo ɗaŋ tǝ nal Ikilisiya ɗaŋ tǝ mbi dei kǝ gyal yo ɗaŋ taa vǝrmi tǝǝ taas kǝ zaari kǝ tsǝtnngǝn wusni nǝ myan tǝ Barnabas. ¹⁰ Tǝǝ ta fi gin yan tu mǝǝ tlǝ gopi a mǝn yo ɗaŋ cinǝ Yahudawa hŋ, Nǝ duryo tu tǝǝ tlǝ gwasǝŋǝi a gya gi ɗaŋ cinǝ sǝǝrǝghǝnni. Tǝǝ ta kara kurum tu mǝ ɓital tǝ mǝn dwanndǝ, yan gyo ɗaŋ ɓyeɗ mǝ ta yigha nyoti nyoti mǝ fi. ¹¹ Beɗ tǝ gi ɗaŋ Kefas man Antakiya mǝ ta dlǝǝtǝ mǝn tan tan a yir wos nǝ duryo tu taa koni tu a maali. ¹² Kǝnnda gya gon won tǝ mbwaaɗi a Yakubu, Kefas tǝ taa ya ci ngǝtn tǝ mǝn yo ɗaŋ nǝ Yahudawa hŋ. Beɗ tǝ gi ɗaŋ mǝnin tǝ man, a ta gaai ɓǝɗtǝ ɗonngai tǝ gya gi ɗaŋ nǝ Yahudawa hŋ. A ta ya ci vǝrtǝ gya gi ɗaŋ tǝǝ tǝ dlǝǝri a tǝ durghǝ sǝǝrǝghǝnni. ¹³ Nǝ durghǝ gi Yahudawa kaaɓ ɗaŋ tǝ naa tǝ laaɓshi a ryaaghǝnnes. Barnabas beɗ ɗaŋ tǝǝ mbiti raai tǝ ryaaghǝnni lǝǝɓ wasǝŋ. ¹⁴ Beɗ tǝ gi ɗaŋ mǝ yel finndǝ wasǝŋ caa laaɓni jom jomnes kǝ vik wusnes hŋ, mǝ wul Kefas a ken wasǝŋ ɓuruk tu, ''ǝŋ yan kinǝ mǝn Yahudawa beɗ tǝ gi kyaa tsǝtn ɗaŋ gyo ɗaŋ cinǝ Yahudawa hŋ kya tsǝtn ɗaŋ gyo ɗaŋ a ta mǝn Yahudawa hŋ, wo fi wur kǝnnda ka caa mǝnyo ɗaŋ cinǝ Yahudawa hŋ tǝ naai nǝ Yahudawai ye?'' ¹⁵ Myaani ngǝtn wopm mǝn Yahudawa a te ɓwaaghǝn, nǝ mǝn kusǝŋsǝ ngǝtn gya gi ɗaŋ nǝ Yahudawa hŋǝi, ¹⁶ beɗ ɗaŋ tu maa yisǝŋǝi tu gon wo tu tǝ nyolarti nǝ laa wos kǝ te laaɓkǝ mborki beɗ tǝ gi she a te caaghǝn raa a Yesu ɗaŋ nǝ ɓorghǝnni. Cik ɗaŋ mǝ man nǝ caaghǝn raa a Yesu ɗaŋ nǝ ɓorghǝnni nǝ duryo tu maa ɗyaa mǝ naai nǝ nyolarghǝnni nǝ caaghǝn raa a yan ɗaŋ nǝ ɓorghǝnni, nǝ kǝ mborki gon tǝ dlii wo nyoli hŋ. ¹⁷ Beɗ tǝ gi ǝŋ, yan migha ŋalghǝn tu tǝǝ vuumiwopi a yan ɗaŋ nǝ ɓorghǝni, myaani ɗaŋ tǝǝ tumi tu minǝ mǝn kuskǝ ngǝtn, gin tu yan ɗaŋ nǝ ɓorghǝni caa bǝǝl nǝ kuskǝ ngǝta? yei hal ɗaɗ da ɗaɗ. ¹⁸ Yan ǝŋ mya mannda mǝ nal ngǝrshi gya gi ɗaŋ ma taa datsǝshi wasǝŋǝi, mǝ sur gaamatn mǝ naai nǝ murghǝ tsalghǝnni mboki ghǝnndi. ¹⁹ A te mborki ma mǝshi a mborki, nǝ duryo tu mǝ ɗya mǝ naa gwaam nǝ Cognvon. ²⁰ Taa ghǝmmbal mi tǝ yan ɗaŋ nǝ ɓorghǝnni.Nǝ myanngǝn mi ɗa gwaam hŋ, beɗ tǝ gi yan ɗaŋ nǝ ɓorghǝnni kǝn ci gwaam ɓasǝm. Raai gyo ɗaŋ mya tsǝtnngai a dlii miɗa gwaam a te caaghǝni raa a kunes kǝ Cognvon, gyo ɗaŋ a suum ɗaŋ a vǝr gamas nǝ myan. ²¹ Ɓak gaa a laŋshi hŋ gyalghǝ Cognvon, yan ǝŋ ci taŋ taŋes yan ci ya ɗya tǝ tuui a te mborki yan ɗaŋ nǝ ɓorghǝni mǝs a ɓenndǝmi kǝnndi!