¹ I gataɗak bai? I mawanak bai? Naika Yeso Məgənyi bai? Na ɗawu kun i wana Səku nən i bi? ² I mawanak i ndo jigaɓ bi nən, amman i kun nən ai kasən. Gaɗa kun takanas saida muwanak ga i kunu Məgənyi. ³ Sutku irdiga i ndiawa wara a ngupta ga. ⁴ Wana yarjik taa na saa bai? ⁵ Wana yarjik maa ama wara barna jirewa bai, kakə gagzhin mawanaucin gu, na yaganauci Məgənyi, na Kepas? ⁶ Ja dlamak wana iyu na Barnabas ja ruja bi? ⁷ A dlama wana askarabu nən tai da kunu lipə gəri? A zəgəma inabi nən tai amman aci ata ɗigu bai? A dawa tlaɗin nən tai amman aci a saa anyu bai? ⁸ Na rama jandu təku gada kərmai nəngaiwa bi? Linok wam cam ramə kasən bai? ⁹ Atəro da tarna a kunuk ataura Musa maya, "Kwa ɗawa chambi i miya tlaɗin wara a tərkakəɗa aau bai." Amman Səku a rama i ɗak tlaɗin bi? ¹⁰ Aci a rama i aɗawa bai? Nda tarni wa, gaɗa nən wara dlam ruwai a dlame kun tuman, baci ɗəka aau ke da dlama i kunuk tuman biwu. ¹¹ Ja zəgəmu be wara kə Nunuwa Səku i kunaku nən, a dlama bai jabi bik duniya dari kun? ¹² Ndo jigaɓ bana aɗakshi dari kun nən, wa ɗəkakshi i dlaɓa kalkal bai? Amman wa kasaktu bai, gaɗa kasən, wa dlamna kanadi da miya wa dapci na bari labar herr Yeso. ¹³ Kwa zəga bai nda wana i kunək Susu Magita abi biktakshi dakunuk Susu Magita? Kwa zəga bai ndawa wara a wana i aɗak bagadi a ɓərak be wara nda barə i ɗak bagadi? ¹⁴ Kalkal na kasən, Məgənyi barə linok iɗak nda nyana rama Səku abi biktakshi dariwu. ¹⁵ Amman na dlam paida na yanci tən bai. Na tarni kun sau gaɗa kwa dlama ni be ɗagai bai. Ngalko namcin ga da miya ɗagfai da dapca ni wana təku. ¹⁶ Atəro na dlam wazək ramak Səku nən, na kəma adla ga bai, gaɗa dolle ga na dlami. Waddare ga na dlam wazək rama Səku bi nən! ¹⁷ Na dlam sau na ntugəshi gani nən, iina tumanja gawa. amman na dlm na ntugəshi binən, iina wana gukshi aɗaga. ¹⁸ Wate tumanja ganinən tam? Atə̵̵ne na dlam wazək ramak Səku nən, na maka nda biyacayu bai, kasən ke na dlama paida na gənyi aɗa i kunuk rama Səku bai. ¹⁹ Ko dayake i ga gumbak darik tite, amman na dlamənga guzuɓ tike gaɗa na makai ndawa gawa. ²⁰ I rik Yahudaucin, na dlaminga Bayahude, gaɗa na 'yuwe Yahudaucin. I rik ndawa wara a dəɗa linok, na dlamənga kakə akshi, gaɗa na 'yuwe ndawa wara a diɗa linok. Na dlam kasən gaɗa i daɗaga na dəɗa linok bai. ²¹ I rik ndawa wara a dəɗa linok bai, na dlamənga kakə akshi, ko gaɗa i daɗaga na vurə da kunu linok Seku bai, amman na dəɗa linok Masipu. Na dlam kasən gaɗa na 'yuwe ndawa wara a dəɗa linok bai. I rik ndawa wara na awayu bai, na mana aɗaga kakə nən wara na awayu bai, gaɗa na 'yuwe ndawa wara na awayu bai. Na mana aɗaga iɗak be chakchak i rik ndawa mak, gaɗa nabə lakwtu wara na 'yuwayi ndo jigaɓ dabə aaro. ²³ Na dlam tanke gaɗak rama Səku, gaɗa zam nabə barka da kunu gara ke. ²⁴ Kwa zəga bai ndawa gawa a marmare, amman abik tumanjan nən getak? Gaɗa kasən a dlamina marmare gaɗa kwabi tumanja. ²⁵ Baci kawa rawa ariɓ təkagəri na jibagaɗa. A dlamo kasən gaɗa da gənyi tumanja wara a dləmatən gara, amman wa dlamak marmare gaɗa wa gənyi tumanja wara a dləmatu bai. ²⁶ gaɗa kasən na dlamak marmare ko dləgiɗ bai kakə baci wana vatku. ²⁷ Amman na jəba təkaga na dlamənga kakə guzuɓ, gaɗa daku na dlam na wazək i ndawa nən, ii na aɗaga nda katanayu daku bai.