¹ Kaba ne moishe taktaka isno urshek ɓaɓa. Andi makullik wuyo an bo irnotobu, andi yakla nakko a sarani. ² moya namko jerok sambas e, sine Singkau, ngarini sani dalma. ³ Sottini tong wuyo so an bo ernoto bu. Hani me a gob 'yak ngara eni kanni. Ka'a halene kika si a sawudi haita ona jire bu kaba ki bei sani dalma. Ki bei woi e. A wusasi yo sarti shim. ⁴ Sei ne moi jakɗa mene. maye yo a ɗeinok hukangta. Ne moikok zau ki maye yo ɓatangkok kasu kika sheidak Yeso ki eni Ndeyi. A ishe ki ei riya ɗonshu bu ko subani, ku ɗangko ɗo biske subani a bo doha su ko a sarasu. Sauwangko sira, yangko mene ki Kiristi sani dalma. ⁵ Kine ki ona mato mano ki zau bu kaba ki bei sani dalmas ngangko. Sine woi hinɗa ana mato yo tono. ⁶ Ngoi an barka ne bu'uno ne yo an rabo tong binɗa ana mato yo tono! Mato so bolo andi iko akamamaye bu. Aɗeyisu ana ruta Ndeyi ki yo Kiristi a ina mene ki si yo sani dalma. ⁷ Na sani dalma dino bo ernoto, a wustik Singkau ki toing rininni. ⁸ A eteku ɗo a youte ana yaklu ona jire yo a jakɗak mene hoɗo yo dunya, Gog ki Magog a ɗaha zuni kika kesi. Sheisu a deya kit yayas bo hausgi. ⁹ Laktangko wuskok dunya me kurangkok bei ɗeinok ana ona jire, daltu banoi nakko. Me yesi urno ki ɓaɓa bokisu shafsu. ¹⁰ Singkau yo haita zuni, sottani tong heterek yesi so a tishe, be iso sattangko ei riya ki a rerei nabi. Asena bone toti ki beɗi har bo ernoto. ¹¹ Ne moiko nakkok jakɗa mene ki ei yo ɗeino kanni. Dunya ki ɓaɓa gomangsu ki huskann, me an bei so a gobu. ¹² Ne moiko ana mato manakshi ki minie zuni erno dom kursiya, ahangko lalauna ahangko lalauna so'oto-Lalaunak Zau. Yankok ana mato sherya aka ei tureno tong lalauna dadei ki rutansu. ¹³ Haushik ongkok ana mato yo a hawoto. Mato ki Hades onangkok ana mato yo a hawosu. 'Yangsu sherya dadai ki ei zuni 'yangko. ¹⁴ Sottangko mato ki be huti tong yesi. woi ne mato so bolo-hanok yesi. ¹⁵ Shaf ngoi na wangko suni tureno Lalaunak Zaubu, sottani tong hanok yesi.̵