¹ Jajum yo Lah Gyam aha hatimi so babiloi, tong baba ye'eta dongo. ² Ne moiko Malekaku babilo ma a erno dom Ndeyi, onansu balu babilo. ³ Malekai yo'oto ndino, saranni an gerwale dinar ki kajijik bokshi, a erno dom Ndeyi. Kajijis onani shei kika mokshe dom Ndeyi ki donshu ana ona jire shaf a ka bagdik boka kajiji so dinar a dom njagdas'e. ⁴ Olyok kajijik bokshis, ki donshu ana ona jire, hindangko baba dom Ndeyi ki sarak malekai'e. ⁵ Malekai namko kajijik bokshis ngamtintok yesi kika bagdis'e. Moishe yarbeno eli tong dunya, kaba woi gillek aradu, ki lulula, ki talku hetre yam, ki didek eli. ⁶ Malekaku maye ana balu babiloi ramtangko zugonsu buishe. ⁷ Maleka yo tono buiko baluni, kaba woi tantayo ki yesi lombenok dom. Olano si dunya moishe modik tong kunuk dunya bokito, modik tong kunuk roh goyansu, shafki santai medo goyansu. ⁸ Maleka yo bolo buiko baluni, kaba a moishe 'ei modi kit goshos na'ako yesi tishe olano si tong haushi. Modik tong kunuk haushis deyi to dom, ⁹ modik tong kunuk ana zau yo tong haushis maftansu, modik tong kunuk gerei ham ke lalaktansu. ¹⁰ Maleka yo kunu buiko baluni, kaba woi jenjas so'oto na'ako ngetenok baba, a hano kit bo teya, a ka modik tong kunuk haushi ki be'i hete ham. ¹¹ Sun jenjas Ɗaɗatu, algi shei maftangkok ka ham ye inni Ɗaɗatu. ¹² Maleka yo hodo buiko baluni, moishe modik tong kunu so hoti basatoko, ki modik tong kunuk tere ki modik tong kunuk jenjaku. Modik tong kunusu shaf 'yansu tutudu; modik tong kunuk goli ki modik tong kunuk bedi shaf yaklangkok talkusu. ¹³ Don moiko kaban moishe shuli so a gesyo tong baba a wundik dolyas gedo, "Titiku, titiku, titiku, ki ana deino dunya kika kine balu mayei a gosu buishei 'e."