¹ Nami Maleka yo bad bui baluni, ne moiko jenjak baba ngeteno dunya. Onangkok jenjas 'yak ehe bo wuyos an bo ernoto bu. ² Aha bo wuyo so an bo ernoto bu, kaba woi olyo hetenok bo dumbiy kit olyos tong yesis na'ako. Hoti ki hibla wanglansu tututdu, kika olyos a hetek bo dumbi yesis 'e. ³ Ki tong wuyos me kaba woi shalaku hatano tong dunya, onansu gedo kit so indiri tong dunya. ⁴ Anansu nzuni kol yam ki santa ki lei shida hehetei yiya ki roh bu, kaba biyai anan hatimik Ndeyi dohosu bu. ⁵ Onansu bille dudge algi maye bu. Kaba dei maite nzuni yo tere bad. Hodanto me a deya kit so indiri na basa ngo. ⁶ A sommodi wom algi gyaza mato, me nzuni wena te bu. Nzuni zoha tili ka mato, matos me a soma jijok bonsu. ⁷ Shalakui me a subak dokunshei ramtangko nzunik ka kesi. A babak kasu an 'ei yo'oto kit alyahu so dinar, huskasu kit so algi. ⁸ Somsu kit yo monde, udosu kit udok turum. ⁹ Mansu kit yo oyu, adirsu me kit adir dokunshe ana kesi shei ki dokunshei ramtangkok ka ndishe be'i kesi. ¹⁰ Anan hata ki lele kit indiraku. A hatasu anan gedok maita algi yo gerak tere bad. ¹¹ Anan yo'oto kit ma'i kasu, maleka wuyos an bo ernoto bu. Sunik bo Ibraniyaku Abadon, ki bo Helenaku ke Afoliyon. ¹² Aloba so tono gedato. Moyi! ki bei woi masifaku bolo isano. ¹³ Maleka yo bad buiko baluni; kaban kolshe dolyak balu kika bagdik dinar so a dom Ndeyi. ¹⁴ Dolyas angkok maleka yo ba'ashimodi yo an balui 'e, "Biditik Malekaku mayei hodoi ma ngarno tong haushik Yufiretus so na'ako se." ¹⁵ malekakui hodoi 'yangkok ka jajum woiye 'e, ki hoti wonses 'e, ki tere woiye 'e, ke jok sani wonses 'e, wusansu nzuni dudgitik modik tong kunuk algi. ¹⁶ Sheiki ana kesiy a bei dokunshei woi si 200,000,00. Ne kolkok sheisu. ¹⁷ Ne moiko dokunshei ka a tong suna no ki ana dena nzuni; 'yak kesinsu deini tirshil kit yesi, shudis uunu, ke jok haftik me'eshi. Ka dokunshei a subak ka turum, ki bonsu jo yesi, ki olyo ki yesis hetre yo hatanok bonsu. ¹⁸ Dugyangkok modik tong algi ki aloba mayei kunui 'e: Yesi, olyo ki yesis hetre so hatanok bonsu. ¹⁹ Kika gedok dokunshei a bonsu ki hatasu-kika hatasu iko subak sammaku, ke anan ka yo a kolshendi regek algi. ²⁰ Kine algiy dugyangko nzunik aloba maye bui, tubangkok shida rutai nzuni 'yangko bu. Jo nzuni wusangko ona jirek singkau, ki goro dinar, ki azurfa, ki tagulla, ki gosho, ki shoho-karei yo nzuni moino, kolshi, do marshe bu. ²¹ Nzuni jo tubangkok dugya algi bu, ngara guru, aza, domana rutansu yo shiri bu.