¹ Eni woi jire: Ngoina ndalo deyi na'ako tong ban donshu, suba e rutai zina. ² Kika ka a na'ako deyi wara 'yak huli. A deyi a mandu modi, a ngaha ka, an hangkali, keluni seno, a biska ngerhahi. A gitik shutantu. ³ A deyi a sena mishi bu, ke a ngeldi bu. Me kika ka a deyi a ngoi keluni seno, a deinok lahiya. A ndalta dogdo bu. ⁴ Ngafko deyi a ngaha banonni zina, millani deyi ana suntantani ka ki ona na'ako. ⁵ Gyaro na ngo gitko ngaha banonni bu, a ina lolo ngaf ban donshu Ndeyi? ⁶ Suba deyi ngoi tuba hoyo bu, kika kada hafte ka ki tama na'ako, kada ngete tong sheryas 'yangkok singkau. ⁷ Suba an sheidas zina kanni a hotok biyai onangko jire bu, kika kada ngete tong kawa ki doka singkau. ⁸ Ka a ke e jo Dikinoni deyik tiliy zina, ana eni bolo bu. Suba deyi ana sena mishi domana ana zima bu. ⁹ A deyi ana ngaha ona jires tamangko tong danum ke bu'uno. ¹⁰ Ngafko some moya nzuni, ki wonde some ruta kika an 'yak huli bu. ¹¹ Ka a ke e monde deyi ana tili zignen. Suba deyi ana hitna bu, me ana ngaha ka ki tiliy zina tong lei miye. ¹² Ngafko Dikonaku deyi ana monde modi modi, a gitik ngakha millansu ki babnensu. ¹³ Gyaro mayei 'yangko rutai zina wangkok ernos zina ki gedok tili tong ona jire so a tong Kiristi Yeso. ¹⁴ Ne turengku ei maye e, ki zoha tilin nditu gemko tong sommodi nem. ¹⁵ Me nane ndino marei bu, ne turengko ko mantidi shida rutangkoi ko ina tong ban Ndeyi, wato ban donshu Ndeyi so an zau, somunto ki hafta her ngaudok jire. ¹⁶ An shana bu anangko ta daha Ndeyimmu so jire an na'ako hawo: "Tamko kanni tong zugo, Kelui bu'uno tamko si, malekaku moyangko si, 'yangko enini tong elis dunya shaf, onangko jire kanni dunya, nami namini baba tong nama ka."