¹ A gugzəna da riga, kakə iyu na gugzu darik Yeso. ² Gususku na gədləb kun gaɗa kwa tana ga i kunuk be tawanke. Na gədləb kun gaɗa kwa jiba sanam bəlan kakə wara na jubati kun akshi. ³ Gususku nancu kwa zəgə du ma Masipu aci ne aɗak nən tawanke, nən ke aɗa ama gəri, Səku ke aɗa Masipu. ⁴ Nən tawanke a dlamak magita ko aci a anabci aɗa gərə da cima nən, dlam na aipu i aɗa gəri. ⁵ Amman ama tawan ke dlam magita ko anabci na aɗa gara da cima bai dlam na aipu i aɗa gara. Atə ro dlamin gara kabe aɗa gara daska. ⁶ Atəro ama a cima aɗa gara binən, atu da dartla na yaɗ aɗa gara. Atu a kəmu zhiru puluta yaɗ aɗa gara nən ko ndaskə nən, atu da cima na aɗa gara. ⁷ Atəro gəmsək a cima aɗa gəri bai, tənda aci gənawa Səku na kərmai gəri ke. Kərmai aman gəmsək. ⁸ Atəro gəmsək nda dlama ci darik ama bai. Amman ama nda dlama tu darik gəmsək. ⁹ Balle nda dlam gəmsək gadɗa ama bai. Amman, nda dlam ama gaɗa gəmsək. ¹⁰ Gaɗa kasən ne jibin gara ama da dlaɓə na gənawa linok i aɗa gara, gaɗa malekaucin. ¹¹ Dək na kasən, i kunuk Məgənyi, amau a mbasə aɗa gara bai darik gəmsu, ko gəmsu a mbasə aɗa gəri bai i rik amau. ¹² Kakə amau deu darik gəmsu, kasən ke gəsu deu da rik amau. Tanke deu da rik Səku ke. ¹³ A kagalatina na aɗa kun, kalkal bi ama da dlam magita i Səku na aɗa da cima bai? ¹⁴ Biwu ndak waci gugzi wa ma bəza yaɗ aɗa gazbər i gəmsək bik zhiru bai? ¹⁵ Zam kwa zəga bai wilək ama na yaɗ gazbarin nən atə na kərmai gara? Atəro nda bari tu yaɗ gazbarin gaɗa cima aɗa gara. 16 Amman nən tawanke ancu da dlam gamɗaya i aɗak su nən, wana bik dlama i aɗo bai ko Cocacin Səku. ¹⁷ I kunuk be wara na rame kun təku, na gədləɓ kun bai. Lakwtu wara kwa de iɗa gayi nən, sən kə bəlan bai, amman kə gaɓshu. ¹⁸ Atəro tən da sukur gara, na kəmu ma kwa de iɗa gayi i kunuk coc nən, nda bi ɓəra aɗa i gadava kun, harr na ɓandə na ardata na ramau. ¹⁹ Zam dolle na ɓəra aɗa i gadava kun, gaɗa ndawa wara nda gənakshi, dazgəna sau i gadava kun. ²⁰ Lakwtu wara kwa de iɗa gayin, kwa de i ta masana Məgənyi bai. ²¹ Lakwtu wara kwa to nən, tike ata abən gəri damba jigaɓ dabə biktakshi. Ɗagai na maya, jigaɓ a kuyo. ²² Kun na wunduwawin bai kə takta na sa i kunu? Kwa kur na coc Səku harr kwa zhirwak ndawa wara ga tluwak? Wate na rame kun tam? Na gətlɓi kun bi? Na gədləɓ kun bai gaɗa sau. ²³ Atəro be wara na gəneu da rik Məgənyi na bari kun atu, gaɗa Masipu Yeso i dəviɗ wara nda bara ci da ci burodi. ²⁴ Aku wara aci barkawatu, aci da pəshashiri, da ram ma, "Sutku təka ganai wara nda barə gaɗa kun, a dlamina kasən gaɗa tana ganai." ²⁵ Daku gu dami gəgiya aku ta masanau, da ram maya, "Gərgiya təku karara alkawar i kunu dədəm ga. A dlamina fatawanke kasau gaɗa tana ganai." ²⁶ Lakwtu tawanke kwa kiɗa burodə təku nən, kwa sau da kunuk gərgəya təku nən, kwa labarta bakotak Meəgənyi harr se aci deu." ²⁷ Nn tawanke kiɗu burodi təku da shi da kunuk gərgiya təku kə Məgənyi i kunuk canduwa bi nən, dlam na aipu kə maskota təka na dədim Məgənyi. ²⁸ Tike da kaktla aɗa gəri sukur, da sən aci da ki'i da shi da kunuk gərgéyau. ²⁹ Atəro nən kiɗu dashi launi aɗa gəri binən, tau dashi i ɗak kagalata gəri. ³⁰ Gaɗa sutku gawa da kunakun na awayu bai ngabai ke, jigaɓ ke dlam nakshi i yuwan. ³¹ Amman wa kaktla aɗa wa nən, da nda dlame wa kagala bai. ³² Amman Məgənyi kagalatə wa nən, nda gabaɗ wa gaɗa wa təfa i kunu dakənekəne iɗa gayi na ndak duniya bai. ³³ Wate, yaganaucin ga, kwa de i tak masana iɗa gayi nən, a dərina tike. ³⁴ Na nən a kəmu maya nən, daa tina na abən da wunduwa gaɗa kwa de iɗa gayi nən a dlaɓa gaɗa kagalata bai. I aɗa be wara kwa tarneu, na rama dikun be wara kwa dlamau nade nən.