¹ Yaknakui Galatiya! Namku kelungkui lo? Nguni yo tamangkutik Yeso Lah Ndeyi yo longkangko si ka shoho. ² Woi ei ne ndalon shutek gemangku: Ngu biskangko kelui bu'unok ka ruta sherya ɗo ki be'i ona jire ka ei ngu kolangko? ³ Ngun yaknaku ɗo? Ngu somangkok kelui bu'uno, kausong ndalangkong tekek zugo? ⁴ Ngu sangko maito bo sarei-kebo 'yabu bo sarei? ⁵ Ngoi ongku kelui buno ki rutanta 'yak monmoni hototku ikok ruta sherya, do ki bei kolshi ki ona jire? ⁶ Kit yo Ibrahim "Ongko jirek Ndeyi wa kunnu gemni ɗeyinni ngoi zina," ⁷ tong bille modi, mantitko, jo, ta mamaye milla Ibrahim tong ona jire. ⁸ Eni Ndeyi, go to wangla algik tong ona jire su, ana eni Ndeyi ki Ibrahim, ta, "Ki gemko dunya go to wena barka." ⁹ Ka a ke 'e, biyai biskangko jire ana barka ki Ibrahim, ngoi a ona jire. ¹⁰ Shaf ngoi ongko gyeɗonni ka sherya titikunni; jo tureno, titikunni ngoi ongko gyeɗonni tong lalaunak sherya, jo rutanta zunhu. ¹¹ Kauso mantenonni an ngo moɗi yo walno gem Ndeyi kika sherya bu, kika ngoi an jirei a deino tong gyeɗok jire. ¹² Sherya me 'yak jire bu, kaba dei, "Ngoi na ruta ka sherya a ɗeyi hawoto." ¹³ Yeso wangeno munik tong kasantu ɗeyini'yak kasantuk kammu-kika ture ta, "shaf ngoi bankosi zug shohoi deyinni 'yak kasa"- ¹⁴ do barkak Ibrahim urtu ka Ana-mure-ona-jire tong sun Kiristi Yeso, ki bei ona jire gommu biska kelui ɓuno. ¹⁵ Yaganamu, ne ishenku eni tong suba ngoi a tong suba ngo an ngoi moɗi yo zati gyenga ko sauwidi na dei enni tong sharya. ¹⁶ Kauso ngara eni so ananko Ibrahim shaf ki e beini, har kauso ano bu e beini wato biya tim wato Yeso. V 17 Kauso ance ta ka'a sharya so dino sani 430 ki bei zanko ta ngenga bu jo ke buko eni Ndeyi bu. ¹⁸ Na me sharya woise wanko tok bille gado, ka'a ɗeya wa'adi ke nan. ¹⁹ Ta eni sharya se? So sauwanko ki hoɗa lehe eli sei zuriyak Ibrahim hatanok sharya zohanto dole ki bok taktaka. ²⁰ A rishe hotonmu walak ngo moɗi amma Ndeyi moɗi. ²¹ Sharya ni a rina tong eni Ndeyi? a'a ka'a bu, na me sharya onko ki bo onzi ka onanko sharya so ona zau ka sai a we zinik Ndeyi ki ka billa sharya. ²² Amma eni Ndeyi hat ko lei ngoiyiya tong zunhu. Ndeyi ki biya yo onankok jire. ²³ Kabun jire ditu mu ngarno tong sharya. kaba wake jire dino. ²⁴ Sharya ɗehinto billamu kaba dishe Yeso kika bo wanko wangu tong jire. ²⁵ Me ki dishe jire dino, andi deinommu elelik bomu yo moɗi bu. ²⁶ Kauso shafku ngu milla Ndeyi a tong ona jire gem lah Ndeyi. ²⁷ Ki bo timku wanko Baptisma tong sun Yeso lah Ndeyi. ²⁸ Andi ance ta bayahude, ɗo biya mato, ɗo lah, ɗo bawa, ɗo mandu, ɗo gorzo shafku ngu deyanku tong sun lah Ndeyi. ²⁹ Name Yeso ki bo ka'a ngu shada Ibrahim kit yo tong wa'adi.