¹ Aka rutayo ana ona jire, subane turekubu. ² Ne an manti aka 'yei ngu ndalanko, yone iko bo kanni ki biyayo Macedoniya. Ne ansuta Achaiya ɗokankok zugonsu tinki mano, zoha tilinku zopkok sheisu bo geɗok zugo. ³ Kauso ne sarko biyano genanku aka kada yankammu a katku a deyi sarei, aka ke ngu ɗeyi ka masku kityo ne anku ngu ɗeyi. ⁴ Na ka'abu ngoi Macedoniya na ndino ki ne'e nguka maskubu, mu sena kawa-ne anko 'yabu katku-yo geɗok tili abo nguni. ⁵ Abo moinono subane zob biyano a ndutu gemanku be ramtu ki mare aka onom so ngu ertanko eni kato. Woi kibo na a ɗeyi bo eli kit barka banya kit 'yayo njaɗ ma bu. ⁶ Eni sine ngona kapko zina ke zunka zina ke ngona kapko bo wena barka ke zunka barka. ⁷ Na ngoyiyake a oni kityo si anko bantilini kada ngo oni ki jigyayibu, ko ki bei tilibu. Kika ndeyi nda bok onom ki hetrek hawo. ⁸ Ndeyi ke gitik icenku barka sosiyake shei, aka, a tamiyake, a tong 'yaimiyake, ngu we 'yei ngu ndalanko. Woi a hele bonamu sauwe ina ei zina. ⁹ Kityo tureno: "supkok darani ke onkok ana mure. Tili moɗini an bo ernotobu." ¹⁰ Ngona onko shida ki bok mara na kapko bo wo'oto, ke onko a sauwe shidanku yo kahi. A sauweku ampanitku yo tilimoɗi. A kawantinku ki 'yei miyake aka ngu hante onshe wari danto. ¹¹ Onomkui a moktu kunna Ndeyi ki lehemu. ¹² Aka ina ruta woiye'e ngamta 'yei ana ona jire ndalanko moɗabibu. Meke sauwa onom yo kunna Ndeyi ainum. ¹³ Kibo kabtankuko rutanko, kengu namtaka Ndeyi ki bille on'a kawa ki bisharak Kristi. Ko gitik namaka Ndeyi ki bille onshesu chei, joki ngoyoyiyake. ¹⁴ Ndalanko ndishenku ke icenku ɗonshu. A ice woiye'e kibo tili moɗi yo Ndeyi yo ngu anandi. ¹⁵ Ndeyi 'yak kunnu aka onomni yo gyaɗatkok masni!