¹ I ka e̱o gho o̱i ebi oli ovbi oghogho re̱ vu yi o̱kpa vbi ihio̱n si akan aa, I ho̱in ebi o̱kpa vbi ele, emamai le mo̱n oreghe tai vbi urun lo̱ roo bi oisiokhumi lo̱ dei, "Vare!" ² I kaa e̱o a, o̱ mio̱n khi esi lo fuan rivban, o̱lo̱ he̱in o̱n, o̱ nwin e̱te̱kun mo̱e̱n, a nwin uvbieru oje nai. O̱dian re bi o̱lo̱ o̱lo̱khuo kho̱in lo̱ire̱ khuokho̱in. ³ E̱ghe̱ li o̱li ovbioghogho ke re̱ vuyi akan lo̱zeva aa, I ho̱in khi emamai lo̱ mo̱i oreghe o̱zeva, o̱i "Vare!" ⁴ E̱si o̱vbe dianre lo̱ vbae yan yan yan. Ari ehee li o̱lo̱ he̱n o̱n re̱ nwun o̱fure sho̱ vbi o̱li agbo̱n na re, li eia ya gboo egbian kua. A nwin agada lokhua o̱lo̱ he̱n o̱n vbi obo̱. ⁵ O̱li ovbi oghogho ke vuyi akan lo̱ zi ea aa, I ho̱in khi emamai lo̱ mo̱n oreghe o̱zea o̱i, "Vare!" I min e̱si lobi li o̱lo̱ he̱n o̱n hua uman emi eva mo̱e̱n vbi obo̱. ⁶ I hin emi lo̱u bi ukpurun vbi esese̱ si emamai lo̱ mo̱n oreghe ele, o̱re̱ o̱i "Okpan si ihuiti o̱kpa vbi egho lai hai vbi ukpede, okpan si ibaali eea vbi egho lai hai vbi ukpede. Ama, e ui evbi bi e̱yo̱n emi lo̱be. ⁷ O̱li ovbi oghogho ke vuyi akan o̱zi ele aa, I ho̱in khi emamai lo̱ mo̱n oreghe ozi ele, o̱i "Vare!", ⁸ I za min esi lo̱i mo̱n ofioo. O̱lo̱ he̱n o̱n ae cho̱i Euu, idi o̱re̱ khaan. A ri ase̱ ni ain vbi odo̱kpa vbi odi ele si o̱li agbo̱n na lei ri itakobi, ohanmi bi iwowo emiani gboo eia bi eamogo si o̱li agbo̱n na kua. ⁹ O̱li Ovbioghogho ke vuyi akan o̱ziihie̱n aa, I mio̱n khi ehi si eia lagboo kua vbi o̱hio̱ si eta si Oise̱le̱bua bi emi leri o̱se̱e̱ io̱ eri vbi e̱ge̱ge̱n ikpe̱kpoisa. ¹⁰ E khue urun dianre, vbi amian, "Ebo̱lo̱ kei te̱e̱ se̱, o̱lo̱ri emi ere̱me̱n shan, o̱lo̱ fuan bi ata, o̱lo̱se̱ vbo̱ khi ui ighae̱zo̱n si elo̱ rivbi agbo̱n bi o̱se̱ i khi ui e̱n oga si eremai lee?" ¹¹ Okese̱ aza nwun ni e̱un lo̱fuan ni yain oto̱kpoto̱kpa, a gue li ain ho̱n ni yain se̱ muzan keree se̱vbo̱ kha si etueka li ere̱ gba vbi ayio̱ uhumi, le re̱ vbi imio̱n li imo̱he bi imio̱n li ikposo, la lo̱ gboo, ebi ai gboo i ain, egbe. ¹² O̱li ovbioghogho ke vuyi akan o̱zi ehan an, I za be̱ o gho o̱i khi uto̱i nwun kpeghe valo̱a. O̱e̱n bi a bi adaigho̱n, ukin lo̱ hua edide o̱ u bi e̱re. ¹³ Ikpae̱nhie̱n za vbi ukhumeimi delo̱ kuo̱ vbi oto̱i, yo̱i ikpo̱mo̱n li ei wue̱n si oro̱n kua I delo̱ kuo̱ vbi oto̱i be mo̱n khi efio ame̱n kpeghi ain. ¹⁴ Okhumi da ho̱a bi ema shie o̱ vbi oto̱i re. O̱ko̱ ere̱me̱n bi o̱ko̱ e̱da e de li eko̱. ¹⁵ O̱kese̱ ije si o̱lagbo̱n na bi eia si ukutu, ekakuo, ele fei, elo̱ totoi bi eia ere̱me̱n ighumi bi elo̱ mo̱n egbi ain, eo̱ la hee vbi irun bi e̱ge̱ge̱n ido vbi okhumo̱ko̱. ¹⁶ Ere̱ eli o̱ko̱ bi eli ido, "Vba de te̱n mai ye̱n! Nwun mai hee sho̱ vbi isao si o̱lo̱ dia vbi e̱kpeteo̱ba bi ibiohan si iriae̱ke̱n si o̱li ovbioghogho re. ¹⁷ Ukpe̱de̱ si iria e̱ke̱n aa si ain o̱vare. O̱o̱lo̱ meti muzan?"