¹ Kaban moiko tong saranas tinak a deimo ka njagdas, ne moiko lalauna so an tureshi domtok beito, ke jo gohantodi ka ma'i baabilo. ² Jon moiko malekai yo'oto na'ako a ekuwa ki dolyas gede, "Lo a gitik ehe lalaunas nami hatitik ka ma'i ye?" ³ An ngo ɓaɓa domana a eli do a elelik eli yo tadatko ehe lalaunas dommana kkarante ei hawoto. ⁴ Ne iko bele yam kika an ngoi suta ehe lalaunas domana kawante ei hawoto. ⁵ Modi mek tong koknaku mayei anota, "Ko'e belle bu. Moyi! Turum yo shida Yahuza, Tushek Dauda, Watkok bille. Subatk ehe lalaunas'e ki ka ma'inshe baabilo." ⁶ Ne moiko la Gyam ernotintil njagdas ki ana zau mayei hodoia hotok koknaku. Iko subak ngoi dugyangko. An balu baabilo ki ido baabilo; mamayei kelu Ndeyi baabilo yo sarnko dunya shato. ⁷ Nduko biska lalaunas ki sarastinak a deimo ka njagdas'e. ⁸ Jajum yo la Gyam biska lalaunas, ana zau mayei hodoi ki koknaku mayi bibolok hodoi ngaktangko eli shafsu dom la Gyam ye'e. Lei ngoi yiya an molo ki shoko dinar ngamnok karei atursa, maye me donshu ana ona jire. ⁹ Nzuni arkangko arkoi hoyo: "Ko tadatkok nam lalaunas ehe. Kika karangko koi, ko kejeno algik domko ki tong lei shida yiyak Ndeyi, linso algi ki dunya. ¹⁰ Ko matinsu mene ki ana ruta Ndeyi nzuni nan ka Ndeyimmu, ke a ina mene dunya." ¹¹ Don moiko kaban kolshe adir malekaku, shei kokrantangkok njagdas'e ki ana zau ki koknaku. Sheisu mokok duɓu timmad, ka dubaku bimmad, ki dubuk duba ku. ¹² Haftangko dolyak gedo anangko ta, "Subat ko la Gyam yo karangko biske mene, dara, mantu, gedo, na'ako namaka ki kunani." ¹³ Ne kolko lei a zau yiya yo a tong ɓaɓa ki eli ki elelik eli ki tong haushi- shafki ei hawosu- a anshe ta, "Woi si yo a de'ino ka njagdos ki la Gyam ye'e, kunani, na'ako, darja jo ki gedok ina mene, an bo ernoto bu. ¹⁴ Kaba ana zau mayei hodoi anangko ta, "Amina."' Koknakni mayei me ngatangko hahawo ini kubeshi.