¹ Ena ke o̱ rare, I za min ekhe̱n ange̱li ele, e muzain vbi igue̱n egbe isi o̱li agbo̱n na, etotobo̱ din efioo ele lo̱ fioo vbi o̱li agbo̱n na ye̱n lei o̱ ke fioo nwin oto̱i, vbi olokun da efio nwin eran. ² I min ange̱li o̱vbee o̱vbee o̱zavbi ebi o̱e̱n o̱za me̱re di oto̱i re lo̱ mo̱n akan isi Oise̱le̱bua lo̱ rivbo. O̱ khue urun dianre yi ange̱li ele la ri ehee ni re̱ uo̱ ria vbi o̱li agbo̱n na bi olokun. ³ Vba i se̱ uo̱ ria yi o̱li agbo̱n na, okun da eran, o̱ chie̱n si mai ri akan o̱ vbi e̱hai si ekhe̱n ayio̱ uhumi isi Oise̱le̱bua mai." ⁴ I hin etueka li asu i ain akan, u; evbi etui, e̱gbe̱n vbo di egbo̱ ihiēin bi egbo̱ eva i kpele, lari akan o̱i ain vbi uhumi le za vbi uanmi si eia si Isre̱li vare. ⁵ E̱gbe̱n bi ue lari akan o̱n le za vbi uanmi isi Ijuda vare, e̱gbe̱n bi ue vbodi igbeva vbi uanmi si Irube̱n, e̱gbe̱ bi ue vbo di igbeva vbi uanmi si Gad. ⁶ E̱gbe̱n bi ue vbodi igbeva vbi uanmi si Asha, e̱gbe̱n bi ue vbodi igbeva vbi uanmi si Inaftani, e̱gbe̱n bi ue vbodi igbeva vbi uanmi si Imanase̱. ⁷ E̱gbe̱n bi ue vbo̱ di igbeva vbi uanmi si Isimo̱n, e̱gbe̱n bi ue vbodi igbeva vbi uanmi si Ile̱vi, e̱gbe̱n bi ue vbodi igbeva vbi uanmi si Isaaka, ⁸ e̱gbe̱n bi ue vbodi igbeva vbi uanmi si Ize̱buluni, e̱gbe̱n bi ue vbodi igbeva vbi uanmi si Ijose̱f, bi e̱gbe̱n bi ue vbo di igbeva vbi uanmi si Ibe̱njami la sui ain akan. ⁹ Ena ke o̱ rare, I ka e̱o a, eia lebun lakha meti ko̱o̱ ri vbaan le za vbi uhumuroo ere̱me̱n, uanmi, eia bi uroo vare-emuzain vbi isao si e̱kpeteo̱ba bi isao si ovbi oghoogho. Ewee e̱un lo̱fuan, ehua ikpeami mo̱n obo̱. ¹⁰ Yan khue urun dianre gboo echi o̱i khi "Amiefan isi Oise̱le̱bua o̱, lo̱ dia vbi e̱kpeteo̱ba bi ovbi oghoogho!" ¹² Ekhe̱n ange̱li ere̱me̱n muzan lagaa o̱li e̱kpeteo̱ba, gbo lagaa eli edio̱n bi etui ele emamai le mo̱n oreghe, e sali eke̱n run fi e̱o kpoto̱i vbi irae̱o si e̱kpeteo̱ba, yan gi Oise̱le̱bua, ¹¹ yan re̱ o̱i, "Amin! ire, o̱khae, ewain, ekhue̱mi, ekpe̱n, utotomi bi uohiami o̱ re̱yi Oise̱le̱bua mai re̱le̱ re̱le̱. Amin!" ¹³ O̱ ke se̱, oto̱kpa vbi eli edio̱n za mian me̱n, "Eikhi ena, le wee ikpun le fuan na, ebi yain za vare?" ¹⁴ I re̱ o̱i, o̱li ekpe̱n mai, "umake e̱n," o̱ za e̱ me̱n, "Ena li khi ele za vbi eke̱n orughulabe lokhua dianre. Eho̱ e̱un siain fuan vbi e̱re si o̱li ovbioghogho. ¹⁵ O̱hio̱ si o̱na, e ke o̱ di isa o̱ si e̱kpeteo̱ba si Oise̱le̱bua re, yan ke gai aso̱n bi odian mi vbi ite̱mpo so̱i, o̱lo̱ dia vbi o̱li e̱kpeteo̱ba lo̱ke uvoo so̱i voo i ain. ¹⁶ Ohanmi kha ke che gbi ain, I yo li ohan ame̱n kha gbo i gbi ain. Ovo̱n kha chie gbi ain nwun oto̱i, da emi lo̱ u kho̱ o̱mo̱n oto̱hian li voivoi. ¹⁷ Eri o̱li O̱vbioghogho lo̱ ri vbi esese̱ si oli e̱kpeteo̱ba lo̱ ke chie̱n o̱lo̱ kue̱ ighogho yi ain, o̱lo̱ ri ain di ebi ame̱ si aevbo̱ o̱za la dianre, bi Oise̱le̱bua o̱lo̱ kali evie̱ sho̱i ain vbi e̱o re."